Къуншийрин араяр сихбур ийизва

«Сад тир Россия» ВПП-дин Сулейман-Стальский чкадин отделенидин секретарь, Сулейман-Стальский райондин Кьил Саид Темирханова тестикьарай пландихъ галаз кьадайвал Къуншийрин йикъан сергьятра аваз райондани хейлин мярекатар кьиле тухвана.

Къуншийрин международный йикъаз талукьарна КIварчагърин Хабиб Аллахвердиеван тIварунихъ галай бокс вилик тухунин Центрада КIварчагъ дередин кубок патал анин 4 хуьруьн жегьилрин арада спортдин са шумуд жуьредай акъажунар кьиле тухвана. Адан тешкилатчи яз КIварчагърин АСП-дин кьил Завидин Загьирбеков, спонсорар яз М. Загьирбеков (КIварчагъ), И. Савзиханов (Махачкъала) ва Д. Яралиев (Зизик) экъечIна.

Акъажунар башламишдалди вилик КIварчагъ дередин жегьил спортсменрин вилик хуш келимаяр гваз райадминистрациядин Кьилин 1-заместитель Лацис Оруджев, КIварчагърин АСП-дин кьил Завидин Загьирбеков, мярекатдин гьуьрметлу мугьман тир боксдай Европадин чемпион Артур Сефиханов, боксдай Кьиблепатан Дагъустандин старший тренер Альберт Межидов, дередин хуьрерин умуми образованидин учрежденийрин руководителар рахана.

Жегьилрин арада спортдин акъажунар футболдай, волейболдай, турникдал чене акъудунай, 24 кг. гира хкажунай, 16 кг. гира яргъаз гадарунай, 100 ва 1000 метрдиз чукурунай, армрестлингдай кьиле фена. Къизгъин акъажунра футболдай 1-чка КIварчагърин, 2-чка Зизикрин, волейболдай 1-чка НуьцIуьгърин, 2-чка Зизикрин командайри кьуна.

Турникдал чене акъудунай Б. Гьуьсеналиев (НуьцIуьгъ), 24 кг. гира хкажунай ва 16 кг. гира яргъаз гадарунай А. Пирмегьамедов, армрестлингдай Б. Расулов (Экен), 100 метрдиз чукурунай Н. Велиханов (КIварчагъ) ва 1000 метрдиз чукурунай А. Девришбеков (НуьцIуьгъ) гъалиб хьана.

Акъажунра 1, 2 ва 3-чкаяр кьур спортсменриз кубокар, медалар, грамотаяр ва къиметлу пишкешар гана.

***

Къуншийрин йикъан сергьятра аваз тухвай мярекатар мадни ава. ИкI, Кьасумхуьруьн телевиденида кьиле фейи «элкъвей столда» «Сад тир Россия» партиядин Сулейман-Стальский чкадин отделенидин исполнительный секретарь Оруж Оруджева, райондин Общественный палатадин председатель Алимет Мейланова, «ЖКХ и Благоустройство» МКУ-дин работникри иштиракна.

Кьасумхуьруьн ва Агъа-СтIалрин поселенийрин администрацийрин кьилер тир Далгат Бабаева ва Надыр Эфендиева хуьрерин кьилин куьчеяр санитариядин рекьяй михьи авунин мураддалди субботникар тешкилна. Экологиядин акцияда хуьрерин агьалийри активвилелди иштиракна. Михьивилер авунин, аваданламишунин кIвалахар тухвайдалай гуьгъуьниз къунши хуьрерин агьалийри санал ацукьна чаяр хъун тешкилна.

КIварчагърин АСП-дин кьил Завидин Загьирбекова Къуншийрин йикъан сергьятра аваз Донбассда кьиле тухузвай женгинин махсус серенжемдин иштиракчи Гьейдар Селимован кIвале адахъ ва СВО-дин иштиракчи Артур Агьмедовахъ галаз гуьруьш – чаяр хъун тешкилна.

И суварин юкъуз районда кардик аялрин яратмишунрин КIвалин тербиячийри Кьасумхуьрел алай СтIал Сулейманан скверда манияр лагьана, шиирар кIелна.

«Сад тир Россия» Сулейман-Стальский чкадин отделенидин исполнительный секретарь Оруж Оруджева чаз лагьайвал, Къуншийрин йикъан сергьятра аваз тухвай мярекатри къунши хуьрерин арайра авай гьалар сихбур авуниз, агьалийрин дуствилин алакъаяр мягькемаруниз куьмек гузва.

Хазран Кьасумов