Наркотикриз акси комиссиядин кIвалахдин нетижаяр кьуна

И йикъара райондин Кьил Нариман Шамсудиновичан гуьзчивилик кваз алай йисуз 1-сеферда наркотикриз акси комиссиядин заседание кьиле фена. А заседанида райондин Кьилин общественный хатасузвал хуьнин рекьяй заместитель Абуталиб Фатулаева, райадминистрациядин структурный подразделенийрин къуллугъри, СМИ-ди ва общественный идарайрин иштираквал аваз АНК-дин 2021-йисан кIвалахдин нетижаяр кьуна ва 2022-йисан кIвалахдин план тестикьарна.

Заседание ачухуналди райондин Кьил Нариман Шамсудиновича наркотикриз акси комиссияди районда секинвал ва хатасузвал хуьн патал кьиле тухванвай кIвалахрин протоколриз къимет гана.

Сулейман-Стальский районда кардик квай Россиядин ОМВД-дин начальникдин заместитель – полициядин начальник Раджик Абдулвагьидова 2021-йисуз наркотикар ва психотропный шейэр районда агьалийрин арада чукIун тавун патал тухвай профилактикадин серенжемрин, авур кIвалахдин отчет гана. Ада къейд авурвал, къунши районрай чи райондиз наркотикар ва психотропный шейэр гъизвай рекьер чирна, салара канабар цанвайбурун, аптекрай психотропный шейэр маса гузвайбурун вилик пад кьуна.

2021-йисуз ахьтин кIвалахрай 37 тахсиркарвал ва 20 административный закон чIурай кIвалахар дуьздал акъудна ва 86 канабдин тар, 700 грамм марихуана, 8 таблетка «Трамал» вахчуна, тергна.

Наркотикар ишлемишзавайбурун кьадар 2021-йисуз 42 кас, абурукайни 2 кас рапар язавайбур хьана.

Наркоманияди гузвай зияндикай ва профилактикадин серенжемрикай ИМЦ-дин директордин заместитель Венера Абдуселимовади ва ЦРБ-дин кьилин духтур Жафер Къурбанисмаилова лагьана.

Школайра муаллимри аялрихъ галаз наркоманиядин аксина профилактикадин серенжемар тухузва. Школьникрин арада наркотикар ишлемишзавайбур авач. Кьилин духтурди лагьайвал, чи ЦРБ-да врач-наркологдин приемдиз 2021-йисуз 276 кас ички хъвазвайбур атанва ва гьакIни 9 кас наркологдин учетда ички галачиз акъваз тежезвайбур ава.

Заседанидал рахай Жегьилрин парламентдин членри чпи акьалтзавай жегьилар спортдал машгъул хьунин, чIуру крарик эгечI тавун патал авур кIвалахрикайни лагьана.

Эхирдай анал рахай райондин Кьилин заместитель Абуталиб Фатулаева чи районда кардик квай «Комплексные меры по профилактике незаконного потребления наркотических и психотропных веществ, наркомании и незаконного оборота наркотических средств на территории муниципального района «Сулейман-Стальский район» муниципальный программа идалай кьулухъни давамарун меслят къалурна.

Райондин Кьил Нариман Абдулмуталибова авур кIвалахриз дуьз къимет гана, районда тахсиркарвилер ва чIуру крар арадал татун, акьалтзавай жегьилрикай дуьз инсанар хкатун, обществодин вилик диде-бубайрин жавабдарвал хкажун патал комиссиядин кIвалахдин важиблувал къейдна.

С. Баламетова