Меню
6+

Сайт «Кюре»

29.07.2022 10:23 Пятница
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Агакьнавай бегьер кIватI хъийизва

ТIебиатдин къанун тирвал, са куьнизни килиг тавуна вахтуни гьамиша виликди еримишда. Гьар са вахтунизни вичиз хас лишанар, вичин кьетIенвилер ава. ИкI, тамамвилелди вичин ихтиярда гьатнавай гад хуьруьн майишатдин карханаяр, лежбервилинни фермервилин майишатар, арендаторар, хуьрерин зегьметчияр патал кIвалахрин къизгъин вахт я. ГьикI лагьайтIа, уьзуьмлухрани багълара, производстводин хилера агротехникадин серенжемар кьиле тухунихъ галаз санал, абурун вилик агакьнавай бегьер кIватI хъувунин жавабдар везифани акъвазнава. Алай вахтунда районда техилар, емишар, салан ва бустандин няметар кIватI хъийизва.

Райондин Кьил Саид Темирханов алатай гьафтеда райондин хуьруьн майишатдин са шумуд карханада ва арендаторрин участокра хьана, ада анра техилар ва маса няметар кIватI хъувунин кIвалахар кьиле физвай гьал ахтармишна.

Майишатриз фейила райондин Кьилихъ адан 1-заместитель Лацис Оруджев, хуьруьн майишатдин ва суьрсетдин управленидин начальник Къазиагьмед Къазиагьмедов, райондин Информагентстводин журналистар галай.

Чил менфятлувилелди ишлемишзавай, къецепатай къадагъаяр эцигнавай алай вахтунда дурумлу экономика арадал гъун патал кIвалахзавай хуьрерин поселенийрик Курхуьруьн поселение акатзава.

Райондин Кьил Саид Темирханов, жавабдар къуллугъэгьлиярни галаз, сифтедай арендатор Замир Шайдаеван къуьлуьн никIиз фена. Къизилдин ранг алай никIе гьам къуьлуьн, гьамни самун тарифдин бегьер авайди гьасятда виле акьазва.

Арендатордихъ 12 гектар къуьлуьн никIер ава. Анрай гад агудунал са комбайни ва техил дашмиш хъувунал «ГАЗ-53» маркадин машин машгъул тир. Пресс-подборщик галай тракторди самар туьквера кьазвай.

Арендатор Замир Шайдаева райондин гьакимриз лагьайвал, никIерай 50 тонндилай тIимил тушиз техил кIватI хъувун планламишнава. Техилни ири ва михьи я.

Райондин Кьил Саид Темирханов хуьруьн кьилихъ галай «Паласа» участокда авай арендаторрин никIеризни фена. ИкI, тежрибалу арендаторар тир Нарим Саругъланова ва Сефербег Шайдаева 36 гектарда техилар гьасилнава. Анра гад агудунал са комбайни машгъул тир. Къуьлуьн бегьерни писди туш.

Арендаторри райондин Кьилиз ва адахъ галай жавабдар къуллугъэгьлийриз лагьайвал, къуьл гьар са килограмм 14 манатдай маса гузва, муьштериярни ава. Амма арендаторрик-магьсулдаррик секинсзувал кутазвай месэлани ава. Амни самун алафдиз муьштерияр тахьун я. Арендаторар тир Замир Шайдаева, Сефербег Шайдаева ва Нарим Саругъланова лагьайвал, алатай йисара абурувай самун алаф, асул гьисабдай, Хив, Агъул ва Кьурагь районрин малдарвилин карханайри, агьалийри маса къачузвайди тир. ЦIинин йисуз абуруз самар кIанзавач, вучиз лагьайтIа, гьанра цIи векьер бул я.

- Самар ужуз къиметдай кьванни къачудайбур хьанайтIа, чаз гад агудай механизаторриз-комбанерриз гудай пул кьванни жедай, — лугьузва Сефербег Шайдаева.

Райондин гьакимри аредаторриз самар маса гунин патахъай са «рехъ-хвал» жагъурун хиве кьуна.

Лагьана кIанда, санлай къачурла, районда 1023 гектардай гад кIватI хъийизва. Алай вахтунда и кIвалахар эхиримжи гектарра кьиле тухузва. Юкьван гьисабдалди гектардин бегьерлувили 25-26 центнер тешкилзава.

НикIерай 400 тонндив агакьна самарни кIватIнава. Къейд авун лазим я хьи, райондин хуьруьн майишатдин карханайра, КФХ-ра, арендадин участокра емишар (670,5 гектардай), къарпузарни гатун халияр (105 гектардай), салан няметар (938 гектардай), картуфар ( 282 гектардай) кIватI хъувунни давам жезва.

Санлай къачурла, райондин Кьил Саид Темирханов ва адахъ галаз карханайризни майишатриз фейи жавабдар къуллугъэгьлияр районда гад агудзавай ва бегьерар кIватI хъийизвай гьалдилай рази яз амукьна.

Текст кхьейди ва шикилар ягъайди Хазран Кьасумов я

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

4