Хуьруьн майишатдин ярмарка хьана

Санкциядин шартIара Дагъустанда дурумлу экономика вилик тухун таъминарунин Оперативный штабдин къарардихъ галаз кьадайвал ярмаркайрин марафон башламиш хьанва. Дагъустан Республикадин хуьруьн майишатдин ва суьрсетдин министерстводин тереф хуьналди, хуьруьн майишатдин ярмарка Сулейман-Стальский райондин администрациядини тешкилна. Ярмаркадин павильонар ва прилавкаяр Кьасумхуьруьн кьилин майдандал ачухнавай.

Чпи гьасилнавай продукция Сулейман-Стальский, гьакIни Ахцегь, Кьурагь, Леваша ва Мегьарамдхуьруьн районрин 20-далай виниз агропромышленный, лежбервилинни фермервилин ва хсуси куьмекчи майишатри гъанвай. Агьалийриз якIунни некIедин, балугъчивилин продукция, емишар, салан майваяр, консервияр, гъуьр, чIахар, вирт ва маса няметар къачудай мумкинвал хьана. Къиметарни базардинбурулай 10-15 процентдин ужуз тир.

Фермервилин продукция маса гузвай «Муг» карханади, мисал яз, чпи гьасилзавай са шумуд жуьре ниси, цIийиз тешкилнавай «АлиЯк» агрокарханади мадни нек ва чIем гъанвай.

Ярмаркада Сулейман-Стальский райондин Кьил Нариман Абдулмуталибова, райадминистрациядин Кьилин 1-заместитель Лацис Оруджева, УСХиП-дин ва маса къурулушрин векилри иштиракна.

Райондин Кьил Нариман Абдулмуталибова, саки вири шейэр маса гузвай чкайриз килигайдалай гуьгъуьниз, ярмарка тешкилай къайдадиз хъсан къимет гана.

Техил, къуьл, шекер ва маса продукция маса гузвай «Лидер» центрадин руководителди Рамазандин вацран вахтунда вири шейэр, вичиз алатзавай пул-къазанжи алачиз, гьа хкай къиметрай маса гуда.

Райондин Кьил Нариман Абдулмуталибова ихьтин баркаллу кIвалахдай адаз чухсагъул лагьана ва алава хъувуна: «Къуй Сад тир касди Куь хъсан крар кьабулрай ва артухаррай!».