Дидед чIалан лап хъсан муаллим

Аскер-интернационалист Абдул Саидован тIварунихъ галай Эминхуьруьн юкьван школадин гуьрчегдиз безетмишнавай актовый залда «2022-йисан дидед чIалан лап хъсан муаллим» лишандик кваз тухузвай республиканский конкурсдин муниципальный этап кьиле фена. Ана райондин школайра лезги чIалан ва литературадин тарсар гузвай 6 муаллимди (начагъ хьуникди 2 муаллимдивай конкурсда иштиракиз хьанач) иштиракна. Абурун пешекарвилиз ва устадвилиз 7 касдикай ибарат тир жюриди (председатель РУО-дин начальникдин заместитель Къачабег Аминов) къимет гана. Нетижада конкурсда, 114 балл къачуналди, 1-чкадиз ЦIийи поселокдин юкьван школадин муаллим Индира Шидиева лайихлу хьана. 2 ва 3-чкаяр, талукь тирвал, Сийидрин юкьван школадин муаллим Диляра Рамазановади ва Зизикрин юкьван школадин муаллим Салигьат Гьажибалаевали кьуна.

Конкурсда тафаватлу хьайи ва иштиракай муаллимрив райондин образованидин управленидин грамотаяр вахкайдалай гуьгъуьниз чун районда дидед чIалан лап хъсан муаллим лагьай тIварцIиз лайихлу хьайи И. Шидиевадихъ галаз гуьруьшмиш хьана.

Индира Шидиева (Аллагькъулиева) Алидхуьрел хуьре-кIвале гьуьрмет авай инсанар тир Мегьамедтагьир ва Эрзихалум Аллакъулиеврин хизанда дидедиз хьана. Яргъал йисара вири уьлкведа машгьур тир Кьасумхуьруьн консервиярдай заводда намуслудаказ кIвалах авур дидедини бубади чпин 6 веледни низам-ахлакь аваз тербияламишна.

- Дидедизни бубадиз закай духтур хьана кIанзавай, — лугьузва Индира Мегьамедтагьировнади. – Амма зи рикIе гъвечIи классра кIелзавай йисарилай инихъ муаллим хьунин къаст авай. РикIе авай мурад кьилиз акъатунал, виридалайни гьуьрметлубурукай сад тир муаллимвилин пешедин иеси кьунал къе за шадвал ийизва, за зун бахтлу инсан яз гьисабзава.

И. Шидиевади и келимаяр лагьайла, зи рикIел туьркерин шаир Надым Хикмета лагьай гафар хтана: «Ашкъидалди кIвалахал физвай ва шадвилелди кIвализ хуьквезвай инсан бахтлу кас я». Ара датIана 37 йисан къене рикIик шадвал кваз кIвалинни школадин рехъ атIузвай Индира муаллимдиз и келимаяр хас яз аквазва заз.

Кьасумхуьруьн 1-нумрадин юкьван школа лап хъсан къиметар аваз акьалтIарай жегьил руш 1980-йисуз Дагъустандин педагогический институтдин филологиядин факультетдик экечIна, 1985-йисуз анаг акьалтIарна.

Жегьил муаллим Индира Мегьамедтагьировнади вичин зегьметдин рехъ Кьасумхуьруьн 1-нумрадин юкьван школада урус чIалан ва литературадин муаллимвиле кIвалах авунилай башламишна.

1994-йисан январдин вацралай инихъ И. Шидиевади ЦIийи поселокдин юкьван школада акьалтзавай несилдиз дидед чIалан ва литерутардин тарсар гузва. КIвалахда тежрибалу муаллимдихъ гьар йисуз агалкьунар жезва. ИкI, Индира Мегьамедтагьировнади тарсар гузвай аялри районда ва республикада лезги чIалай тухузвай олимпиадайра кIвенкIвечи чкаяр кьаз са шумуд йис я. Идан гьакъиндай муаллимдиз Дагъустан Республикадин образованидин министерстводи ва райондин образованидин управлениди ганвай Гьуьрметдин грамотайри шагьидвал ийизва.

И. Шидиевади чирвилер гайи ва гуьгъуьнлай чпикай лезги чIаланни литературадин муаллимар хьанвай гадайрин ва рушарин кьадарни тIимил туш.

- Индира Мегьамедтагьировнадикай рахадайла Муаллим, Тербиячи, Несигьатчи гафар чIехи гьарфарилай кхьиниз лайихлу я, — лугьузва школадин директор Бег Абдулашимович Ягъибекова. – Ада райондин дидед чIалан тарсар гузвай муаллимрин конкурсда гъалибвал къачун тIебии кар я. Адахъ гьам дерин чирвилер, гьамни кIвалахдин гзаф йисарин тежриба ава. Кьилинди, зи фикирдалди, Индира Мегьамедтагьировнадин рикI хкянавай пешедал ва аялрал гзаф ала. Адет яз, рикI алай пешедин иеси хьанвай касдихъ кIвалахда агалкьунарни жеда. И гьакъикъат Индира муаллимди мад сеферда тестикь хъувуна.

Гаф кватай чкадал алава хъийиз кIанзава хьи, Индира Мегьамедтагьировнадин гьакъиндай чаз разивилин келимаяр райондин образованидин управленидин начальникдин заместитель Къачабег Аминова, РУО-дин патав гвай информациядинни методический центрадин директор Муминат Бабахановади ва райондин дидед чIаларин муаллимрин Ассоциациядин руководитель Гуьзел Межидовади лагьана.

Малум хьайивал, И. Шидиевади кIелзавайбур дидед чIалал ва литературадал ашукьарунин мураддалди ачух тарсар, семинарар, мастер-классар, лезгийрин машгьур шаиррин ва писателрин юбилейрин мярекатар, кIелзавайбурун конференцияр тешкилзава, кьиле тухузва.

Индира Шидиева школада 6-классдин руководителни я. 15 аялди кIелзавай и класс ахлакьдин, низамдин, кIелунин, школадин общественный уьмуьрда иштиракунин жигьетдай хъсанбурукай сад я.

И. Шидиевадиз школадин муаллимрин, кIелзавайбурун ва абурун диде-бубайрин патай лайихлу гьуьрмет ва авторитетни а