Меню
6+

Сайт «Кюре»

13.05.2022 10:19 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Абурун кьегьалвилер, экуь къаматар рикIера ама

Алиев Али Агьмедович

Али Алиев 1909-йисан 24-сентябрдиз Кьасумхуьрел дидедиз хьана. Ада школа, гуьгъуьнлай Москвадин военно-химический академия, 1-разряддин инженер-химикдин чинда аваз, акьалтIарна. Ам запасда авай кьилдин химический ротадин командирвиле тайинарна. Гуьгъуьнлай А. Алиева Московский областдин Сталиногорск шегьерда производстводин рекьяй инженервиле, 1934-йисалай 1937-йисалди Азербайжанда Бакудин химический заводда кьилин инженервиле ва директорвиле, 1937-йисалай 1941-йисалди Азербайжандин илимрин академиядин химический институтдин филиалдин директордин заместителвиле ва преподавателвиле, 1941-1945-йисара 3-рангдин чинда аваз, Дагъустандин гьавадай жедай гьужумдиз къарши оборонадин министерстводин начальникдин заместителвиле кIвалахна.

Лагьана кIанда, Али Агьмедовича вич фронтдиз ракъурунин патахъай са шумудра арзаяр кхьена. Амма, виниз тир пешекарвилин дережа авай ксар чкайрал герек я лагьана ам фронтдиз ракъурнач.

Дяведилай гуьгъуьниз Али Алиев Кьасумхуьрел хтана, ам райондин халкьдин контролдин председателвиле тайинарна, гьа са вахтунда ада дяведин къуллугъчийрин хизанар таъминарунин рекьяй КПСС-дин РК-дин отделдин заведующийдин везифаярни тамамарзавай. Гуьгъуьнлай А. Алиева Дагъустандин обкомдин промышленный отделда инструкторвиле, КПСС-дин райкомдин 2-секретарвиле кIвалахна.

1955-йисалай Али Агьмедовича Агъа-СтIалрин, Кьасумхуьруьн йифен школайрин директорвиле ва гуьгъуьнлай хейлин йисара Кьасумхуьруьн юкьван школада муаллимвиле кIвалахна.

Али Алиевахъ «Германиядин винел гъалиб хьунай», «1941-1945-йисара намуслу ва дурумлу зегьметдай», «Кавказ оборона авунай», «Ватандин ЧIехи дяведин Гъалибвилин 10,20,30, 40, 50 ва 60 йисарин медалар, ДАССР-дин Верховный Советдин Президиумдин Гьуьрметдин грамота авай.

Алиев Али Агьмедович 2007-йисуз рагьметдиз фена.

Абдулаев Рамазан Абдулаевич

Р. А. Абдулаев 1909-йисуз Дагъустандин областдин Куьре округдин Кьулан-СтIалрин хуьре дидедиз хьана. Ада хайи хуьруьн ва Дербентдин школайра кIелна, 1930-йисуз Дербент шегьерда педагогвилин кьве йисан курсар акьалтIарна. Са йисуз Кьасумхуьруьн (гила Хив райондин) Кашанхуьруьн сифтегьан школадин заведующийвиле, гуьгъуьнлай Табасаран райондин СиртычIрин школадин заведующийвиле кIвалахна.

1936-йисуз Дагпединститутдин тарихдин факультет акьалтIарай Р. Абдулаев, ДАССР-дин наркомпросдин направленидалди, Кьулан-СтIалрин ирид йисан школадин директорвилиз ракъурна.

1942-йисан 20-мартдиз Р. Абдулаеваз армиядин жергейриз эвер гана. 1942-йисан декабрдиз Тбилиси шегьерда военно-политический курсар акьалтIарай ам фронтдиз ракъурна.

Р. Абдулаева Южный, Степной ва Украинадин фронтрин составра аваз политикадин рекьяй батареядин командирдин заместитель, взводдин командир яз женгера иштиракна, кьегьалвилер къалурна.

1945-йисан декабрдин вацра, старший лейтенантдин чинда аваз, Р. Абдулаев Ватандиз хтана. Адан хурудал Ватандин ЧIехи дяведин II-дережадин, «Красная Звезда» орденар, «Германиядин винел гъалиб хьунай» медаль алай.

Дяведилай гуьгъуьниз Р. Абдулаева Кьасумхуьруьн ва Кьулан-СтIалрин школайра директорвиле ва тарихдин муаллимвиле бегьерлувилелди кIвалахна. Намуслу зегьметдай адаз «Знак Почета» орден, са шумуд медаль гана.

Фетиев Насрулагь Мамеевич

Н. М. Фетиев 1924-йисан 5-майдиз ДАССР-дин Куьре округдин Кьасумхуьруьн райондин ЦIарах хуьре дидедиз хьана. Школадилай гуьгъуьниз педучилище акьалтIарна, муаллимвиле кIвалахна.

1943-йисан апрелдин вацра гуьгьуьллувилелди Советрин армиядин жергейриз фена. Ам артиллерист тир. 1944-йисуз Кишиневдин патав кьиле фейи женгина Н. Фетиевал залан хер хьана. Тирасполдин госпиталда сагъар хъувурдалай гуьгъуьниз мад фронтдиз хъфена. 1-Украинадин, Карелофинский, 2-Украинадин фронтрин составда аваз викIегь дагъвиди Харьков, Днепропетровск, Кривой Рог, Ново-Одесса, Румыния, Польша азад хъувун патал кьиле фейи женгера иштиракна, кьегьалвилер къалурна. Гуьгъуьнлай Н. Фетиева Лодзь шегьерда 30-погранполкуна къуллугъна.

1946-йисуз Н. Фетиев кIвализ хтана. Ам Дербентда НКВД-да кIвалахал акъвазна.

1946-йисалай та 1987-йисалди Насрулагь Мамеевича Цмуррин 7 йисан, Асалдхуьруьн сифтегьан, Вини-СтIалрин 7 йисан ва Кьасумхуьруьн юкьван школайра муаллимвиле ва директорвиле кIвалахна.

Насрулагь Фетиевахъ Ватандин ЧIехи дяведин II-дережадин орден, «Жукован медаль», «Германиядин винел гъалиб хьунай», «И. В. Ленинан 100 йис», Ватандин ЧIехи дяведин Гъалибвилин 20, 30, 40, 50 ва 60 йисарин юбилейрин медалар, «Фронтовик 1941-1945гг.» значок авай.

Н. Фетиев 2004-йисуз рагьметдиз фена.

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

13