Меню
6+

Сайт «Кюре»

15.07.2022 09:57 Пятница
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Проектри хъсан дуьзмишвал арадал гъизва

Рехъ физвай касди атIуда, лугьузва бубайрин мисалда. Яшайишдин, экономикадин, культурадин ва маса рекьерай виликди физвай Сулейман-Стальский райондани эхиримжи йисара тарифдин гзаф крар, кIвалахар, агалкьунар хьанва. Инвестицияр желб авунай, багълар кутунай, гьасилзавай хуьруьн майишатдин продукциядин кьадар артухарунай район республикада вилик жергейра авай муниципалитетрик акатзава. Вири и ва хъсанвилихъ хьанвай маса дегишвилериз районда гьукуматдин, республикадин ва чкадин проектар уьмуьрдиз кечирмишуни екедаказ куьмек гузва.

Райондин капитальный эцигунрин управленидин начальник Роберт Мейлановахъ галаз и месэладай авур ихтилатрай малум хьайивал, районда проектар уьмуьрдиз кечирмишуникди общественный цIийи дараматар, спортдин, образованидин, здравоохраненидин объектар эцигзава, авай объектар капитальнидаказ ремонт хъийизва, общественный территорияр, рекьер, куьчеяр гьар са куьнив хъсандиз дуьзмишзава.

Вичин гафарин гьахълувал тестикьарун яз Роберт Мейланова чаз са шумуд мисални гъана. ИкI, «Комфортная городская среда» милли проектдай районда общественный 3 территория: Агъа-СтIалрин, Вини-СтIалрин ва Сийидрин хуьрерин гъвечIи багълар-скверар гьар са куьнив хъсандиз дуьзмишзава. Агъа-СтIалрин ва Вини-СтIалрин хуьрера скверар дуьзмишунин асул кIвалахар акьалтIарнава.

Икьрарнамадихъ галаз алакъалу яз Сийидрин хуьре сквер дуьзмишунин кIвалахар 2022-йисан октябрдин варз алукьдалди акьалтIарда.

Вири и кIвалахар пулуналди таъминарунин умуми кьадарди 5979677 манат тешкилзава.

КIвалахрин подряддин организация «МЕДЖИК-СТРОЙ-ТРАНС-СЕРВИС» ООО, заказчикни Сулейман-Стальский райондин администрациядин «Управление капитального строительства» МБУ я.

Мадни, райондин капитальный эцигунрин управленидин начальник Роберт Мейланова чаз лагьайвал, алай йисуз «Безопасные и качественные автомобильные дороги» милли проектдай «Мамрач-Ташкапур-Араканский мост» автомобилрин рекьин 10 км. + 15 км. участок (Агъа-СтIал Къазмайрин хуьруьн юкьвалай Кьасумхуьруьн цIийи муькъуьв кьван) 5 километрдин яргъивал аваз капитальнидаказ ремонт хъувун фикирдиз къачунва.

Алай вахтунда проектдиз экспертизадин рази тирвилин заключение къачунва, материалар аукцион тухуниз гьазурзава.

Районда республикадин «Местные инициативы» проектдайни еке кIвалах тухузва.

Лагьана кIанда, алай йисуз и проектда иштиракун патал Дагъустан Республикадин экономикадин ва территорияр вилик тухунин министерстводи документар кьабулиз башламишнавайдакай хабар ганва. И проект регионда 2019-йисалай уьмуьрдиз кечирмишзава. Адан метлебни чкадин самоуправленидин органрин ва общественный инфраструктура вилик тухунин месэлаяр гьялунин карда агьалийрин тереф хуьникай ибарат я.

2022-йисуз «Местные инициативы» проект уьмуьрдиз кечирмишун патал республикадин бюджетдик 400 миллион манат пул кутунва. Проектдиз кьилин шартIни ава: муниципальный бюджетдай ва меценатрин такьатрин гьисабдай пулуналди куьмек гун.

