Меню
6+

Сайт «Кюре»

04.06.2024 15:23 Вторник
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Кьегьалрин буржи

Алай вахтунда Сулейман-Стальский райондай фена Донбассда кьиле тухузвай военный махсус серенжемда 400-далай виниз кьегьалри иштиракзава. Абурун арада контрактникар, тамам тушир мобилизациядик акатайбур ава.

Лагьана кIанда, СВО-дин зонадиз фин патал Россиядин Яракьлу Къуватрихъ галаз контракт кутIунзавай кьегьалрин – райондин агьалийрин кьадар къвердавай артух жезва. Мукьвара Агъа-СтIалрин хуьряй тир 29 йисан яшда авай Муса Мирзебегова ва Сийидрин хуьряй тир 24 йисан яшда авай Гьажимислим Мисриханова военный къуллугъдал фин патал контрактар кутIунна. Жегьилри им чпин гражданвилин буржи яз гьисабзава, хизанрини абурун тереф хуьзва.

СВО-дин гележегдин аскеррихъ галаз райондин Кьил Саид Темирханов гуьруьшмиш хьана. Ада кьегьал ксарин патриотвилин къастуниз, Ватан хуьн, фадлай гуьзлемишзавай гъалибвал мукьва авун кIан хьуниз еке къимет гана.

Гьа са вахтунда, райондин Кьил Саид Темирханова Муса Мирзебеговаз ва Гьажимислим Мисрихановаз контрактникриз авай льготрикай, социальный рекьяй авай алава серенжемрикай, муниципальный дережада абуруз гузвай куьмекдикай лагьана. Мадни, ада алава хъувурвал, СВО-дин гьар са иштиракчидиз социальный паспортар туькIуьрзава, ана абурун хизанрин яшайишдин гьалар, асул месэлаяр ва игьтияжар къалурзава. Абурун хизанриз социальный рекьерай куьмек гунин вири месэлаяр райондин Кьилин кьетIен гуьзчивилик ква, абур гьялун патал серенжемарни кьабулзава.

Контрактникри Ватандиз къуллугъ ийиз гьазур тирдан тереф хуьн яз, абуруз райондин бюджетдай 100 агъзур манат пул (гьар садаз) гана. Идалайни гъейри, райондин Кьил Саид Темирханова абуруз гьар садаз Мергьеметлувилин «Умуд» фондунин патай 100 агъзур манат пулни гана.

Къейд ийиз кIанзава хьи, райондин Кьилин решенидалди СВО-дин зонада къуллугъ ийиз фин патал контракт кутIуннавай дяведин къуллугъдал алайбуруз (военнослужащийриз) алай йисан 1-майдилай эгечIна 100 агъзур манат пул гузва.

Чухсагъулдин келимаяр лугьунихъ галаз санал, райондин Кьил Саид Темирханова контрактникрихъ мягькем сагъламвал, сагъ-саламатдиз къуллугъ авун ва махсус серенжем гъалибвилелди фад куьтягь хьун кIанзавайди къейдна.

Хазран Кьасумов

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3