Объектрин эцигунар – гуьзчивилик

Муниципальный райондин Кьил Саид Темирханова алатай гьафтеда районда образованидин ва спортдин объектар эцигунин ва капитальнидаказ ремонт хъувунин кIвалахар кьиле физвай гьалар ахтармишна. Сифтедай райондин Кьил ЦIийи Макьарин юкьван школадиз фена. И школа «Развитие образования» РФ-дин государственный программадай цIийикIа туькIуьр хъувунин серенжемар уьмуьрдиз кечирмишунин сергьятра аваз капитальнидаказ ремонт хъийизва. Федеральный бюджетдин субсидийрин такьатрин гьисабдай школадин кьве корпус тамамдаказ ремонт хъийида. Мадни, полар, потолокар, дакIарар ва ракIарар дегишарда, цлар ремонт хъийида. Школа гьакIни цIийидаказ лазим тир алатралди тадаракламишда.

Подряддин организациядин векилри ва школадин руководстводи райондин Кьил Саид Темирхановаз лагьайвал, ремонтрин кIвалахар план-графикдихъ галаз кьиле физва, кIвалахар кьулухъ язавай себебар авач.

Райондин администрациядин Кьилин 1-заместитель Лацис Оруджев, райондин образованидин управленидин начальник Гьуьсейн Шихбабаев, капитальный эцигунрин управленидин начальник Роберт Мейлановни галаз райондин Кьил Саид Темирханов ДаркIуш-Къазмайрин аялрин бахчадин дараматдал тухузвай эцигунрин кIвалахрихъ галазни таниш хьана. Абур инанмиш хьайивал, эцигунрин кIвалахар проектдин истемишунрихъ галаз кьазва.

Лугьун лазим я хьи, объектдал эцигунрин кIвалахар алатай йисан гатфариз республикадин инвестицийрин программадай кьиле тухуз башламишна. Эцигунрин заказчик «Республиканский центр по сейсмологический безопасности» ДР-дин ГАУ, генеральный подрядчикни «СМК «Жилье» ООО я. Икьрардин бинедаллаз эцигунринни-монтаждин асул кIвалахар кьве мертебадин корпусда 2021-йисан эхирра акьалтIарна.

Райондин Кьил Саид Темирханов ДаркIуш-Къазмайрал мини-футболдин майдандин эцигунрихъ галазни таниш хьана. И объект республикадин образованидин министерстводин хиляй спорт ва физический культура вилик тухунин программадай эцигзава. И проект уьмуьрдиз кечирмишуна муниципалитетдини иштиракзава.

И объектдал монтаждинни-эцигунрин кIвалахар августдин вацран юкьваралди акьалтIарун пландик кутунва.

Образованидин ва спортдин объектрин эцигунар райондин Кьил Саид Темирханован кьетIен гуьзчивилик ква.