«Местные инициативы» проектдин сергьятра аваз алай йисуз районда 6 объектдал кIвалахар тамамарда. ИкI, Эминхуьре «Культура вилик тухунин гзаф везифайрин» (виликан совхоздин конторадин, гуьгъуьнлай сифтегьан школадин 2 мертебадин) дарамат капитальнидаказ ремонт хъийида, Кьулан СтIалрин хуьре парк гьар са куьнив хъсандиз дуьзмишда, Хтунрин хуьре аялрин майдан туькIуьрда, ДаркIуш-Къазмайрал Карьерная, Экенрин хуьре Центральная куьчейра къир цада, Цмуррин хуьре гъвечIи багъ-сквер гьар са куьнив хъсандиз дуьзмишда.

Чун «Местные инициативы» проектдай кIвалахар кьиле тухун пландик кутунвай хуьрерин поселенийризни фена.

- Чи хуьре са шумуд проектдай кIвалахар тухванва ва и кар давамни ийида, — лагьана чаз ДаркIуш-Къазмайрин хуьруьн поселенидин администрациядин кьил Жабраил Керимова. – Мисал яз, икьван чIавалди хуьруьн ругуд куьчеда къир цанва. «Местные инициативы» проектдай алай йисуз къир цун планламишнавай Карьерная куьчедин яргъивал 650 метр я. И куьчеди чи хуьр Дербент райондин ЛукIварин, Мегьарамдхуьруьн райондин Агъа-Хъартасрин ва Гуьлгери вацIун эрчIи пата авай Мегьарамдхуьруьн райондин маса хуьрерихъ галаз алакъалу ийизва. Идалайни гъейри, и куьчедин кьве патани яшайишдин цIийи кIвалерни арадал атанва. Алай вахтунда чна куьче къир цадай гьалдиз гъунин кIвалахар кьиле тухузва. КIвалахрин подрядчикдихъ галазни вири месэлаяр гьялнава.

Чаз акурвал, хуьре аялрин майдан эцигнава, анаг герек вири тадаракралди таъмин я.

ДаркIуш-Къазмайрал алатай йисан гатуз эцигиз эгечIай аялрин бахчадин кьве мертебадин дараматдални хейлин кIвалахар кьиле тухвана акьалтIарнава. Аялрин бахча алай йисан эхирра ишлемишиз вахкун планламишнава.

Хуьре ДР-дин образованидин ва илимдин министерстводин рекьяй мини-футболдин майдан эцигунин кIвалахарни хъсан еришар аваз кьиле тухузва.

Чун «Местные инициативы» проектдин сергьятра аваз Кьулан-СтIалрин хуьре гьар са куьнив хъсандиз дуьзмиш хъийидай паркунизни фена. И парк халис тамун зулуниз ухшар я, ам хуьруьн кIанихъай саки «Пуд булахрик» кьван яргъивал аваз экIя хьанва. Паркунин юкьва, плитаяр туна, инсанар къекъведай гегьенш тротуар туькIуьрнава, ана скамейкаяр эцигнава, аялрин ва воркаут майданар тадаракламишнава, эквер тунва. Проектдай анаг мадни хъсандиз дуьзмиш хъийида.

«Местные инициативы» проектдай чна винидихъ тIвар кьур Эминхуьре авай 2 мертебадин дараматдални ремонтрин кIвалахар башламишнава.

Чна винидихъ тIвар кьур ва маса проектрай, гьакIни федеральный ва республикадин программайрай райондин саки вири хуьрерин поселенийра дуьзмишунин, аваданламишунин, агьалийриз къулайвилер яратмишунин рекьерай гзаф кIвалахар кьиле тухузва, хъийиз пландик кутунвай кIвалахрин кьадарни тIимил туш. Вири и кIвалахар райондин Кьил Саид Темирханован кьетIен ва гьар йикъан гуьзчивилик ква. Ам мукьвал-мукьвал хуьрериз, эцигунрин, ремонтрин кIвалахар тухузвай чкайрал физва, кIвалахар тешкилнавай гьалар ахтармишзава, кIвалахар вилик тухуниз гьар са патахъай куьмекар гузва.

Са рахунни алачиз, уьмуьрдиз кечирмишзавай проектри, гъиле кьунвай ва фикирдиз къачунвай кIвалахри районда хъсан дуьзмишвал арадал гъида.

Хазран Кьасумов

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

4