Меню
6+

Сайт «Кюре»

06.02.2023 11:54 Понедельник
Категории (2):
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Виридаз милаим Марина муаллим

Дагъустан Республикадин Кьил Сергей Меликова 2023-йисан 19-январдиз 17-нумрадик кваз акъудай «Дагъустан Республикадин государстводин наградаяр гунин гьакъиндай» Указдин бинедаллаз Сулейман-Стальский райондин Алкьвадрин юкьван школадин муаллим Агъамирзе Агъамирзоеваз, Сардархуьруьн юкьван школадин муаллим Темирхан Темирхановаз ва ЦIийи поселокдин юкьван школадин муаллим Марина Ягъибековадиз «Дагъустан Республикадин лайихлу муаллим» лагьай гьуьрметдин тIвар ганва.

Лагьана кIанда, винидихъ тIварар кьунвай пуд муаллимни чаз фадлай ва хъсандиз таниш я. Чпин пешедин халис устадар тир абур и чIехи тIварцIиз лайихлуни я.

Чи къенин суьгьбет абурукай садакай – Марина Ягъибековадикай я.

р авайди, Лугьуда хьи, я девлетар галайди» — кхьенай регьметлу шаир Рамазан Каитова. И келимаяр зи рикIел Марина муаллимди вичин диде-бубадикай рикIел хкунин ихтилатар авурла хтана.

Марина 1964-йисан 12-декабрдиз машгьур алимар, шаирар гзаф акъатай Алкьвадрин хуьре Магьмуд ва Ракъуят Эфендиеврин хизанда дидедиз хьана. Ракъуята виликдай колхозда ва гуьгъуьнлай «Алкадарский» совхозда производствода яргъал йисара намуслудаказ зегьмет чIугуна. Саки 60 йисуз республикадин «Коммунист» (гилан «Лезги газет») ва райондин «Коммунизмдин гатфар» (гилан «Куьредин хабарар») газетрин мухбир хьайи шаир Магьмуд Эфендиеван тIвар райондилай яргъарани машгьур тир. Гьа ихьтин диде-бубадивай тербия, несигьатар къачур Марина муаллимди къе вич бахтлу, кIвачихъ девлетар галай инсан яз гьисабзава. И бахтлувални девлетар галайвал Марина Магьмудовнадиз, вичи лугьузвайвал, виридалайни гьуьрметлубурукай сад тир муаллимвилин пешедин иеси хьунай, вичи тамам 33 йисан къене цIудралди гадаярни рушар уьмуьрдин шегьредал акъудунай, и кар давамарунай аквазва.

Фикир гайила якъин жезва хьи, муаллим масадан бахтунин къайгъуда авай кас я. Гьавиляй заз «Масабурун бахтунин къайгъуда авайдаз жуван бахтни жагъида» келимаяр кхьей Платон гьахъ яз аквазва.

Маринади 5-класссдал кьван Алкьвадрин юкьван школада кIелна, 6-классдилай эгечIна, 10-классдал кьван Дагъустандин Огни шегьердин дагъви рушарин школа-интернатда кIелун давамарна.

Школа-интернат лап хъсан къиметар аваз акьалтIарай жегьил руш, рикIе авай мурад кьилиз акъудун патал, В. И. Ленинан тIварунихъ галай Дагъустандин госуниверситетдин математикадин факультетдик экечIна.

1987-йисуз ДГУ акьалтIарай жегьил пешекарди вичин зегьметдин рехъ Къаякент райондин Усмикент хуьруьн юкьван школада математикадин тарсар гузвай муаллимвилелай башламишна. Ана кIвалах авур 3 йисан къене Марина Ягъибековади вичиз гьам школадин коллективдин, гьамни хуьруьнвийрин патай гьуьрмет къазанмишна.

Гуьгъуьнлай, 1993-йисалай I995-йисалди, Марина Магьмудовнади Сулеймиан-Стальский райондин ЦIийи поселокдин юкьван школада старший пионервожатый яз кIвалахна.

1995-йисалай инихъ М. Ягъибековади и школада акьалтзавай несилдиз математикадин тарсар гузва.

- Марина Магьмудовна неинки ада кIвалахзавай школада ва чи районда, гьакIни Кьиблепатан Дагъустанда математикадин лап хъсан муаллимрикай сад я, — лугьузва райондин образованидин управленидин начальник Гьуьсейн Шихбабаева. – Адахъ кIвалахда гьар йисуз хъсан нетижаярни жезва. Им, са рахунни алачиз, адан рикI муаллимвилин пешедал, аялрал хьунин нетижа я. Марина муаллимдин кIвалахдилай чун гзаф рази я.

Дерин чирвилер авай, кIвалахда кIвенкIвечи, цIийи къайдаяр ишлемишзавай Марина Магьмудовнади тарсар гузвай аялри гьар йисуз райондин ва республикадин школьникрин олимпиадайра кIвенкIвечи чкаяр кьазва. ИкI, М. Ягъибековади П. А. Чебышеван тIварунихъ галай зональный, Вирироссиядин школьникрин, республикадин «Пифагор» (2018-2019-йисар), Леонард Эйлеран тIварунихъ галай региональный этапдин (2020-йис) олимпиадайрин, «Ученик года -2021» республикадин конкурсдин гъалибчияр ва призерар гьазурна. Марина Магьмудовнади математикадин тарсар гузвай Шамил Тагьирова райондин, республикадин ва Вирироссиядин са шумуд олимпиадада гъалибвал къачуна. Олимпиадайрин ва конкурсрин гъалибчиярни призерар гьазуранай муаллимдиз грамотаяр ганва.

Гьа са вахтунда, М. Ягъибековади математиткадин, физикадин, информатикадин муаллимрин объединенидин руководителвилин везифаярни намуслудаказ кьилиз акъудзава.

Математикадин хъсан чирвилер ва тежриба авай муаллим М. Ягъибекова 5-классдин руководителни я. 20 аялди кIелзавай и класс гьар са рекьяй школада чешне я.

Марина Магьмудовнади тарсар гайи гадайрикайни рушарикай къе хъсан пешекарар хьанва, ада математикадал ашукьарай Марина Мукаиловади алай вахтунда Цмуррин юкьван школада математикадин тарсар гузва.

Эхиримжи йисара вичин виликан ученикар хьайи 8 касди алай вахтунда республикадин ва уьлкведин кесерлу ВУЗ-ра кIелунални Марина Магьмудовнади дамахзава.

М. Ягъибековадин яргъал йисарин бегьерлу ва гьакъисагъ зегьмет 2008-йисуз «Россиядин Федерациядин умуми образованидин гьуьрметлу работник» тIвар, 2021-йисуз Дагъустан Республикадин образованидин ва илимдин министерстводин премия, гзаф кьадар грамотаяр гуналди къейднава.

Тежрибалу муаллим хьиз, Марина Магьмудовна низамлу ва ферли 3 веледдин диде, 4 хтулдин чIехи дидени я. Адан веледар тир Таисади ДГУ-дин социальный факультет, Марата политехнический институт, Эльдара юридический колледж акьалтIарна, чпин пешейрай кIвалахзава.

«Дагъустан Республикадин лайихлу муаллим» гьуьрметдин тIвар мубарак авуналди, чаз Марина Магьмудовна Ягъибековадихъ муаллимвилин четин ва гьуьрметлу кIвалахда мадни еке агалкьунар хьана кIанзава.

Текст кхьейди ва шикил ягъайди Хазран Кьасумов я

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

81