Гележег фикирда аваз…

Эхиримжи йисара Сулейман-Стальский район эцигунрин халис майдандиз элкъвенва лагьайтIа, зун кIусни ягъалмиш жедач. Эцигунрин, рекьер, куьчеяр, общественный объектар капитальнидаказ ремонт хъувунин, общественный территорияр эцигунин ва дуьзмишунин рекьерай районда тухузвай кIвалахар акурла, рикIел Алибег Фатахован поэмадин цIарар къвезва: «…Эцигзава, эцигзава, куьгьнеди чукIур хъийиз, цIийи хъийиз эцигзава».

И йикъара райадминистрациядин Кьилин 1-заместитель Лацис Оруджева заз Агъа-СтIалрин Къазмайрал, шегьре рекьин къерех тирвал, хуьруьн поселенидин администрациядин работникри теклифар гвай хуьруьнвийрихъ галаз санал къелемар цазвайдакай лагьана ва чкадал фена, тухузвай кIвалахдикай макъала кхьинин тапшуругъ гана.

Гьакъикъатдани, чун фейила 10-12 кас, кьиле «сельсовет «Ашага-Стальский» хуьруьн поселенидин администрациядин кьилин везифаяр тамамарзавай Надыр Эфендиев аваз, Агъа-СтIал Къазмайрилай фенвай шегьредин къерех тирвал, 40 аялдиз кIелдай чкаяр аваз «Хуьрерин территорияр комплекснидаказ вилик тухун» Госпрограммадай эцигзавай кьве мертебадин школадин къаншарда, къелемар цунал машгъул тир.

- Къе чна хуьруьн общественный территорийра михьивилер авунин, анра къелемар цунин кIвалахар кьиле тухузва, — лагьана чаз Надыр Эфендиева. – Исятда чун алай участокда виликдай са бязи ксари чпин ихтиярдалди эцигнавай,

градостроительстводин нормайриз жаваб тагузвай туьквенар алайди тир. Абур вахчуна, азад хьайи территорияда чна хатрутин 15 къелем цазва, участокда са шумуд йисалай хатрутин гъвечIи багъ арадал къведа. Чаз акурвал, хатрутин къелемар цунал АСП-дин работникар машгъул тир.

Малум тирвал, районда гележегда туризм вилик тухун патал АTLAS компанияди сад-садан патав гвай 5 хуьре – Кьасумхуьрел, Агъа-СтIалдал, Вини-СтIалдал, Курхуьрел ва Кьулан СтIалдал агломерация вилик тухунин Мастер-план туькIуьрзава, — давамарзава ихтилат Надыр Эфендиева. Чи поселенидин территориядал СтIал Сулейманан КIвал-музей ала, хуьруьн мулкуна тарихдин имаратар, тIебиатдин гуьзел чкаяр ава. Мисал яз, хуьруьн «Латарин пIир» участокда авай са тарцин яшар 800 йисалай виниз я. Идалди заз лугьуз кIанзава хьи, чи хуьруьн поселенидин администрацияди, райондин руководстводикай, меценатрикай, мергьеметлувилин фондарикай даях кьуналди, пакадин югъ, гележег фикирда аваз кIвалахзава.

Чун инанмиш я хьи, районда вилик жергейра авайбурукай сад тир, социальный ва маса рекьерай гзаф кIвалахар тухуз гъиле кьунвай ва кIвалахзавай Агъа-СтIалрин хуьруьн поселенидин администрациядихъ гележегда лишанлу крар, агалкьунар гзаф жеда.

Хазран Кьасумов