Меню
6+

Сайт «Кюре»

13.05.2022 10:21 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Сердер Сердеров - «Актобе» командада

Футболдал рикI алайбуруз ери-бине Эминхуьряй тир Сердер Сердерован тIвар лап хъсандиз таниш я. Сифтедай адакай Россиядин чемпионатда премьер-лигада Москвадин ЦСКА командада къугъвадайла хабар хьана. Гьужумдайди тир ада уьлкведин жаванрин хкянавай командадик квазни гзаф турнирра вичин алакьунар къалурна.

Сердера сифтедай вердишвилер Махачкъалада республикадин жаванрин олимпийский резервдин школада къачуз башламишна. Алакьунар авай жавандиз Москвадиз, машгьур ЦСКА командадиз теклифна. Адан составда аваз С. Сердерова са шумуд сезондиз вичин алакьунар къалурна ва устадвал хкажна.

Махачкъаладин «Анжи» командадиз меценат Сулейман Керимова къаюмвал ийиз башламишайла, аниз Россиядин ва къецепатан уьлквейрин машгьур футболистриз, гьабурукай яз Роберто Карлосаз, Это-О-диз, Буссуфадиз, Габуловаз, Траоредиз ва масабуруз теклифна. «Анжидиз» теклифай футболистрин арада Сердер Сердеровни авай. Уьлкведа ва дуьньяда машгьур футболистрин арадани Сердер Сердеров чукурунин йигинвилелди, кьетIен техникадалди, маса командайрин варариз тупар ягъуналди тафаватлу тир. Гьайиф хьи, пулунин такьатар гудай кас амукь тавур «Анжи» командадин гьаларни четин хьана, машгьур футболистар маса командайриз хъфена.

Махачкъаладин «Анжи» командадилай гуьгъуьниз С. Сердеров, жуьреба-жуьре йисара «Урал» (Екатеринбург), «Крылья Советов» (Самара), «Енисей» (Красноярск), гьакIни Польшадин «Краковия», Болгариядин «Славия», Хорватиядин «Интер» ва «Истра-1961», Венгриядин «Мезёкёвешд» командайра къугъвана.

Алай вахтунда Сердер Сердеров Къазахстандин «Актобе» командада къугъвазва. И команда уьлкведин чемпионатда 8-чкадал ала. «Актобе» командадин руководстводи ва тренерри Сердер Сердеровак еке умудар кутунва.

Вахъ цIийи командада еке агалкьунар хьурай, гьуьрметлу Сердер Сердеров!

Хазран Кьасумов

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

16