Конкурсрин гъалибчи
Апрелдин вацран эхиримжи гьафтеда Сажидин Сагьидгьасанован яратмишунриз талукьарнавай «Хрустальный ручей» лишандик кваз райондин школьникрин арада тухвай конкурсда Алисултанова Эвелинади, Цмуррин юкьван мектебдин ученицади, 2- чка кьуна.
Эвелина Алисултановади Цмуррин юкьван мектебдин 6- классда кIелзава.
Вири тарсарай адахъ анжах «5» къиметар ава. Гьавиляй адан шикилди «Чна абурал дамахзава» доскада лайихлу чкани кьунва. Школада тухвай предметрин олимпиадайрани адахъ гьар йисуз хъсан нетижаяр жезва. Олимпиадайра ва школада тухвай конкурсра гъалиб хьунай Эвелинадиз са шумуд грамотани ганва.
Гьа са вахтунда Э. Алисултановади районда ва республикада шиирар кIелунай, сочиненияр кхьинай ва маса рекьерай тухузвай конкурсрани иштиракзава, нетижаярни хъсанбур я. ИкI, 2020-йисуз райондин школьникрин арада кьиле тухвай «Сочинение-рассуждение» конкурсда Э. Алисултанова 2- чкадиз лайихлу хьана,
2020-йисуз республикада кьиле фейи «Золотые правила нравственности» конкурсда Э. Алисултанова 1-чкадиз лайихлу хьана. Адаз Дагъустан Республикадин милли политикадинни динрин рекьяй министр Э. С. Муслимован къул алай диплом гана. И конкурсдиз ам гьазурайдини виликан Цмуррин юкьван мектебдин директордин заместитель, алай вахтунда ИМЦ-дин директордин заместителвиле кIвалахзавай Каминат Мегьамедовна Усманова тир.
2021-йисуз Э. Алисултанова райондин хуьрерин библиотекайрин арада лезги чIалан йикъаз талукьарнавай «Яд хьиз михьи, тур хьиз хци лезги чIал» конкурсдин гъалибчи хьана.
2021-йисуз Э. Алисултанова «Язык Победы» лишандик кваз тухвай Вирироссиядин конкурсда 1-чкадиз лайихлу хьана.
ДАССР-дин 100 йисан юбилейдиз талукьарна тухвай конкурсда Эвелинади районда 1, республикада 2-чкаяр кьуна.
Хъсан къиметар аваз кIелзавай, школадин общественный уьмуьрда активдаказ иштиракзавай Эвелина чи дамах я, — лугьузва школадин директор Сергей Ежова.
Эвелинадин диде, Алисултанова Жамиля Аслановна, Цмуррин юкьван мектебда акьалтзавай несилдиз инглис чIалай чирвилер гузвай муаллим я. Эхь акьуллу диде-бубадиз ферли веледарни жеда.
За Эвелинадиз лезги чIаланни литературадин тарсар гуз кьве йис я. Адан лезги чIалан тарсарал, иллаки литературадал гзаф рикI ала. Эвелинади тарсарай гуьгъуьна амукьзавай аялризни куьмекар гузва. Гьавиляй адаз гьам муаллимрин, гьам аялрин арада гзаф гьуьрмет ава. Эвелинадихъ гележегда генани еке агалкьунар хьун чи мурад я.
Сефербег Мегьамедов, Цмуррин юкьван мектебдин лезги чIаланни литературадин, кьилин категориядин муаллим
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
