Меню
6+

Сайт «Кюре»

05.05.2022 11:04 Четверг
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Гьаким Къурбан: «Салам, Цмур!»

Мукьвара вичиз Дагъустандин халкьдин писатель лагьай тIвар ганвай Гьаким Къурбан (Къурбан Акимов) РФ-дин писателрин Союздин член, филологиядин илимрин доктор, гзаф кьадар повестрин, гьикаяйрин, очеркрин, 12 романдин, учебникрин автор я.

Яшар Аллагьдилай, кьуьзуьвал жувалай аслу я, лугьузва камаллу мисалда. Яшаризни, кIвалахдин жигьетдай хиве авай жавабдар везифайризни килиг тавуна Гьаким Къурбана гьам илимдин, гьамни яратмишунрин рекье бегьерлувилелди кIвалах авун давамзава.

Мукьвара «ЦIийи Кавказ» издателрин дестеди ва Кьасумхуьрел кардик квай «Куьредин ярар» культурадин центради машгьур писателдин – алимдин цIийи ктаб – «Салам, Цмур!» чапдай акъудна.

Лагьана кIанда, ДГУ-дин тарихдинни филологиядин факультет акьалтIарай Гьаким Къурбана 1961-йисалай эгечIна, са шумуд йисуз Цмуррин школада муаллимвиле кIвалахнай.

- За Цмурдал муаллимвиле кIвалахдайла, чандафтар – дневник гъиле кьуна: юкъуз акур-такур, ван хьайи-тахьай агьвалатар, дуьшуьшар, авур фикирар нянрихъ куьрелди кхьиз эгечIна. Исятда зи гъиле 67-нумрадин чандафтар ава. «Салам, Цмур!» делилрин повесть кхьидайла, за чандафтаррикай менфят къачузва: гьар са агьвалат хьайи йисар, варцар ва йикъар къалурзава», — кхьенва Гьаким Къурбана вичин сифте гафуна.

Гьакъикъатдани, Гьаким Къурбанан цIийи ктабда гьатнавай повесть тарихдинни художественный эсер я. Ам автордин мецелай кхьенва. Повестда ХХ-асирдин 2-паюнин Куьредин хуьрерин яшайиш, адетар, агьвалатар ва дуствилин алакъаяр къалурнава. Гьерекатар Цмурдал, Векьелрал, Кьасумхуьрел, Сардархуьре, Махачкъалада, Москвада ва маса чкайра кьиле физва. Игитар гьакъикъатда хьайи, тарихда чпин гелер тунвай баркаллу инсанар я.

ЦIийи ктабда гьатнавай повесть «Салам, Цмур!», «Кьисмет хьайи мектеб», «Цмурдал рекье», «ГъвечIи Париж», «Сейфудин муаллимдиз мугьманвиле», «Сардархуьруьн кимел», «А чIаван адетрикай, гьуьрметрикай», «СтIал Сулейманан музейдиз сиягьат», «Генерал-майор Шайдаев Мегьамед-Гьанифа…», «Генералди хайи хуьр рикIел хкизва», «Шайдаеври Цмуррин хуьр аваданламишзава», «Мергьеметлувилин дараматар» — санлай 32 кьиликай ибарат я.

Повесть Гьаким Къурана ихьтин келимайралди акьалтIарзава: «… Цмурар – за сифте кIвалахай, за фу тIуьр ва жуван зегьметдиз къимет жагъай адалатлу, медени, гуьзел хуьр. Зун Цмурдал гьар сеферда, жуван хайи хуьруьз хьиз, «Салам, Цмур!» — лагьана, хквезва.

Завай жуван повестдик чандафтарра авай кьван вири агьвалатар, шикилар ва гьиссер кутаз хьанач: гьар са цмурви са эсер кхьиниз лайихлу я. Салам, Цмур!».

ЦIийи ктабда Цмуррин хуьруьхъ галаз алакъалу шикиларни ганва.

90 чиникай ибарат тир Гьаким Къурбанан «Салам, Цмур!» ктабдин тираж 300 экземпляр я.

Хазран Кьасумов

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

7