ТIебиат хуьналди, чна чунни хуьзва

И югъ тайинарун а кардихъ галаз алакъалу я хьи, 1972-йисан 5-июндиз Стокгольмда инсан элкъуьрна кьунвай алемдин месэлайрай ООН-дин Конференция ачух хьана. Конференцияди чун элкъуьрна кьунвай алем хуьнихъ ва тIебиатдин ресурсар менфятлудаказ ишлемишунихъ рекье тунвай, вири уьлквейри амал авуна кIанзавай, виче 26 асул диб, бине авай декларация кьабулна. Анал сифте яз чун элкъуьрна кьунвай алем хуьн ва хъсанарун къенин ва къвезвай несил патал инсаниятдин эвелимжи буржи тирди малумарна.

И юкъуз дуьньядин гзаф уьлквейра тIебиат хуьнихъ галаз алакъалу мярекатар, акцияр кьиле тухузва.

Мадни, 5-июндиз Россияда экологдин югъни къейд ийизва. Талукь Указдал РФ-дин Президент Владимир Путина 2007-йисан 21-июндиз къул чIугуна. Сифте яз Экологдин югъ Россияда 2008-йисуз къейдна. И сувар арадал атуни Россияда вири дережайра государстводин тIебиат хуьнихъ галаз алакъалу идарайрин пешекарвилин кIвалахдин важиблувал къалурзава.

Виридуьньядин чун элкъуьрна кьунвай алем хуьнин ва Экологдин йикъарин сергьятра аваз гьар йисуз милли паркара ва заповедникра общественностдин фикир тIебиат хуьнал желбдай акцияр кьиле тухузва, территорияр зирзибилдикай михьзава, экологиядинни марифатдин мярекатар тешкилзава.