Акцийрин сергьятра аваз

Россиядин Яракьлу Къуватри Донецкдин ва Луганскдин халкьдин республикайра ва миллетчивилин таблигъат тухузвай субъектра женгинин махсус операция тухун давам жезва.

- Санлай вири районэгьлийри хьиз, райондин образованидин организацийрин работникрини чи уьлкведин руководстводи ДНР-дин ва ЛНР-дин гьукуматрин тIалабуналди гьа республикайрин агьалийриз миллетчийрикай ва бендеррикай азад авунин патахъай куьмек гун тIалабунихъ галаз алакъалу яз кьабулай къарардин ва Яракьлу Къуватри Украинада тухузвай махсус операциядин тереф кIевелай хуьзва, — лугьузва райондин образованидин управленидин начальник Гьуьсейн Шихбабаева. – Тереф хуьнин лишан яз образованидин организацийра жуьреба-жуьре акцияр, флэшмобар ва маса мярекатар кьиле тухузва. Анра гьам муаллимри, гьамни кIелзавайбуру активвилелди иштиракзава.

Чи Яракьлу Къуватри тухузвай махсус операциядин сергьятра аваз районди Вирироссиядин «Белая повязка» флэшмобда иштиракна. Кьилди къачуртIа, РУО-дин жавабдар работникрин гуьзчивилик кваз аялрин бахчайра тербия къачузвайбуру инсанрин гъилерал лацу чIукар кутIунна.

«Белая повязка» акциядик районда кардик квай КЦСОН-дин коллектив, Кьасумхуьруьн 1, 2 ва 3-нумрайрин аялрин бахчайрин тербиячиярни экечIна.

«Белая повязка» акциядин сергьятра аваз мярекатар школайра ва маса хуьрерин аялрин бахчайрани кьиле фена.

Райондин умуми образованидин организацийра Россиядин Яракьлу Къуватрин тереф хуьнин лишан яз «Письмо солдату» Вирироссиядин акцияни кьиле тухузва. Акция «Сад тир Россия» Вирироссиядин политический партиядин чкадин отделенидин ва районда кардик квай дяведин ва зегьметдин, Яракьлу Къуватрин ветеранрин Советдин регьбервилик кваз кьиле физва.

Сифтебурукай яз акцияда Вини-СтIалрин юкьван школадин юнармейцийрин отрядди иштиракна.

Юнармейцийри ва школьникри Украинада чпин ватанпересвилин буржи кьилиз акъудзавай аскерриз чарар кхьизва, чпи махсус операциядин тереф хуьзвайди къейдзава.

«Сад тир Россия» ВПП-дин чкадин отделенидин исполнительный секретарь Оруж Оружева чаз лагьайвал, Украинада чпин буржи тамамарзавай аскерриз чарар кхьиз кIанзавайбурун кьадар йикъандавай-къуз артух жезва. Абурун арада школьникар гзаф ава.

Асият Мирзалиева,

Хазран Кьасумов