Секционный заседание кьиле фена

19-февралдиз чи райондин администрациядин конференц-залда «Лезги чIал хуьнин, вилик тухунин ва машгьур авунин карда милли прессадин везифаяр» темадай тухвай илимдинни тежрибадин конференциядин секционный заседание кьиле фена. Мярекатда райондин Кьил Нариман Абдулмуталибова, са шумуд райондай атанвай 60-дав агакьна муаллимри, библиотекайрин заведующийри, чIалахъ галаз алакъалу маса пешекарри иштиракна.

Секционный заседанидал дидед чIалан ва литературадин муаллимар тир Мадина Ферзилаевади (Агъа-СтIалрин школа), Маржанат Тагьировади (Кьулан СтIалрин школа), Милвара Сулеймановади (Герейханован 1-нумрадин школа), Шихмегьамед Абдуселимова (НуьцIуьгърин школа), Жамиля Жигеровади (Эминхуьруьн школа), Ханагъа Юркъулиевади (Кьасумхуьруьн 1-нумрадин школа), Пирис Нежведиловади (Кьасумхуьруьн 2-нумрадин школа), Эльвира Тагьировади (Шихидхуьруьн школа), Минаят Муталибовади (Вини СтIалрин школа), Диляра Рамазановади (Сийидрин школа), Гуьзел Межидовади (Курхуьруьн 1-нумрадин школа), Эльмира Фатаховади (Агъа-СтIал Къазмайрин школа), Аксиния Жавадовади (ЦIийи поселокдин школа), Замира Идрисовади (Курхуьруьн 2-нумрадин школа) докладар авуна.

Докладар гьялунин карда райондин Кьил, филологиядин илимрин кандидат Нариман Абдулмуталибовалай гъейри, Испикрин школадин муаллим Фикрет Агьмедова, Птидхуьруьн школадин муаллим Девришбег Жабраилова, Эминхуьруьн школадин муаллим Низами Бирембекова, ЦIийи Макьарин школадин муаллим Рамиз Идрисова, ИМЦ-дин методист Назират Мегьамедовади ва райондин образованидин управленидин начальник Гьуьсейн Шихбабаева иштиракна.

Гуьгъуьнлай муаллимри мастер-классар къалурна. Кьилди къачуртIа, Хив райондин ЦIинитIрин школадин лезги чIалан ва литературадин муаллим Сейфулагь Шагьмарданова «Са составдин предложенияр умумиламишун» темадай, Эминхуьруьн школадин муаллим Жамиля Жигеровади «Существительнияр арадиз атун» темадай мастер-классар къалурна.

Заседанидин нетижаяр дидед чIалан ва литературадин муаллимрин Ассоциациядин председатель Гуьзел Межидовади кьуна. Ада гьакIни заседанидин иштиракчияр районрин уртах Х-илимдинни тежрибадин конференциядин резолюциядин проектдихъ галазни танишарна.

Райондин Кьил Нариман Абдулмуталибова конференциядиз гьазурвилер акунин ва ам кьиле тухунин кардив дидед чIалан ва литературадин муаллимар, методцентрадин пешекарар кар чиз эгечIайди къейдна, гьакIни инанмишвал къалурна хьи, конференциядин резолюциядин пунктар гележегда гьялунив ва абур нетижа гудайбур хьунив жавабдарвилелди, кар чиз эгечIда.

- Чаз кар чидай, лайихлу муаллимар ава, — лагьана Нариман Абдулмуталибова. – И кардихъ чун конференциядиз гьазурвилер аквадайла ва ам тухудайла мад сеферда инанмиш хъхьана. Куьне авур докладрални зун гзаф рази я. Вири докладар форумдин тематикадихъ галаз кьазва. Куьне къарагъарай месэлаяр вахтунихъ галаз кьазвайбур, илимдин дережада ахтармишна чируниз, общественный дережада килигуниз лайихлубур я. Заз анра эвер гунар тIимил хьана кIанзава. Квевай за меслятар къалурун, куь тежриба ва куь кIвалахдин нетижаяр раиж авун кIанарзава. Чизва, квехъ тежриба ва нетижаяр ава, абур ихьтин мярекатрал раиж авуна кIанда…

Райондин Кьил Нариман Абдулмуталибова хабар гайивал, ихьтин марифатдин мярекатриз куьмек гуз неинки райондин администрация, гьакIни Мергьеметлувилин «Умуд» ва «Иман» фондарни гьазур я. Пешекарвилелди дидед чIал ахтармишна чирунин рекьяй зирек, зигьин авай аялризни куьмек гуда.

Х.Кьасумов