Рекьер цIийикIа туьхкIуьр хъийида
Райондин Кьил Саид Темирханова талукь къуллугърин пешекаррихъ галаз рекьерин майишатдин объектар капитальнидаказ ремонт ва цIийикIа туьхкIуьр хъувунин месэлаяр веревирдна.
Гуьгъуьнлай Саид Темирханов, райадминистрациядин Кьилин 1-заместитель Лацис Оруджев, капитальный эцигунрин управленидин начальник Роберт Мейлановни галаз, Курхуьрел фена, «Куркент-Карчаг-Сиртыч» автомобилрин рекьин участок капитальнидаказ ремонт хъувуниз гьазурнавай гьал ахтармишна.
ДР-дин транспортдин ва рекьерин майишатдин министерстводи тестикьарнавай серенжемрин сергьятра аваз 2022-йисуз ва гуьгъуьнин йисара Сулейман-Стальский райондин территориядал инфраструктурадин са шумуд объект капитальнидаказ ремонт ва цIийикIа туьхкIуьр хъувун пландик кутунва. Абурун жергеда «Куркент-Карчаг-Сиртыч» автомобилрин рекьин Курхуьруьн юкьвай фенвай участокни ава.
Лагьана кIанда, Сулейман-Стальский ва Табасаран районрин 4 хуьр алакъалу ийизвай рекьин и участок чIуру гьалда аваз гзаф йисар тир.
Райондин Кьил Саид Темирхановаз пешекарри лагьайвал, рехъ капитальнидаказ ремонт хъувуниз гьазур я, подряддин организация тайинардай конкурсдин къайдаярни акьалтIарнава. Мукьвал вахтара рекьин и участокда ремонтдин кIвалахар тухунив эгечIда.
Х. Гьажибалаев
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.