Грамотадиз лайихлу хьана
Ватандин ЧIехи дяведа Гъалибвилин 78 йис тамам хьунихъ галаз алакъалу яз райондин хуьрера, образованидин организацийра ва культурадин маканра гьар жуьредин мярекатар кьиле тухвана.
Ана активвилелди иштиракай яратмишунрин коллективар ва гьевескар манидарар райондин администрациядин, культурадин отделдин, образованидин управленидин Гьуьрметдин грамотайриз ва Чухсагъулдин чарариз лайихлу хьана. Абурун арада райондин аялрин яратмишунрин КIвале кардик квай манияр лугьунин (вокальный) «Кюре» ансамблдин солистка Ханум Агъамирзоевани ава. И йикъара райондин Кьил Саид Темирханова ансамблдин солистка Х. Агъамирзоевадив райондин Гьуьрметдин грамота шад гьалара вахкана.
Къейд авун лазим я хьи, Ханум Агъамирзоевадин тIвар ва алакьунар райондилай къецени машгьур я. Агъа-СтIал Къазмайрин юкьван школадин ученица Ханума районда ва адалай къеце тухузвай шадвилинни культурадин гзаф мярекатра иштиракзава, вичин ширин сесиналди тамамарзавай манийралди инсанрин гуьгьуьлар шадарзава.
- Санлай «Кюре» ансамбль хьиз, Ханумни хейлин фестивалрин ва конкурсрин лауреат я, — лугьузва ансамблдин руководитель Нариман Османова. – Абуру тамамарзавай манияр неинки Кьиблепатан Дагъустандин, гьакIни республикадин телестудийри лентиниз къачунва, абур чпин программайрик кутазва.
Ханум Агъамирзоевадихъ гележегда пешекар манидар жедай къаст ава.
Вун ви мураддив агакьрай, Ханум!
Текст кхьейди ва шикил ягъайди Хазран Кьасумов я
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
