Меню
6+

Сайт «Кюре»

27.07.2023 09:32 Четверг
Категории (2):
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Арифдаррин хуьруьн лайихлу векил

Алкьвадар. И хуьруьн тIвар кьунмазди, чи рикIел хуьруьн еке ва баркаллу тарих, хуьряй акъатай, уьлкведиз ва вири дуьньядиз машгьур хьайи камалэгьлияр, алимар, Социализмдин Зегьметдин игитар, шаирар, искусстводин устадар, конструкторар, чIехи дережайрин руководителар къведа. Неинки кьилдин ксар, санлай тамам тухумар.

Ваъ, зи къенин суьгьбет я алимдикайни туш, я гьакимдикайни. Зи суьгьбет 2023-йисан 21-июндиз Дагъустан Республикадин Гьукуматдин Председатель Абдулмуслим Абдулмуслимова 283-р нумрадик кваз акъудай распоряженидалди Дагъустан Республикадин Гьукуматдин Гьуьрметдин грамота гайи и хуьруьнви, Сулейман-Стальский райондин культурадин отделдин начальникдин заместитель Султанов Жабир Ажимамедовичакай я.

Гьамиша кIвалахдин, къай-гъуйрик яцIа авай и касдикай макъала кхьиз эгечIайла, зи рикIел Максим Горькийди лагьай гафар хтана: «Заз зи вири уьмуьрда кIвалахиз кIандай ва чпелай кIвалах алакьдай инсанар халис игитар яз аквада». Заз и келимайрай Жабир Ажимамедовичан «шикил» аквазва. КIвалахдин кабинетда ам жагъурун регьят туш. Гьам райцентрадал, гьам хуьрера авай культурадин маканра, районда тухузвай культурадинни шадвилин мярекатра ам жагъурун регьят я.

Мадни, Ж. А. Султанов гзаф терефрин бажарагъ авай кас я. И кар къалурун патал чна адан уьмуьрдин ва зегьметдин рекьикай куьрелди суьгьбетда.

Жабир Султанов 1963-йисуз дидедиз хьана. Жаван йисарилай манияр лугьунал, кьуьлер авунал рикI алай ва вичихъ и рекьерай алакьунар авай ам, школа акьалтIарна, Дагъустандин культпросвет училищедик экечIна. Анаг акьалтIарай жегьил пешекарди 1983-1986-йисара Дагъустандин манийринни кьуьлерин государственный ансаблда ва Виридуьньядин машгьур государственный «Лезгинка» ансамблда кIвалахна.

1986-йисуз Жабир Ажимамедович, хизандин гьалар себеб яз, хайи хуьруьз хтана, Сулейман-Стальский райондин пионеррин ва школьникрин КIвале педагог яз кIвалахал акъвазна. И везифаяр ада 12 йисан къене кьиле тухвана. И йисара ана цIийи са шумуд кружок кардик кутуна, Ж. Султанова регьбервал гузвай кьуьлердайбурун ансамблди республикада са шумуд конкурсда кIвенкIвечи чкаяр кьуна.

1998-йисуз вичихъ тешкилатчивилин рекьяй алакьунар авай Жабир Ажимамедович, хуьруьнвийрин тIалабуналди ва райондин руководстводи тереф хуьналди, Алкьвадрин хуьруьн поселенидин администрациядин кьилин къуллугъдал хкяна. Жавабдар и везифаярни ада 12 йисуз намуслудаказ кьилиз акъудна. И йисара хуьр яшайишдинни экономикадин рекьерай вилик тухун, агьалийрин яшайиш, дуланажагъдин шартIар хъсанарун патал Жабир Султанова еке зегьмет чIугуна, поселенидик акатзавай Алкьвадрал ва Сардархуьре куьчеяр къайдадиз гъана, са шумуд куьчеда къир цана, агьалияр хъвадай ва дигидай целди таъминарна, культурадин, образованидин, здравоохраненидин идарайрин кIвалах хъсанарна. Са гафуналди, Алкьвадрин хуьруьн поселение районда хъсанбурун жергедиз акъудна.

