Стхаяр – чемпионар

Мукьвара Каспийск шегьерда Али Алиеван тIварунихъ галай спортдин комплексда киккбоксингдай Дагъустан Республикадин чемпионат ва республикадин кIвенкIвечивал патал акъажунар кьиле фена. Санлай къачурла, ана Дагъларин уьлкведин шегьеррайни районрай тир 600-далай виниз спортсменри иштиракна.

Абдул Саидован тIварунихъ галай Эминхуьруьн юкьван школада кIелзавай стхаяр тир Исмаил ва Агьмед Имамоври акъажунра агалкьунар къазанмишна. ИкI, 10-классдин ученик Исмаила 57 килограммдин заланвиляй ва 8-классдин ученик Агьмеда 69 килограммдин заланвиляй 1-чкаяр кьуна. Абуруз медалар, кубокар ва дипломар гана.

Алай вахтунда стхаяр-чемпионар тир Исмаил ва Агьмед Имамоври кикбоксингдай Кеферпатан Кавказдин Федеральный округдин кIвенкIвечивал патал Избербаш шегьерда февралдин вацра кьиле фидай акъажунриз гьазурвилер аквазва.

Хазран Кьасумов