Меню
6+

Сайт «Кюре»

29.07.2022 10:15 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Зулунни хъуьтIуьн къайгъуйра – гатун йикъара

Дагъустан Республикадин Кьил Сергей Меликова 2022-йисан 22-июлдиз тухвай совещанидин протоколдихъ галаз кьадайвал, «Сулейман-Стальский район» муниципальный райондин администрациядин 173-нумрадин постановленидалди ЖКХ-дин (яшайишдинни коммунальный майишатар) 2022-2023-йисарин зулунни хъуьтIуьн сезондиз гьазурунин серенжемрин план ва социальный, ЖКХ-дин хилерин объектрал тухудай кIвалахрал гуьзчивалдай комиссиядин состав тестикьарнай.

Райондин Кьилин распоряженидалди ЖКХ-дин объектар зулунни хъуьтIуьн сезондиз гьазурунин рекьяй райондин штабни ва адан составни тестикьарна.

Райондин территориядал чимивилелди таъмин ийидай (теплоснабжающий) ва чимивилихъ галаз алакъалу тир (теплосетовой) организацияр алач. Райондин территориядал гзаф квартирайрин 17 кIвал ала. Яшайишдин и кIвалера дараматрин иесияр яз арада масад авачир идара авунин къайда (тегьер) хкянава.

Тухудай серенжемрин план ва комиссиядин состав галаз ракъурзавай чарни галаз Дагъустан Республикадин яшайишдин инспекциядиз ва талукь тир министерствойризни ведомствойриз рекье тунва.

Зулунни хъуь-тIуьн сезондиз гьазурвилер акунин кIвалахар кьиле физвай гьалдикай муниципальный райондин администрацияди гьар вацра садра ДР-дин энергетикадин министерстводизни малумат гузва.

Алай вахтунда тестикьарнавай пландихъ галаз кьадайвал ЖКХ-дин объектар зулунни хъуьтIуьн сезондиз гьазурунин жигьетдай кIвалахар тухузва. Кьилди къачуртIа, муниципальный райондин вири поселенийра, образованидин организацийра, здравоохраненидин ва культурадин идарайра цIаяр хъийидай сезондиз гьазурвилер аквазва. ИкI, образованидин организацийра цIаяр хъийидай къурулуш (система) къайдада тунин кIвалахар тамамарзава.

Агъа-СтIалрин СОШ-да газдин 6 котел гъили туькIуьрнавайбур я. Абур сертифицироватнавайбуралди дегишарунин лазимвал ава. Кьасумхуьруьн 1-нумрадин СОШ-да авай 2 котелдикай сад кIвалахдай гьалда авач.

Курхуьруьн 1-нумрадин СОШ-дин 2 котелдикай сад чIуру я, ам кIвалахдай гьалда авач.

Герейханован 2-нумрадин СОШ-дин 2-корпусдин цIаяр хъийидай котелни ремонт хъувунин чарасузвал ава, Вини-СтIалрин СОШ-да авай 2 котелдикай сад кIвалах жедай гьалда авач.

Хтунрин ва Пиперхуьруьн НОШ-риз газ гъанва, анра бугъадалди чимивал ийидай къурулуш кардик кутуна кIанзава.

Ичинрин ООШ арендада кьунвай дараматда ава, ана кIарасрин цIай хъувуна чимивал твазва.

Агъа-Хъартасрин ва Вини-Хъартасрин ООШ-ра документар гьазурнава, газдин къурулушдихъ акалдай ихтиярни къачунва, гила кIамайди газдин линиядихъ акалун я. КIахцугърин СОШ-да цIаяр хъийидай газдин пич ва счетчик къачунва, амма хуьруьн газопроводдиз газ ахъайдалди газдин къурулушдик акалдай ихтияр ганвай документар кьабулзавач. Алай вахтунда цIаяр хъийидай къурулушдин насос кIвалахдай къайдада авач.

Зизикрин СОШ-да цIаяр хъийидай котел ремонт хъувунин лазимвал ава, Алкьвадрин СОШ-да 2 котелдикай сад кIвалах тийидай гьалда ава, идан гьакъиндай къуллугъзавай организация хабардар авунва.

ЦIийи Макьарин ва Вини СтIалрин аялрин бахчайра газдин котелар дараматрин къенепата ава, гьавиляй тадаракар аялрин бахчайрин дараматрин къецел акъудун патал цIийи дараматар эцигунин лазимвал ава. НуьцIуьгърин аялрин бахчада авай цIай хъийидай котел гъили туькIуьрнавайди я, ам сертифицироватнавайдал эвез авун чарасуз я.

КIварчагърин аялрин бахчада газдин котелдин аппаратура ремонт хъувуна кIанзава.

