Марифатлу инсан, пешекар хъсан
Сулейман-Стальский райондин агьалийриз яшайишдин рекьяй къуллугъзавай комплексдин Центрада (КЦСОН-да) кIвалахзавай Алибегова Мукьминат Алисултановнадикай макъала кхьиз эгечIайла, зи фикирдиз чи бажарагълу писатель Абдулбари Магьмудова лагьай гафар хтана: «КIеве гьатайдаз куьмек гун – им инсандин марифатлувал къалурзавай са лишан я». М. Алибеговадин кIвалахдин везифаярни нубуд, кефсуз, яшлу, са гафуналди, чпиз масадан патай куьмек, дикъет, фикир гунихъ галаз алакъалу я. Ада и хиле гьакъисагъвилелди зегьмет чIугваз 16 йисалай виниз я.
КЦСОН-дин пешекар яз, Мукьминат Алисултановнади Цмуррин ва Ичинрин хуьрерай тир яшлу, кефсуз ва ялгъуз 9 касдиз яшайишдин рекьерай куьмекар гузва, абурухъ гелкъуьн тешкилнава. Кьилди къачуртIа, М. Алибегова вич гелкъвезвай инсанрин патарив гьар гьафтеда 2-3 сеферда кIвалериз физва, абурун дерди-бала, игьтияжар хабар кьазва, дердияр туькIуьрун патал чалишмишвал ийизва, яшайишдин кIвалахра абуруз куьмекар гузва: кIвализ яд тухузва, хуьрекар гьазурзава, кIвалер-гьаятар михьзава, лазимвал авайбуруз аптекайрай маса къачуна дарманар гъизва, герек чарар-документар талукь идарайриз агакьарзава.
- Мукьминат чи эверай гьай я лагьайтIа, зун кIусни гъалатI жедач, — лугьузва Цмуррин хуьряй тир Нажабат Рустамовади. – Инсан яз, пешекар яз, чун адан кIвалахдилай рази я. Мукьвара ада заз кIвализ интернет, Wi-Fi ролтер эцигунин карда куьмек гана. Ихьтин мисалар мад гъиз жеда.
- Куьмек герекзавай касдин дерди-гьал туькIуьрун неинки за зи везифа, гьакIни намусдин кар яз гьисабзава, — лугьузва М. Алибеговади. – Идалайни гъейри, гзаф крар за суваб паталдини ийизва. Кефсуз, яшлу инсан жувалай, авур кар-кIвалахдилай рази хьуни зак шадвални кутазва. Им Аллагь рази жедай карни я.
Къейд авун лазим я хьи, рикI михьи, масадан дердиникай хабар кьадай инсан, мегьрибан дишегьли хьиз, Мукьминат Алисултановна кIвалин къул хуьзвай кайвани, ферли 2 веледдин бахтлу дидени я.
М. Алибеговадин ери-бине Уллу-Гъетягърин хуьряй я. 1965-йисуз дидедиз хьайи ада 1982-йисуз юкьван школа акьалтIарна, гуьгъуьнлай яшайишдин хиляй къуллугъдай махсус пешекарвал къачуна.
1989-йисуз Мукьмината ва Цмуррин хуьряй тир Даира чпин рикIер, сирер ва муьгьуьббат сад авуна, хизан тешкилна.
Даир Алибегова яргъал йисара Цмуррин школада химиядин тарсар гана. Алай вахтунда ам куьничивилел машгъул я.
Мукьминат ва Даир Алибеговрихъ, чна винидихъ лагьайвал, 2 велед – са гадани са руш ава. Гада Роберта гьа сифте йикъарилай СВО-дин зонада вичин ватанпересвилин буржи кьилиз акъудзава. Адахъ Георгиевский хашунин орден ава.
Руш Селминаза Каспийск шегьердин ГОВД-да кIвалахзава.
«Инсандин винел патан акунар хьиз, адан рикI, руьгь, мез, фикирарни дуьз хьана кIанда»», — кхьенай А. Чехова. Чаз алава хъийиз кIанзава хьи, рикI, руьгь, фикирар дуьз инсандихъ къени хизанни жеда. Мукьминат Алисултановна Алибеговадихъ хьиз.
Текст кхьейди ва шикил ягъайди Хазран Кьасумов я
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