2010-йисан декабрдин вацралай инихъ Жабир Ажимамедовича, чна винидихъ лагьайвал, райондин культурадин отделдин начальникдин заместитель яз кIвалахзава. Адан асул везифайрик муниципалитетдин культурадин вири учрежденийрин кIвалах сад садав кьадайвал авун, халкьдин художественный сеняткарвилер кIвачел ахкьалдарун, культурадин ирсинин памятникар хуьн акатзава. Жабир Султанован кIвалахдин «майданрин гегьеншвал» къалурун патал заз ихьтин рекъемар гъиз кIанзава: культурадин отделдик И. Тагьирован тIварунихъ галай ЦТКНР, хуьрерин клубрин къайдадин 35 филиал, Алкьвадар Гьасан эфендидин тIварунихъ галай центральный библиотека, чкайрал алай адан 28 филиал, художественный ва музыкальный школаяр, 8 музей акатзава. Мадни райондин территориядал тарихдин ва культурадин 187 памятник ала. 2018-йисалай Сардархуьре ва Зизика цIилер галай тапракар гьазурдай «УстIаррин кIвал» кардик ква, районда хъенчIин къапар ва чуьнгуьрар гьазурдай мастерскойри кIвалахзава. Ибуру Ж. Султанован гьар йикъан къайгъуярни артухарзава.

Жабир Ажимамедович хъсан тешкилатчини я. Алай йисуз Кьасумхуьрел лезгийрин къагьриманвилин «Шарвили» эпосдин сувар кьиле тухуникни ада еке пай кутуна. Районда гьар йисуз СтIал Сулейманан Шииратдин йикъар, гьакIни йисан календарда авай суваррин, культурадин лишанлу йикъар кьиле тухуник, райондин яратмишдай коллективар международный конкурсриз, фестивалриз рекье туникни Ж. Султанова еке пай кутазва. Ада райондин аялрин яратмишунрин КIвале кардик квай кьуьлерин «Леккур» ансамблдиз гузвай куьмекни екеди я.

- Жабир Ажимамедовичакай рахадайла, завай анжах разивилин келимаяр лугьуз жеда, — лугьузва райондин культурадин отделдин начальник Майрудин Бабаханова. – Адаз пешедин рекьяй дерин чирвилер, девлетлу тежриба ава, везифайривни ам жавабдарвал гьисс авуналди эгечIзава. Ада насигьатчивилин еке кIвалахни тухузва, алатай йисуз «Халкьдин коллектив» тIвар къачур «Кьасумхуьруьн далдамчияр» ансамблни кIвачел ахкьалдар хъувуна, общественный бинейрал алаз «Юный кюринец» хореографиядин студияни тухузва, акьалтзавай несилдиз вичи Дагъустандин манийринни кьуьлерин ва государственный «Лезгинка» ансамблра къачур чирвилер ва вердишвилер гузва. Са гафуналди, Жабир Ажимамедович пешедин устад, коллективдин рикI ва чархачи я.

Вичин асул везифайрилай гъейри, Жабир Султанова районда несигьатчивилин, общественный еке кIвалахни тухузва. Кьилди къачуртIа, ам районда кардик квай терроризмдиз акси комиссиядин член я. Ада школайра кIелзавайбурухъ ва жегьилрихъ галаз терроризмдиз ва экстремизмдиз акси профилактикадин еке кIвалах тухузва.

- Жабир Ажимегьамедович районда хиве авай везифайрив жавабдарвал гьиссна эгечIзавай работникрикай сад я, — лугьузва райондин администрациядин Кьилин 1-заместитель Лацис Оруджева. – Райондин руководстводи гайи гьар са тапшуругъ вахтунда кьилиз акъудун адаз адет хьанвай кар я. Ахлакьдин, низамдин рекьяйни ам чешне я. Чун адан кIвалахдилай гзаф рази я.

Гьа са вахтунда, Ж. Султанов чешнелу, гьуьрметлу хизандин кьил, низамлу веледрин бубани я.

Жабир Ажимамедовичан яргъал йисарин намуслу зегьмет Дагъустан Республикадин культурадин министерстводин, Сулейман-Стальский райондин администрациядин, культурадин отделдин, общественный организацийрин патай Гьуьрметдин грамотаяр, маса наградаяр гуналди къейднава…

Дагъустандин халкьдин шаир Майрудин Бабаханован са шиирда ихьтин цIарар ава: «… За вичивай анжах са кар тIалабда: Яшамиш хьун тIал-квал квачиз яргъалди». Дагъустан Республикадин Гьукуматдин Гьуьрметдин грамота ва мукьвара къейд авур 60 йисан юбилей мубарак авуналди, чаз Жабир Султановахъ мягькем сагъламвал, хизандин бахтлувал, кIвалахда агалкьунар ва «тIал-квал квачир» яргъал йисарин уьмуьр хьана кIанзава.

Хазран Кьасумов, РФ-дин журналистрин Союздин член

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

9