Пешедиз вафалуди, виридаз гьуьрметлуди

Инсанар, абурун къилихар хьиз, пешеярни гьар жуьре я. ГъвечIи чIавалай рикI алай пешедин иеси хьайи касдихъ кIвалахдани хъсан нетижаяр, агалкьунар жеда. Англиядин писатель, тарихчи Томас Карлейлла гьахълудаказ къейдни авунва: «- Жуван пеше, кар жагъайди хушбахтлу я; къуй ам мад лезетлу кардихъ къекъуьн тавурай. Адахъ вичин кар ва уьмуьрдин макьсад ава». Вичин кар жагъанвай, датIана уьмуьрдин макьсад намуслувилелди тамамарунихъ ялзавай, пешеди руьгьдин таъминвал гузвай инсанрикай яз завай алай вахтунда Сулейман-Стальский райондин центральный больницадин поликлиникада врач-терапевт яз кIвалахзавай Мумина Фуадовна Абдуллаевадин тIвар кьаз жеда.

Тамам 42 йисан къене здравоохраненидин хиле намуслудаказ зегьмет чIугвазвай, гьам пешедиз, гьамни Гиппократан кьинез вафалувал къалурзавай, хиве авай везифаяр уьзуьагъдаказ кьилиз акъудзавай Мумина Фуадовнадикай макъала кхьидайла рикIел Туьркиядин шаир Надым Хикметан гафарни къвезва: «Ашкъидалди кIвалахал физвай ва шадвилелди кIвализ хквезвай инсан бахтлу кас я».

Вичиз гьам райондин агьалийрин, гьамни кIвалахдин юлдашрин патай лайихлу гьуьрмет авай Мумина Абдуллаевадихъ галаз авур ихтилатрай малум хьайивал, духтур хьунин мурад адахъ школада кIелзавай йисарилай авай. Кьасумхуьруьн юкьван школа акьалтIарай Мумина, рикIе авай мурад кьилиз акъудун патал, Дагъустандин государственный медицинадин институтдин лечебный факультетдик экечIна, 1980-йисуз анаг хъсан чирвилер аваз акьалтIарна.

Жегьил пешекарди 1980-йисан 4-августдилай 1982-йисан 19-октябрдалди Чечено-Ингушский АССР-дин Грозный шегьердин 4-нумрадин больницада терапиядин рекьяй духтур ва Гудермес шегьердин ЦРП-да духтур-терапевт яз кIвалахна.

Гуьгъуьнлай (1982-йисан октябрдиз) Мумина Фуадовна хайи райондиз хтана, вичин рикI алай пешедай кIвалах авун давамарна. Кьилди къачуртIа, М. Абдуллаевади 1982-йисан 25-октябрдилай эгечIна райондин центральный больницада жегьилрин кабинетдин духтур-терапевтвиле (1987-йисалди), 3-нумрадин участокда духтур-терапевтвиле, хизандин духтур-терапевтвиле (ВОП), 1998-йисан 1-декабрдилай 2017-йисан декабрдалди ЦРБ-дин кьилин духтурдин заместителвиле, врач-терапевтвиле ва 2017-йисан декабрдилай 2022-йисалди медицинадин хиляй ЦРБ-дин кьилин духтурдин заместителвиле кIвалахна.

Алай вахтунда Мумина Фуадовнади ЦРБ-дин поликлиникада духтур-терапевт яз зегьмет чIугвазва.

Гьелбетда, виридаз малум я хьи, духтурдин кIвалах регьятди туш. Инал чна гъайи «кIвалахзава», «зегьмет чIу-гвазва» гафарин далдадихъ Мумина Абдуллаевади ахвар тавур йифер, кьарай квахьай йикъар гзаф гала, духтурвиле кIвалахзавай йисара ада цIудралди инсанрин сагъламвал мягькемар хъувуна, шумудни са кас ажалдин къармахрай акъудна.

Мумина Фуадовнадин намуслу зегьметдин гьакъиндай адаз ганвай наградайри ачухдиз шагьидвал ийизва. ИкI, кьилин категория авай духтур «Дагъустан Республикадин лайихлу духтур» тIварцIин (2012-йис), «Дагъустандин дишегьлийрин Союз» региондин общественный организациядин (2020-йис), коронавирус чукIунин вилик пад кьуник ва и азардик начагъбур сагъар хъувуник еке пай кутунай Дагъустан Республикадин Кьил Владимир Васильеван (2020-йис), Дагъустан Республикадин здравоохраненидин министерстводин патай (2020-йис) ганвай Чухсагъулдин чарарин ва Гьуьрметдин грамотайрин сагьиб я.

- Начагъ яз больницадиз атана, сагъ хъхьана кIвализ хъфей гьар са кас зун патал виридалайни чIехи награда я, — лугьузва Мумина Фуадовнади.

Лагьана кIанда, ЦРБ-диз фейила чаз аниз хуьрерай атанвай инсанрихъ галаз Мумина духтурдикай рахадай мумкинвални хьана. Кьилди къачуртIа, Э. Эмирбековади (Чуьхверхуьр), Р. Нагъиева (Эминхуьр), А. Мегьамедовади (КIварчагъ дере), М. Тагьирова (ЦIийи Макьар) ва масабуру Мумина Фуадовнадин гьакъиндай чаз разивилин келимаяр лагьана.

- Гьакъикъатдани, Мумина Фуадовна районда медицинадин лап хъсан пешекаррикай сад я, — лагьана чаз райондин центральный больницадин кьилин духтурдин заместитель – поликлиникадин заведующий Мевлидин Алиомарова. – Хуьрерин агьалийри хьиз, адан кIвалахдилай больницадин руководстводини разивал ийизва.

Вахъ мягькем сагъламвал, кIвалахда агалкьунар ва ви гъиликайни кефсуз яз больницадиз къвезвай гьар са касдиз куьмек хьурай, гьуьрметлу Мумина Фуадовна!

Текст кхьейди ва шикил ягъайди Хазран Кьасумов я