Коронавирусдиз аксина рапар ягъун герек я

Сулейман-Стальский райондин гьуьрметлу агьалияр!

Ингье, кьве йисалай виниз я дуьньядин гзаф уьлквейра коронавирусдин азар чкIана. Ада обществодиз, инсанрин сагъламвилиз гьихьтин зиян гузватIа виридаз хъсандиз чизва. Азар акатун себеб яз гзаф инсанар ажалсуз кьена, гьайиф хьи, и кар давамни жезва.

Коронавирусдин «ялав» чи республикадихъ, райондихъни галукьнава. Азар чукIун тавун, адак инсанар начагъ тахьун патал, вири чкайра хьиз, чи райондани еке кIвалах тухузва. Районда ковиддихъ галаз женг тухун патал Оперативный штаб тешкилнава, ада кIвалах тухузва, райондин центральный больницадин медработникрини югъ-йиф лугьун тавуна кIвалахзава. ЦРБ вакцинадин рапаралди, герек маса шейэралди таъмин я. Коронавирусдик ва стIалжемдик начагъ инсанар ЦРБ-дани сагъар хъийизва, ва кьезил гьалда и азардик начагъбур кIвалера ава, абурни медработникрин кьетIен гуьзчивилик ква.

Эхиримжи вахтунда дуьньяда омикрон штамм пайда хьанва. Пешекарри къейдзавайвал, ам фад-фад садакай масадак акатзава. Омикрондик начагъ хьайибур сагъар хъувунни четин я лугьузва.

Мадни, коронавирусдин азардин цIийи жуьредик аяларни начагъ жезва. Коронавирусдин вилик пад кьун патал Роспотребнадзордин пешекарри маскаяр алукIун, рапар ягъун, гзаф инсанар кIватI жезвай агалай дараматра дезинфекция авун лазим тирди лугьузва. Чна и истемишунрал амал авун лазим я.

Гьуьрметлу районэгьлияр! Чаз сагълам инсанар герек я. Мадни, чна чи гележег тир къвезмай несилдикайни фикир авун лазим я. И кар патал чакай гьар сада коронавирус чукIунин вилик пад кьуник вичин пайни кутун герек я.

И кар патал, сифте нубатда, гьар сада азардин аксина рапар ягъун чарасуз я. Рапунихъ авай менфятлувални ашкара я.

Коронавирусдиз акси яз тухузвай женгина виридалайни менфятлу яракь раб ягъун я.

За агьалийриз рапар ягъуниз эвер гузва!

Загьидин Тажибов, «Зи хайи хуьр НуьцIуьгъар» общественный тешкилатдин председатель