Гомеран хуьруьн Советдин тарих

Къе заз чи газет кIелзавайбуруз ХХ асирдин Гомер, Дагъустандин халкьдин шаир СтIал Сулейманан хайи хуьр тир Агъа-СтIалрин хуьруьн халкьдин депутатрин Совет арадал атуникай ва ана кьиле фейи дегишвилерикай суьгьбет ийиз кIанзава.

1995-йисуз Сулейман-Стальский райадминистрациядин архивдин отделдин заведующий Р. Исламовадин къул алаз ганвай справкадай малум жезвайвал, Агъа-СтIалрин Совет 1921-1925-йисара Агъа-СтIал хуьруьн бинедал алаз арадал атана (и кар тестикьарзавай документар амач). Гуьгъуьнлай Агъа-СтIал Къазмайрин хуьрни арадал атана.

Хуьруьн советдин сифте председатель Велиев Пирмет тир. 1965-йисуз хуьруьн территориядал ЦицIигърин, 1979-йисуз Чантархуьруьн агьалиярни куьчарна. И хуьрера саки 85 майишат авай.

Хуьруьн советдин территориядал, Агъа-СтIалрин хуьр центральный усадьба яз, «Ашагастальский» совхоз кардик квай. Агъа-СтIалдал ва Агъа-СтIалрин Къазмайрал алакъадин кьве узел, юкьван кьве школа, кьве амбулатория, аялрин бахча, туьквенар ала.

1940-йисалай 1954-йисалди Агъа-СтIалрин хуьруьн советдик Герейханован хуьрни квай. 1955-йисуз Герейханован хуьруьн совет арадал атана.

Асул гьисабдай Агъа-СтIарин ва Агъа-СтIал Къазмайрин агьалийри емишар, салан майваяр, техил гьасилзава, абур гьакIни малдарвилел машгъул жезва.

1993-йисан 1-ноябрдилай, самоуправленидин органра дегишвилер тунихъ галаз алакъалу яз, халкьдин депутатрин Агъа-СтIалрин хуьруьн советдин бинедаллаз Агъа-СтIалрин хуьруьн администрация арадал атана (1993-йисан 22-октябрдин 182-нумрадин райсоветдин къарарар).

Х. Гьажибалаев