Меню
6+

Сайт «Кюре»

26.06.2024 15:17 Среда
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Багьа пишкеш

Донбассдин шегьерар, хуьрер Украинадин миллетбазрикай азадзавай женгера къагьриманвал къалурзавай рухваяр садни кьвед туш. Ахьтинбурун жергеда СтIал Сулейманан райондин ЦIийи Макьарин хуьряй тир прапорщик Назаралиев Назарали Насировични ава.

Н. Назаралиев 1996-йисуз дидедиз хьана. 2013-йисуз ада школа хъсан къиметралди куьтягьна. Пуд йисалай жегьил стратегиядин метлеб авай ракетайрин кьушунрин военный академиядин филиалдик экечIна. Анаг куьтягьай 2019-йисуз Назарали Свердловскдин областдин Кытлым поселокдиз рекье туна. Украинадин мулкара военный махсус серенжемдив эгечIайла, прапорщик гуьгьуьллувилелди аниз фена. Ам Россиядин Федерациядин оборонадин министерстводин резервдин полкуниз акъатна.

Макьавиди кьве йисни зура артиллериядин 27-полкунин гаубичный дивизиондин батареядин старшина яз къуллугъна. Адан гъилик 48 аскерди къуллугъзавай. Резервда авай полк тирвиляй старшина ва адан аскерар гьина тади куьмек герекзаватIа, гьаниз ракьурзавай.

Назарали Назаралиева махсус серенжем кьиле тухузвай чилел хьайи са дуьшуьш рикIел хкизва.

- Чун Екатериновка хуьруьн патав гвай гадарнавай фермада акъвазнавай. Ктабар кIелунал зи гзаф рикI алайди я, Чкадин инсанривай хуьре библиотека авайдакай ван хьайила, зун гьаниз фена. КIелдай ктабар жагъурдайла, заз дезгедилай Расул Гьамзатован ктаб акуна. Зи вилерал стIалар акьалтна. Жуван дагъустанвидин ктаб ина аквадайдакай гьич фикирни авунвачир. Зи вилерал алай стIалар акурла, библиотекарь дишегьлиди «вахъ вуч хьанва?» лагьана хабар кьуна. Дагъустандай я лагьайла, дишегьлиди Расул Гьамзатован ктаб заз багъишна. Им зун патал лап багьа пишкеш тир. Юлдашрин патав хтайла, за абуруз Расул Гьамзатовакай суьгьбетна ва ктабдай адан шиирар кIелна.

2022-йисан ноябрдин вацра Назаралиев больницадиз аватна. 2023-йисан сентябрдиз миллетбазрин артиллериядин харцик акатай адал хирер хьана. Кьве чкадилай гъил хана. Юлдашри ам санчастуниз агакьарна. Анай вертолетда аваз Ростовдиз, ахпа Подольск шегьердиз тухвана.

Хирер сагъ хъхьайла, Назаралиев вичи къуллугъзавай Кытлым поселокда авай частуниз хъфена. ВикIегь дагьвидивай ана секиндиз ацукьиз хьанач. Екатеринбургда БПЛА идара ийидай курсар кIелна ва мад фронтдиз вичин юлдашрин патав хъфена. Женгера къалурай кьегьалвилерай алай йисан 26-февралдиз Россиядин Федерациядин Президентдин Указдалди Н.Назаралиеваз Жукован медаль гана.

(Чи корр.)

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

9