Муниципалитетдин культурадин идарайрани зулунни хъуьтIуьн сезондин вахтунда объектри ара атIунар авачиз кIвалах авун патал тайин кIвалах тухузва. Сезондиз гьазурвилер акунин жигьетдай тухудай серенжемрин план туькIуьрнава. Объектар зулунни хъуьтIуьн сезондиз гьазурунин кIвалахрал «ЖКХ и благоустройство» МКУ-ди ва райондин комиссияди гуьзчивал тухузва.

Райондин культурадин хиле 5 учреждение ава, абурукай яз поселенийра кардик квай филиаларни галаз ЦТКНР ва библиотекайрин централизованный къурулуш (ЦБС). И. Гь. Тагьирован тIварунихъ галай ЦТКНР-дихъ чкайрал 35 филиал, ЦБС-дихъ 27 филиал ава. Хуьрерин клубрин 19 дараматда газ ава, амай дараматра пичера цIай хъийизва.

Библиотекайрикай 17-да газ ава, 7-да пичера цIай хъийизва, 4 библиотека кьилдин ксарин кIвалера ава.

Газ тухванвай вири идараяр цIай хъийидай сезондиз гьазур я, амма пул тагун себеб яз са бязи идарайрин газ атIанва.

Культурадин дворецда, аялрин музыкальный ва художественный школайрани профилактикадин кIвалахар тухванва, чимивал гудай къурулушар кIвалахдин къайдада ава.

Хуьрерин 11 библиотекада кIарасрин цIай хъийидай пичер эцигнава. Анриз кIарасар хкун патал тамарин майишатдихъ галаз икьарарар кутIунун ва пул гун лазим я. И месэла рази тирвилин къайдада гьялайтIа, цIаяр хъийидай сезондалди гьазурвилин вири кIвалахар акьалтI жеда.

«Сулейман-Стальский ЦРБ» ГБУ-дани сагъламвилин идарайра зулунни хъуьтIуьн сезондиз акъвазунар авачиз ва санитариядинни чимивилин къайда хуьналди кIвалах авун патал са жерге серенжемар кьиле тухванва. Серенжемрин пландин бинедаллаз хъувуна кIанзавай кIвалахар 15-августдилай 25-сентябрдалди тамамарна куьтягьда.

Медицинадин 8 идарада (ФП-ра ва ФАП-ра) хъуьтIуьн вахтунда пичера кIарасрин цIай хъийизва, анриз газ гъанвач. Анагар 1-октябрдалди кудай кIарасралди таъминарда.

ДаркIуш-Къазмайрин врачебный амбулаторияда аниз къвезвай пациентриз ва кIвалахзавай работникриз бес кьадар чимивал гун патал кардик квай чимивилин къурулушди санитариядинни эпидемиологиядин ва санитаяридинни гигиенадин истемишунриз жаваб гузвач. Идахъ галаз алакъалу яз ана идарадин вичин кьилдин чка дуьзмишун лазим я.

2022-2023-йисарин зулунни хъуьтIуьн сезондиз гьазурвилер акунин сергьятра аваз райондин хуьрерин поселенийрани агьалияр, образованидин, культурадин ва яшайишдин маса объектар чимивилелди, целди, электричестводалди ва газдалди таъминарун патал тайин кIвалах тухванва. Кьилди къачуртIа, хуьрера 790 п/м цин цIийи линияр тухванва, Алкьвадрин, Кьасумхуьруьн, Герейханован хуьруьн, ЦIийи-Макьарин, КIварчагърин, Уллу-Гъетягърин, Цмуррин, Вини-СтIалрин хуьрерин поселенийра ва Хпюкьрин, Агъа-СтIалрин хуьрера чIуру гьалда авай 2550 п/м цин линияр дегишарна ва ремонт хъувуна.

Зулунни хъуьтIуьн сезондиз гьазурвилер акунин сергьятра аваз 32-нумрадин ДЭП-ди (дорожно-эксплуатационное предприятие) чIуру гьалда авай къир цанвай рекьерин участокра (санлай 3600 кв. м.) фурар ремонт хъувуна, херхем вегьенвай 17 км. рехъ къайдадиз хкана, рекьера муркIар цIурурдай 2 тонн технический кьел ва герек маса шейэр, рекьерин 5 улакь-техника гьазурнава.

2022-2023-йисарин зулунни хъуьтIуьн сезондиз гьазурвилер авунин рекьерай тухузвай кIвалахар районда тешкилнавай штабдин ва райондин Кьил Саид Мусинович Темирханован кьетIен гуьзчивилик ква.

Къейд: макъала «ЖКХ и благоустройство» МКУ-дай гайи справкадин бинедаллаз гьазурнава.

Хазран Кьасумов, РФ-дин журналистрин Союздин член

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

6