Бегьерар кIватI хъувунин къайгъуйра
Лезги халкьдин манида лугьузвайвал, гад акъатна зул къведа, гьар са емишни бул жеда. Гьакъикъатдани, зулун и йикъара райондин хуьруьн майишатдин карханаяр, лежбервилинни фермервилин майишатар, арендаторар ва хуьрерин агьалияр емишар, ципицIар, салан ва бустандин няметар кIватI хъувунал, общественный мал-къарадиз тух кьуьд тешкилунал ва чуьлдин маса кIвалахрал машгъул я.
«Куьредин хабарар» газетдин экономикадин отделдин заведующий Хазран Кьасумов райондин УСХиП-дин начальникдин заместитель Гьамидин Абдулкъафаровахъ галаз гуьруьшмиш хьана, адавай районда бегьер кIватI хъувунин кIвалахар кьиле физвай гьалдикай суьгьбет авун тIалабна. Агъадихъ чна адан суьгьбет гузва.
- Гьакъикъатдани, алай зулун вахт карханайрин ва хуьрерин зегьметчияр патал лап къизгъинди я, — лагьана Гь. Абдулкъафарова. – Емишар, салан майваяр, ципицIар кIватI хъувунин, къведай йисан бегьердин бине кутунин кIвалахарни хъсан тешкиллувал аваз ва йигин еришривди кьиле физва. И кар къалурун патал за тайин мисаларни гъида. Сифтедай алафар гьазуруникай рахан. Икьван чIавалди районда, санлай къачурла, 30960 тонн векъи алаф гьазурнава. Идакай 28980 тонн векьер, 850 тонн самар я. 1130 тонн сенажни кутунва. Сенаж кутунин кIвалахар районда малдарвилин хел вилик тухуник еке пай кутазвай «Горец» ООО-да давамни ийизва.
Алай йисуз районда 1023 гектардай гадни кIватI хъувуна. Кьилди къачуртIа, никIерай 1777 тонн зулун къуьл, 399 тонн зулун мух, 130 тонн гатфарин мух, 288 тонн гатфарин къуьл кIватI хъувуна. Санлай къачурла, юкьван гьисабдалди никIерин гьар са гектардай 23,3 центнер техил вахчуна.
Алай йисан бегьер патал 282 гектарда маса гудай (товарный) картуфарни цанвай. Анрин гьар са гектардай 221,5 центнер картуфар хьана. Чи шартIара им хъсан нетижа я.
Районда, санлай къачурла, 867 гектардай салан майваяр (чугъундурар, келемар, чичIекар, афнияр, помидорар ва маса няметар) кIватI хъувуна. И кардик кьилдин ксарин майишатрин еке пай ква. Анрай икьван чIавалди 26683 тонн майваяр кIватI хъувунва.
Виликан йисарилай тафаватлу яз, алай йисуз районда гзаф майданра – 102 гектарда – къарпузар ва гатун халияр цанвай. Анрай 5049 тонн халияр вахчуна. Идак арендаторар тир Надир Къадимован, Роберт Къазиагьмедован, Малик Гьажимурадован зегьметдин еке пай ква.
Районда ципицIар кIватI хъувунин кIвалахарни хъсан тешкиллувал аваз кьиле физва. «Зардиян», «Гуьлгери вацI», «Дербент-Агро» ООО-ра, А. Алагьвердиеван, А. Агъамирзоеван, Р. Гьамзатован, У. Агьмедован ва маса арендаторрин участокра ципицIрин хъсан бегьер ава, гектардин бегьерлувал 80 центнердилай виниз я.
Икьван чIавалди районда 1348,5 тонн ичерни кIватI хъувунва, и кар давамни жезва.
Емишар кIватI хъувуникай рахадайла, къейд ийиз кIанзава хьи, районда 369 тонн пIиниярни шурван пIинияр, 8220 тонн хутарни алучаяр, 7688 тонн шефтелар, 1681 тонн чуьхверар кIватIнава. Вири санлай районда кIватI хъувур емишри 19656,5 тонн тешкилзава.
Районда 85 гектардай 127,5 тонн шуьмягъарни кIватI хъувунва, абур кIватIун давам жезва.
Емишар ва салан майваяр кIватIун давамарунихъ галаз санал, райондин хуьруьн майишатдин карханайри къведай йисан бегьердин бине кутуникайни фикирзава. ИкI, цIинин зулухъай саки 600 гектарда зулун магьсулрин тумар цун лазим я. Икьван чIавалди 330 гектарда цанар цанва. Цун патал 60 тонн тумни гьазурнава, ида лазим кьадардин 48 процент тешкилзава. Бес тежезвай тум республикадин маса районрай ва Ставрополдин крайдай хкида.
Санлай къачурла, алай йис бегьерлуди хьана. Гьавиляй чавай инанмишвилелди лугьуз жеда хьи, гъиле авай йис райондин хуьруьн майишатдин карханайри, фермервилинни лежбервилин майишатри ва арендаторри производстводин вири хилерай агалкьунар къазанмишуналди акьалтIарда.
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
