«Ватан дарда авай чIавуз...»
Дагъвияр ислягьвал кIани, низам-ахлакь авай, масадан кефи хан тийидай, мугьманперес инсанар тирди виридаз чизва. Амма, кар чкадал атайла, дагъвияр жумарт, рикI хци, уьтквем, ватанперес инсанарни я. И кар эхиримжи йисара Украинада кьиле тухузвай махсус серенжемда иштиракзавай цIудралди дагъви халкьдин векилри ачухдиз къалурзава. Къенин макъалада чаз халис дагъвияр, ватанпересар тир СВО-да гьа сифте йикъарилай иштиракзавай капитан Фазил Наврузовакай (КIварчагъ) ва мукьвара контракт кутIунна махсус серенжемдин зонадиз фенвай Альберт Агьмедовакай (ЦIийи-Макьар) куьрелди суьгьбет ийиз кIанзава.
… Ватанперес хва Фазил Наврузовакай и цIарар кхьиз ручка гъиле кьурла зи рикIел Забит Ризванован поэмадин цIарар атана:
Ватан дарда авай чIавуз,
Гьай тагудай инсан женни?...
Халкь саламат хьун паталди,
Фин тийидай аслан женни?
Хуруда асландин рикI авай Ф. Наврузовавайни Ватан хаталувилик акатайла секиндиз акъвазиз хьанач: ам махсус серенжем башламиш хьайи сифте йикъарилай СВО-дин зонада вилик жергейра ава. Алай вахтунда кьегьал хци 1-танкарин армиядин 2-мотострелковый дивизиядин ротадин командир яз къуллугъзава.
2022-йисан сентябрдин вацра Изюм шегьердин патарив кьиле фейи женгинин гьерекатра адал херни хьана. Госпиталда сагъар хъувурдалай гуьгъуьниз капитан Наврузова махсус серенжемда иштиракун давамзава.
Ватандин итижар хуьнин карда къалурай дирибашвиляй ва уьтквемвиляй Фазил Наврузоваз «Участнику специальной военной операции», «За боевые отличия» ва Суворован медалар ганва.
Мукьвара хайи хуьруьз отпускадиз хтанвай РФ-дин оборонадин министерстводин капитан Фазил Наврузовахъ галаз КIварчагърин хуьруьн поселенидин администрациядин кьил Завидин Загьирбегов гуьруьшмиш хьана, кьегьал хцин дерди-гьал хабар кьуна, адан гуьгьуьл къачуна.
Хуш гьалара кьиле фейи гуьруьшдал З. Загьирбегова капитан Наврузовахъ сагъламвал, хатасуз къуллугъ хьана кIанзавайди лагьана.
***
Капитан Фазил Наврузов хьтин халис ватанперес рухвайрилай чешне къачузвай кьегьалар чи арайрани тIимил авач. Ватан патал регьятди тушир алай вахтунда гзафбур гуьгьуьллудаказ СВО-дин зонадиз физва, гъиле яракь кьуна, Ватан хуьнин къаравулда акъваззава.
И йикъара ЦIийи-Макьарин хуьряй тир 49 йисан яшда авай Альберт Агьмедова контракт кутIунна, гуьгьуьллубурун «Каспий» батальондик экечIна. И кардин тереф адан хизанди ва дустари, гьакIни райондин руководстводи хвена.
Общественный хатасузвал хуьнин рекьяй райондин администрациядин Кьилин заместитель Абуталиб Фатулаев контрактник А. Агьмедовахъ галаз гуьруьшмиш хьана. Анал Абуталиб Фатулаева къейд авурвал, «Каспий» батальонда къуллугъзавайбуру стратегиядин метлеб авай везифаяр тамамарзава, абур маса подразделенийриз ракъурзавач. Батальонда къуллугъзавайбурухъ галаз алакъалу вири месэлаяр Дагъустандин Кьил Сергей Меликован кьетIен гуьзчивилик кваз жезва.
Ватандин хушбахтвал патал къуллугъ ийиз физвай ватанперес дагъвидиз бюджетдай 100 агъзур манат пул, алава яз Мергьеметлувилин «Умуд» фондунин патайни 100 агъзур манат пул гана. ГьакIни контрактникди республикадин бюджетдай са сеферда гузвай гьакъи тир 200 агъзур манат пулни къачуда.
Райадминистрацияда Абуталиб Фатулаевахъ галаз кьиле фейи гуьруьшдилай гуьгъуьниз Альберт Агьмедов батальон бинеламиш хьанвай чкадиз рекье гьатна. И рехъ сагъ-саламатди хьурай!
Хазран Кьасумов
Къайгъударвал ийизва
КIваливай, хизандивай яргъа хьана цIудралди чи райондин агьалийри Донбассда кьиле физвай военный махсус серенжемда иштиракзава. Абурун хизанрин гьакъиндай къайгъударвал авун, игьтияжар таъминарун, гьар са рекьяй куьмек гун – ибур вири дережайра чкадин властрин органрин вилик акъвазнавай эвелимжи везифайрикай я.
И жигьетдай Сулейман-Стальский райондани еке кIвалах тухузва. «СВО-дин иштиракчи ва адан хизан гьич са куьнихъни муьгьтеж яз амукьна кIандач» — гьисабзава райондин руководстводи.
Герейханован хуьруьн (1-отделение) Карл Марксан тIварунихъ галай куьчеда яшамиш жезвай СВО-дин иштиракчидин диде, зегьметдин ветеран Гуьлзада Рагьимхановади са тIимил вахт вилик вичин кIвализ тIебии газ гъунин патахъай куьмек гун тIалабнай. И тIалабун кьилиз акъуднаватIа ахтармишун патал «Жилищно-коммунальное хозяйство и благоустройство» МКУ-дин кьилин пешекарар Мустафа Мустафаев ва Жабраил Агъарзаев галаз чун Герейханован хуьруьз фена.
- Чна арза гайидалай гуьгъуьниз са акьван вахт фенач, пешекарар атана, чи кIвализ газ гъана, — лугьузва Гуьлзада Мирзебалаевнади. – И къайгъударвиляй чна райондин Кьил Саид Темирхановаз, Герейханован хуьруьн поселенидин администрациядин кьил Руслан Алдыроваз рикIин сидкьидай сагърай лугьузва. Идалайни гъейри, эхиримжи йисара арадал атанвай чи куьчеда къирни цанва, дуьзмишунин кIвалахар кьиле тухванва.
МКУ-дин кьилин пешекар Мустафа Мустафаева чаз алава хъувурвал, социальный программадай эхиримжи вахтара СВО-дин иштиракчияр ва абурун хизанар яшамиш жезвай са шумуд хуьре кIвалериз газ тухванва, и кIвалах давамни ийизва.
- Райондин руководстводи ийизвай къайгъударвилин кIвалахрихъ галаз сад хьиз, чаз, дидейриз, СВО-ни фад куьтягь хьана, анин иштиракчияр сагъ-саламатдиз кIвалериз хтана кIанзава, — лугьузва Гуьлзада дидеди. – Аллагьдин кьадар чIехи я. Иншаллагь, чаз гьа югъни аквада.
Хазран Кьасумов
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
