«Пушкинан картадай» - тамашадиз

Уьмуьр виликди физва, ида цIийивилерни арадал гъизва. ИкI, Россиядин Президент Владимир Путина гьар йисуз ийизвай «Ачух линияда» теклиф гъуналди, алатай йисан 1-сентябрдилай Россиядин агьалияр тир 13 миллион касди (14 йисалай 22 йисал кьван яшара авай) вичин балансда 3000 манат пул авай «Пушкинан картаяр» къачуна. Уьмуьрдиз кечирмишзавай и программадин сергьятра аваз и пул жегьилривай анжах культурадин программайра харж ийиз жеда.

Алатай гьафтеда райондин умуми образованидин са шумуд школада кIелзавай 300-далай виниз аялар Кьасумхуьрел И. Гь. Тагьирован тIварунихъ галай Культурадин дворецда «Пушкинан картадай» лезгийрин СтIал Сулейманан тIварунихъ галай музыкадинни драммадин театрдин артистри къалурай «Дахдин цIийи свас» тамашадиз килигна.

Райондин образованидин уп-равленидин начальник Гьуьсейн Шихбабаева чаз лагьайвал, хуьрерин школайрин руководителри школьникар Кьасумхуьрел гъана, хутахунин кIвалах хъсандиз тешкилнавай.

Жегьил тамашачийриз бул хъуьруьнар, шад манияр квай тамаша ва театрдин артистри тамамарай ролар гзаф бегенмиш хьана.

Гьа и йикъан сятдин 3-даз театрдин артистри «Дахдин цIийи свас» тамаша райондин Культурадин дворецда чIехи яшарин инсанризни къалурна. Адаз тамашиз райадминистрациядин, гьакIни маса организацийрин векиларни атанвай.

Мугьман хьунай, итижлу тамаша къалурунай гьам школьникри, гьамни чIехи яшарин тамашачийри артистриз чухсагъул лагьана.

Гаф кватай чкадал къейд ийиз кIанзава хьи, «Пушкинан картадай» са тIимил вахтар вилик 200-далай виниз райондин школайра кIелзавайбур СтIал Сулейманан КIвал-музейдиз, 50-далай виниз кIелзавайбур Кьурагьрин тарихдинни краеведческий музейдиз, Чуьхверхуьруьн юкьван школада кIелзавай 18 аял Дагъустандин Огни ва Дербент шегьердиз экскурсиядиз фенай.

Мадни са алава: 2022-йисалай «Пушкинан картадиз» 5000 манат пул язава. Карта Россиядин вири территориядал ишлемишиз жеда.

Х. Гьажибалаев