Ватанперес хва Хсейхан

Инсанри хкязавай ва чеб гьадан иесияр жезвай пешеяр гзаф ва жуьреба-жуьре я. Амма виридалай кьетIен ва герек пешени ава – Ватан хуьн! Ватан кIан хьунин ва хуьнин гьиссер гзаф инсанрин бейнидик дидедин некIедихъ галаз санал акатзава. Гьавиляй Диде ва Ватан гафар сад хьиз чаз ала ва багьани я. Неинки Дагъларин уьлкведа, санлай Къавкъазда къадимлу ва такабурлу лезги халкьдин арадай Ватан хвейи, хуьзвай кьегьал инсанар вири девирра акъатна, абур чи йикъарани ава

Винидихъ гъанвай веревирдер ийидайла рикIел Дагъустандин халкьдин шаир Майрудин Бабаханован шиирдин цIарарни къвезва: «Ватандин сир алцум жедач, Камарални чипIерал, Ам алцумиз жеда анжах, Адахъ кузвай рикIерал». Ватандихъ рикI кузвай кьегьал рухвайрикай яз завай Украинада тухузвай женгинин махсус серенжемда гьа сифте йикъарилай иштиракзавай, гьа идалди ватанпересвал къалурзавай Россиядин Яракьлу Къуватрин капитан Хсейхан Азимович Шихабдулаеван тIвар кьаз жеда. Сулейман-Стальский райондин Агъа-СтIалрин хуьряй тир ам рухсат гана кIвализ хтанва, чаз адахъ галаз гуьруьшмиш жедай мумкинвални хьана.

- Чи къудратлу уьлкведин Яракьлу Къуватрин офицер хьун гьеле школада кIелзавай йисарилай зи рикIе авай мурад тир, — суьгьбетзава Хсейхан Азимовича. – Гьавиляй 2008-йисуз хайи хуьруьн юкьван школа акьалтIарай зун Тюмень шегьерда кардик квай маршал А. И. Примлякован тIварунихъ галай Высший военно-инженерный командный училищедик экечIна. Ана кIелдай йисарни акуна-такуна акъатна. РикIе авай мурад кьилиз акъатунал, чи уьлкведин баркаллу Яракьлу Къуватрин жергейра къуллугъ авунал, Ватан хуьзвайди хьунал къе за дамахни ийизва.

Хсейхан Шихабдулаева военный училище лейтенатвилин чин ва хъсан чирвилер аваз 2013-йисуз акьалтIарна. Жегьил офицерди Ватандиз къуллугъ авунин рехъни гьа и йисуз Санкт-Петербург шегьердин военный институтда инженерно-технический взводдин командирвилелай башламишна.

Къуллугъдин «кIарарайни» фад-фад хкаж хьана. Ада жуьреба-жуьре частара команда гудай гьар жуьредин къуллугъар тамамарна, аскеррин ва командованидин патай вичиз лайихлу гьуьрмет ва ихтибар къазанмишна.

2021-йисалай капитан Х. Шихабдулаева уьлкведин меркез Москва шегьерда Джерзинскдин тIварунихъ галай ОДОН-да (отдельная дивизия оперативного назначения) къуллугъзава.

Россиядин Яракьлу Къуватри Украинада женгинин махсус серенжем кьиле тухуз эгечIай сифте йикъарилай Хсейхан Азимовича гьана вичин ватанпересвал къалурзава.

Хиве авай везифаяр викIегьдаказ кьилиз акъудунай капитан Шихабдулаеваз Россиядин Федерациядин Президент Владимир Путинан Указдалди 2022-йисан 27-мартдиз «За отвагу» медаль гана.

- Гьелбетда, Россиядин Яракьлу Къуватри Донецкдин ва Луганскдин Халкьдин Республикайра махсус серенжем тухун – им чара атIайла, мадни ДНР-динни ЛНР-дин халкьари тIалабайла авур кар я, — лугьузва Хсейхан Азимовича. – Кьве республикадин агьалийрини чи аскерар ва офицерар азад ийидайбур яз кьабулна. Украинадин миллетчийри кьве республикадани яшамиш жезвай чи стха халкьариз инад кьуна са шумуд йис тир. Украина дяведизни гьазур хьанвай. Америка кьиле аваз къе НАТО-ди Украинадиз алай аямдин яракьар гузва, Украинадин патай дяведа иштиракзавай наемникрин, яни гьакъидал кьунвай ксарин кьадарни гзаф я. Гьахъ винел акьалтдайдахъ чун инанмиш я.

Гьелбетда, капитан Шихабдулаева чаз махсус серенжемдикай, вичин иштираквиликай са артух рахунар авунач. Чун адан гъавурда акьазва.

Чаз малум хьайивал, рухсатдин вахт куьтягь хьайила Хсейхан Азимович Украинадиз хъфида, ада махсус серенжемда иштиракун давамда.

Хсейхан Азимович халис ватанперес, чешнелу офицер хьиз, гьуьрметлу хизандин кьилни я. Вичин уьмуьрдин юлдаш Разия Алимовнадихъ галаз ада кьве аял чIехи ийизва, тербияламишзава.

Халис дагъвидиз хас тирвал ватанпересвилин руьгь квай, Ватандин вилик пак буржи кьилиз акъудзавай Хсейхан Азимовичахъ ва ада хьиз Украинада махсус серенжемда иштиракзавай гьар са кьегьал хцихъ элкъвена, чаз лугьуз кIанзава: куьн, женгинин гьерекатар куьтягь хьана, сагъ-саламатдиз хизанрин, багърийрин патав хтурай!

Хазран Кьасумов

Шикилда: капитан Х. Шихабдулаев