Меню
6+

Сайт «Кюре»

20.04.2022 11:36 Среда
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Баркалла алаз тухвай уьмуьр

Ибадуллагь Гьажимирзоевич Тагьиров 1932-йисан апрелдин вацра ДАССР-дин Мегьарамдхуьруьн райондин ЦIелегуьнрин хуьре къуллугъчидин хизанда дидедиз хьана.

Вичин уьмуьрдин ва зегьметдин рехъ ада Махачкъалада Дагпединститут акьалтIарайдалай гуьгъуьниз Хив райондин Кашанхуьруьн ирид йисан школада урус чIаланни литературадин тарсар гузвай муаллимвилелай башламишна.

Советрин Армиядин жергейра къуллугъна хтайдалай гуьгъуьниз ада муаллимвилин кIвалах вичин хайи райондин са шумуд школада давамарна.

КIвалахдал рикI хьуниз ва адан тешкилатчивилин алакьунриз килигна Ибадуллагь Гьажимирзоевич ВЛКСМ-дин Мегьарамдхуьруьн райондин райкомдин 1-секретарвиле, са тIимил вахтундилай ВЛКСМ-дин Дагъустандин обкомдин секретарвиле хкяна.

1965-йисуз ада КПСС-дин ЦК-дин патав гвай Высший партийный школада кIелна. Гуьгъуьнлай ДАССР-дин Министррин Советдин патав гвай радиовещанидин ва телевиденидин комитетдин председателдин заместителвилин къуллугъ кьиле тухвана.

1966-1970-йисара И. Гь. Тагьирова Мегьарамдхуьруьн райондин Советдин исполкомдин председатель яз кIвалахна.

1970-йисуз ам КПСС-дин Дагъустандин обкомдин культурадин отделдин заведующийвиле тайинарна.

1973-йисан декабрдин вацра Сулейман-Стальский райондин коммунистри чпин партийный конференциядал Ибадуллагь Гьажимирзоевич КПСС-дин райкомдин 1-секретарвиле хкяна.

Вичин тешкилатчивилин алакьунар себеб яз адалай куьруь са вахтунда райондин экономикадин ва культурадин гзаф месэлаяр гьялиз алакьна. КьетIен фикир кадрийрин месэладиз, жегьилар райондин гьар йикъан кIвалахрал желб авуниз, райондин экономикадин бине тир хуьруьн майишат вилик тухуниз гуз хьана.

Виниз тир дережадин тешкилатчиди вич райондин кьиле акъвазай йисара колхозрикай совхозар арадал гъана, чIехи хуьрера кьилдин совхозар тешкилна. И. Гь. Тагьирован теклифдалди совхозра 100 гектарралди цIийи уьзуьмлухарни багълар кутуна, техилар, салан майваяр цазвай майданар артухарна, малдарвал вилик тухвана.

Куьруь са вахтунда райондин центр тир Кьасумхуьрел Культурадин Дворец, 3 мертебадин административный дарамат, Гуьргенчай вацIал цIийи муьгъ, «Рычал-су», консервиярдай заводдин производстводин дараматар, гзаф совхозра типовой къайдадин малдарвилин фермаяр ва маса дараматар эцигна.

КьетIен фикир ада райондин культурадин месэлайриз гуз хьана. Адан чалишмишвилер себеб яз гьар йисуз СтIал Сулейманан поэзиядин Йикъар чIехи сувар яз кьиле тухуз хьана.

Вичин уьмуьрдин савадлу ва бегьерлу 1973-1983-йисар И. Гь. Тагьирова чи райондиз бахшна.

Адан гьуьрметдай ва чи райондин вилик лайихлувилерай райондин Культурадин Дворецдиз адан тIвар ганва.

1984-1988-йисара И. Гь. Тагьирова кинофикациядин рекьяй ДР-дин госкомитетдин председатель яз кIвалахна, ам гьакI ДР-дин Гьукуматдин членни тир.

Лайихлу пенсиядиз экъечIдалди вилик, 1988-1994-йисара, ада республикадин общественно-политический «Коммунист» (гилан «Лезги газет») газетдин кьилин редактор яз кIвалахна.

Вичин уьмуьрдин эхиримжи йисара ада ДР-дин федеральный казначействодин управленида кIвалахна. Адаз халкьдин патай еке гьуьрмет ва авторитет авай.

Гзаф йисарин намуслу зегьметдай адаз гьукуматдин гзаф наградаяр ганвай: «Зегьметдин Яру Пайдах», «Гьуьрметдин Лишан» орденар, «За трудовое отличие», «За доблестный труд» ва гьакIни са жерге юбилейрин медалар, Гьуьрметдин грамотаяр, лайихлу тIварар.

И. Гь. Тагьиров КПСС-дин 25-съезддин делегатни тир. Ам са шумуд сеферда ДАССР-дин Верховный Советдин депутатвилени хкянай.

Вичин уьмуьрдин юлдаш Багьадатахъ галаз санал Ибадуллагь Гьажимирзоевича 4 аял ( са гадани 3 руш) хвена, чIехи авуна. Абурухъ виридахъ кьилин чирвилер ва чпин хизанар ава.

Вичин савадлу вири уьмуьр баркалла алаз тухвай И. Гь. Тагьирован тIвар ва адан экуь къамат гьамишалугъ яз чи рикIера амукьда.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

7