Важиблу месэлайриз килигна

20-июндиз райондин Кьил Саид Темирханован регьбервилик кваз райадминистрациядин аппаратдин совещание кьиле фена. Анал яшайишдин важиблу объектрал ремонтринни эцигунрин серенжемар ва комплексдин кадастровый кIвалахар кьиле тухузвай гьалдихъ галаз таниш хьана.

Анал алай важиблу месэлайрикай сад тир чпихъ артуханвал авай уьлкведин, республикадин ва муниципальный программаяр уьмуьрдиз кечирмишунин жигьетдай авай гьалдикай УКС-дин начальник Роберт Мейланова гегьенш информация гана.

ИкI, ада къейд авурвал, «Комплексное развитие сельских территорий» госпрограмма уьмуьрдиз кечирмишунин сергьятра аваз, Агъа-СтIал Къазмайрал цIийи школа эцигунин кIвалахар акьалтIарнава. Алай вахтунда и объектдал анаг дуьзмишунин, аваданламишунин кIвалахар кьиле тухузва. ГьакIни Вини СтIалдал ва Кьулан СтIалдал мини-футболдин майданар туькIуьрна куьтягьнава, КIахцугъиз ва Эминхуьре са микрорайондиз тIебиатдин газ тухвана.

Кьасумхуьрел цин линияр тухуникай рахайтIа, алай вахтунда резервуаррилай къвезвай яд тухудай турбаяр кутазва ва гьакIни са жерге куьчеяр къайдадик кутан хъийизва.

Республикадин инвестицийрин программадай ДаркIуш-Къазмайрал аялрин ясли-бахчадин дарамат, Герейханован хуьруьн 2-нумрадин школа эцигунин кIвалахар кьиле тухузва, гьакIни ЦIийи Макьарал ва Курхуьрел цин линияр тухузва.

И программадай эцигунрин кIвалахар алай йисан эхирдалди акьалтIарда. И программадай гьакIни «Сардаркент-Даркуш-Казмаляр» магистральный водопровод тухунин эхиримжи кIвалахарни акьалтIарда. Кьулан СтIалдал цин линиярни тухун фикирдиз къачунва.

«Комфортная городская среда» федеральный программадай «Жилье и городская среда» милли проектдин бинедаллаз Агъа-СтIалдал, Вини-СтIалдал ва Сийидрин хуьре общественный территорияр аваданламишда, ДР-дин Минздравдин патай Бутхуьре ва Зизика здравоохраненидин объектар эцигда.

«Мой Дагестан – мои дороги» проектдай Агъа-СтIал Къазмайрин, Кьулан-СтIалрин, Экенрин, КIварчагърин, КIахцугърин, Эминхуьруьн са жерге рекьер ремонт ийида.

Гъиле авай йисуз райондин умуми образованидин 4 школада капитальный ремонтар кьиле тухузва. Ада са жерге маса делилар гъана.

Райондин Кьил Саид Темирханова и жигьетдай са бязи баянар гуналди, эцигунринни ремонтрин кIвалахрин еридал ва вахтарал амал авун чарасуз тирди къейдна.

Гуьгъуьнлай анал рахай УМИЗ-дин директор Назир Гьасанова райондин 10 кварталда комплексный кадастровый кIвалахар кьиле тухун тешкилнавай гьалдал акъвазна.

Ада къейд авурвал, и кIвалахар анжах Испикрин хуьруьн поселенидин сергьятда кьиле тухуз эгечIнава. Чуьлдин кIвалахар акьалтIарайла пешекарри кIватIнавай делилар садахъди авунал ва гекъигунал машгъул жеда. Ихьтин серенжемар мукьвара амай чкайрани кьиле тухуз башламишда. И кIвалахар кьиле тухудалди виликамаз пешекарри аэросъёмкаяр авун патал ихтиярар къачун герек я.

И месэладай анал алава куьруь информацияр гваз Кьасумхуьруьн ва Уллу-Гъетягърин хуьрерин поселенийрин администрацийрин кьилер рахана.

Эхирдай райондин Кьил Саид Темирханова профильный къуллугърин пешекарриз эменнидин ихтияр тайинардай документар гьазурунин важиблувиликай халкь хабардар авунин тапшуругъ гана.