Меню
6+

Сайт «Кюре»

11.03.2022 10:26 Пятница
Категории (2):
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Къартасвийрин «Эверай гьай»

Духтурриз агьалийрин арада вири девирра гьуьрмет хьайиди я. Ина мягьтел жедай кар авач, гьикI лагьайтIа, духтурри инсанрин сагъламвал хуьн ва мягькемарун патал зегьмет чIугвазва. Коронавирус, стIалжем ва ихьтин маса пис азарар акъатнавай, абуру инсанрин сагъламвал, уьмуьр хаталувилик кутунвай алай вахтунда чун духтурриз мадни кьетIидаказ килигзава, гзафбуруз духтурвилин пешедин къадирни гьакъикъи къайдада чир хьанва.

Шегьерра, райондин центраяр тир ва маса чIехи хуьрера вири жуьредин къулайвилер авай больницайра, врачебный амбулаторийра кIвалахзавайбуруз, гьикьван лагьайтIани, регьят я. ГъвечIи, райцентрайривай яргъа авай хуьрера кIвалахзавай медработникриз бегьем шартIар, мумкинвилер авачирди виридаз малум я. Сулейман-Стальский райондин Агъа-Къартасрин хуьрни райцентрадивай яргъа, дагъдин ценерив гвай участокда, ава. И хуьре фельдшервилин пункт кардик ква. Чи суьгьбетни гуьнепатан и хуьруьн ФП-дин заведующий Мусаева Зарема Султановнадикай я.

Алатай асирдин 60-70-йисара виликан Советрин Союздин саки вири республикайра лезгияр яшамиш жезвай ва кIвалахзавай. Туьркменияда тамам лезги хуьрер авай.

Зарема 1972-йисуз Туьркмениядин Челекен шегьерда гъетягъви Султанан хизанда дидедиз хьана. Султана къенепатан крарин органра милициядин капитан яз, адан уьмуьрдин юлдаш Райгьаната заводда оператор яз кIвалахзавай. Абуру 4 рушни 1 гада хана, хвена, уьмуьрдин шегьредал акъудна.

- Вахарини стхади чпиз маса пешеяр хкяна, — лугьузва Зарема Султановнади. – Зи рикIе гъвечIи чIавалай духтур хьунин мурад авай. И кардиз диде-бубани нарази тушир, абуру и пешедин иесийриз рикIин сидкьидай гьуьрметзавай. Чи къуншидални духтуррин лезги хизан яшамиш жезвай.

1987-йисуз Челекен шегьердин юкьван школада 8-класс вири предметрай «5» къиметар аваз акьалтIарай лезги руш, рикIе авай мурад кьилиз акъудун патал, Къазахстандин ЦIийи Уьзень шегьердин медицинадин училищедик экечIна. 1990-йисуз училище акьалтIарай жегьил пешекарди, рекье туналди (направленидалди), Шевченко шегьердин аялрин центральный больницада хирургиядин отделенида медсестра яз кIвалахна. Гуьгъуьнилай Заремади Челекен шегьердин больницада инфекциядин ва «тади куьмекдин» отделенийра медсестра яз намуслудаказ зегьмет чIугуна.

1994-йисуз Зарема Султановна хизандихъ галаз хуьруьз хтана, 2007-йисуз хуьруьнви Анвар Абдулкъадировичахъ галаз рикIер, сирер ва муьгьуьббат сад авуна, хизан кутуна.

2007-йисалай инихъ, чна винидих

Лаьана кIанда, Зарема Султановна хуьре авай медицинадин са пешекар я. Ада хуьре яшамиш жезвай 164 касдиз медицинадин рекьяй къуллугъзава. Герек хьайила ада акушервилин, фельдшервилин, аялрин духтурвилин везифаярни кьиле тухузва. Хуьруьнвийри лугьузвайвал, Зарема Султановна герек чIавуз эверай гьай я.

Вири дуьнья къарсурнавай коронавирусди, вири медработникрин хьиз, З. Мусаевадин къайгъуярни артухарнава. Ам кIвалба-кIвал къекъвезва, агьалийрин арада Роспотребнадзордин истемишунрикай, ковиддин хаталувиликай гъавурда тунин кIвалах тухузва, хуьруьнвийриз азардин аксина рапар ягъуниз эвер гузва.

З. Мусаевадикай макъала гьазурдайла, чаз ихьтин са карни якъин хьана. Ам пуд веледдин дидени я. ЧIехи руш Алинади Каспийск шегьердин медучилище акьалтIарна, алай вахтунда Санкт-Петербург шегьердин са больницада акушерка яз кIвалахзава. Кьвед лагьай руш Наиляди Ставрополдин медучилищеда 2-курсуна кIелзава. Алай вахтунда 7-классда кIелзавай гада Давидахъни духтур жедай къаст-ният ава. Ида къалурзава хьи, Зарема Султановна веледриз чешне я.

З. Мусаевади чаз лагьайвал, коронавирус пайда хьайи сифте кьилелай эгечIна хуьре и азардик 3 кас начагъ хьана, абур больницада сагъар хъувуна.

- Чи фельдшервилин пункт дарманралди, герек маса шейэралдини таъмин я, — лугьузва Зарема Султановнади. – И жигьетдай чаз райондин центральный больницади ва Уллу-Гъетягърин врачебный амбулаторияди куьмекар гузва.

Агьалийрин сагъламвал хуьнин къуллугъда намуслудаказ акъвазнавай Мусаева Зарема Султановнадиз хуьруьнвийрин арада лайихлу гьуьрметни ава.

Х.Кьасумов

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

23