Меню
6+

Сайт «Кюре»

06.02.2023 12:02 Понедельник
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

КIвалахдин шартIарни хьанайтIа…

Инсандин яшайишда важиблу терефар гзаф ава. Сагъламвал хуьнин ва мягькемарунин тереф инсан патал иллаки важиблу я.

И жигьетдай медицинадин хилен идарайра кIвалахзавай работникрин хивени еке ва жавабдар везифаяр ава.

И йикъара чун Сийидрин хуьруьн фельдшервилинни акушервилин пунктуниз (ФАП-диз) фена, анин кIвалахрихъ галаз таниш хьана.

ФАП хуьруьн юкьвай фенвай шегьре рекьин къерехдал алай са мертебадин дараматда кардик ква. Рехъ галай патхъай и дараматда библиотека ва туьквенни ава. Дараматдин далу патахъай гъвечIи-гъвечIи кьуд кIвал фельдшервилинни акушервилин пунктунив гва.

ФАП-дин заведующийви-ле 2021-йисуз Каспийскдин медицинадин училище акьалтIарнавай жегьил пешекар Гуьлназ Исмаиловади кIвалахзава. Ана фельдшерди, акушеркади ва аялрин медсестрадини кIвалахзава.

Гуьлназ Исмаиловади чаз лагьайвал, фельдшервилинни акушервилин пунктунин медработникри хуьре яшамиш жезвай 1226 касдиз медицинадин рекьяй къуллугъзава. Хуьруьн агьалийрикай 252 кас 18 йисал къведалди яшара авай аялар ва жаванар, 137 кас аял хадай (15 йисалай 50 йисал кьван) яшара авай дишегьлияр я.

Медицинадин работникри чаз лагьайвал, абуру агьалияр ФАП-да кьабулунилай гъейри, мукьвал-мукьвал абур яшлу ксар, набудар, аялар авай кIвалеризни физва, абурун сагъламвал ахтармишзава, лазимвал авайбуруз медицинадин рекьяй куьмекар гузва. Дарманралди, герек маса шейэралдини ФАП таъмин я.

Медработникри чпини лагьайвал, чазни акурвал, фельдшервилинни акушервилин пунктуна дарискъалвал ава. Куьгьне дараматни хьайила, анин работникрал агьалияр кьабулунин, абурун сагъламвал ахтармишунин, медицинадин рекьяй чкадал куьмек гунин карда четинвилер ацалтзава.

ХъуьтIуьн и йикъара чна ФАП-да чимивал гузвай ва хуьзвай гьалдизни фикир гана. Ана газ акалнавай гъвечIи пичер эцигнавай. Чимивал пис туш, амма пичери вахтунин истемишунриз жаваб тагузвайди кьатIуз хьун четин туш.

ФАП-дин медработникри чаз лагьайвал, Сийидрин хуьре медицинадин цIийи дарамат эцигунин чарасузвал фадлай арадал атанва. Ида медработникриз кIвалахдай, хуьруьн агьалийриз алай аямдин истемишунрихъ галаз кьадайвал медицинадин рекьяй къуллугъдай мумкинвал гудай.

Сийидрин хуьруьн фельдшервилинни акушервилин пункт куьгьне ва дарискъал дараматда кардик хьуникай рахадайла, чаз къейд ийиз кIанзава хьи, эхиримжи йисара «Здравоохранение» ва «Здравоохраненидин сифтегьан хилен идараяр цIийикIа туькIуьр хъувун» госпрограммайрай, санлай уьлкведа хьиз, Дагъустан Республикада, гьабурукай яз чи райондани тайин кIвалах тухванва, и кар давамни ийизва. Мисал яз, эхиримжи йисара са шумуд хуьре медицинадин цIийи дараматар (гьабурукай яз модульный ФАП-ар) эцигнава.

Чаз умуд кутаз кIанзава хьи, ихьтин «экв» сийидвийризни аквада.

Хазран Кьасумов

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

7