Хуьруьнвийриз сейли Сельвира

Яргъал йисарин намуслу зегьметдай Сулейман-Стальский райондин Кьил Нариман Абдулмуталибова И. Гь. Тагьирован тIварунихъ галай Россиядин халкьарин культурадин адетдин центрадин ДаркIуш-Къазмайрин филиалдин заведующий Сельвира Къадимовадиз Чухсагъулдин чар гана (шикилда).

- Гьакъикъатдани, Сельвира Надировна районда вичин хиве авай везифаяр намуслудаказ кьилиз акъудзавай, хуьруьнвийриз культурадин жигьетдай рикIивай къуллугъзавай культработникрикай сад я, — лугьузва райондин культурадин отделдин начальник, Дагъустандин халкьдин шаир Майрудин Бабаханова. – Ада районда тухузвай культурадин ва шадвилерин мярекатра, республикадин фестивалра активвилелди иштиракзава. Чун адан кIвалахдилай рази я.

С. Къадимовади кIва-лахзавай Культурадин кIвал районда культурадин хъсан маканрикай сад я. Хуьруьн поселенидин администрациядин дараматда кардик квай ана хъсан къайда, михьивал ава. Ана аквадай агитациядин такьатриз екедаказ фикир ганва. Хуьруьн тарихдиз, Ватандин ЧIехи дяведин иштиракчийриз, Каспий гьуьляй нафт акъудунин сифте проект гьазурай академик Иметхан Шабановаз, хуьруьнвийрикай сифте яз химиядин илимрин докторвилин тIвар къачур Осман Шабановаз, РФ-дин лайихлу ва ДР-дин халкьдин артист Абдулкъадир Сайдумоваз, Азербайжандин Игит, летчик-истребитель Сергей Муртузалиеваз, РФ-дин искусствойрин лайихлу деятель, академик Керим Керимоваз, лектор-международник Эседин Эминоваз ва машгьур маса даркIушвийриз талукь яз акъуднавай стендри, фотомонтажри культурадин макандиз къвезвайбурун фикир чпел желбзава.

- Забит Ризванова вичин «Весида» кхьейвал, тарих миллетдин лап чIехи тербиячи я, — лугьузва Сельвира Къадимовади. – Культурадин макандин цларал алай тарихдихъ галаз алакъалу материалриз, шикилриз жегьил несилди, хуьруьн юкьван школада кIелзавайбуру еке итижни ийизва. Чна мукьвал-мукьвал школада кIелзавайбурухъ галаз гуьруьшар тешкилзава, жуьреба-жуьре мярекатар тухузва, акьалтзавай несилдиз хуьруьн тарихдикай, хуьряй акъатай машгьур инсанрикай суьгьбетар ийизва.

Культурадин макандихъ 14 касдикай ибарат тир художественный самодеятельностдин хъсан коллективни ава. Ада хуьре ва районда тухузвай культурадинни шадвилин мярекатра, фестивалра ва конкурсра иштиракзава. Агалкьунрай ганвай дипломар, грамотаярни ава.

- КIвалахдикай азад вахт чна, хуьруьнвийри, Культурадин кIвале акъудзава, — лагьана чаз педагогикадин зегьметдин ветеран, шаир Эйзудин Сайдумова. – Чна ана столрал эцигнавай газетрикай, журналрикай менфят къачузва, шахматрал, шашкайрал къугъвазва, ихтилатар ийизва. Са гафуналди, хуьруьнвийри чпин азад вахт ина менфятлудаказ кечирмишзава. Сельвира Надировнани аниз къвезвайбурун къуллугъда акъвазнава. Намуслу зегьметдай адаз хуьруьнвийри чухсагъул лугьузва.

Чун инанмиш хьайивал, Сельвира Къадимова вичин пешедал рикI алай, тIебиатди кьетIен пай, бажарагъ ганвай инсанрин жергедик акатзава. Ам хьиз халкьдин къуллугъда акъвазнавай, кIвалахзавай инсанар гьар са хуьруьн дамах я.

Текст кхьейди ва шикил ягъайди Хазран Кьасумов я