Меню
6+

Сайт «Кюре»

04.06.2024 15:28 Вторник
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Тешкиллувал ва еришар аваз

Гьи муниципалиттет къа-чуртIани, адан бюджет, социальный рекьерай вилик фин, агьалийрин яшайиш хъсан хьун экономика авай гьалдилай гзаф аслу я. Сулейман-Стальский райондин экономикадин кьилин хел лагьайтIа, хуьруьн майишат я. Районда хуьруьн майишатдин суьрсет гьасилунал 2 СПОК, хуьруьн майишатдин 25 кархана, лежбервилинни-фермервилин 45 майишат, 960 кас арендаторар ва 20000-далай виниз агьалийрин хсуси куьмекчи майишатар машгъул жезва.

Районда йисандавай-суз багъларин ва уьзуьмлухрин майданар, мал-лапагдин кьадар артух, кIватI хъийизвай суьрсетдин кьадар гзаф жезва. ИкI, алатай йисуз районда 1843 тонн техил, 30 000 тонндилай виниз емишар, 17 000 тонндилай виниз ципицIар, 29 000 тонн салан майваяр кIватI хъувуна.

Райондин хуьруьн майишатдин суьрсет гьасилзавай карханайрихъ, КФХ-рихъ ва арендаторрихъ гъиле авай йисни агропромышленный комплексдин хиле агалкьунар аваз акьалтIарунин къаст ава.

- Хуьруьн майишатдин карханаяр ва зегьметчияр паталди гатфарин ва гатун варцар кIвалахрин жигьетдай къизгъинбур я, — лугьузва хуьруьн майишатдин ва суьрсетдин управленидин начальник Къазиагьмед Къазиагьмедова. – Уьзуьмлухрани багълара, саларани производстводин маса хилера агротехникадин серенжемар кьиле тухунихъ галаз санал, алай вахтунда общественный мал-къарадиз алафар гьазурунин, гад кIватI хъувуниз гьазурвилер акунин ва маса кIвалахар кьиле тухузва. Алай вахтунин кIвалахар хъсан тешкиллувал ва йигин еришар аваз давамни ийизва.

Районда сифтебурукай яз мал-къарадиз алафар гьазурунив республикада кIвенкIвечи хуьруьн майишатдин кархана тир «АлиЯк» ООО эгечIнава.

Карханадихъ 112 гектарда цанвай гзаф йисарин векьин уьруьшар ава. И йикъара махсус агрегатар галай цIийи маркайрин тракторар векьер ягъунал, абур маргъвара тунал ва кленкадалди кIевнавай сенаждин элкъвей туькар кьунал машгъул я. Гьазур хьайи туькар хутахиз, мал-къара алай чкайрал къайдада аваз эцигзава. 10 гектарда люцерна ЛПХ-дини цанва.

Санлай къачурла, гзаф йисарин векьин уьруьшри 449 гектар тешкилзава, идакай 239 гектар карханайринбур я. Са КФХ-дихъни 151 гектарда цанвай са йисан векьин уьруьшар ава.

Векьер ягъунин кIвалахрив ДаркIуш-Къазмайрин, ЦIийи-Макьарин, Чуьхверхуьруьн, Эминхуьруьн хуьрерин лежбервилинни фермервилин майишатар, ЛПХ-яр ва кьилдин ксарни эгечIнава. Векьер чIурухъан чкайрай, векьин уьруьшрай, багъларин арайрай, къурухрай махсус агрегатар галай тракторралди, бензиндин косилкайралди ва дергесралди язава. Яваш-яваш общественный мал-къарадиз алафар гьазурунив Герейханован, Агъа-СтIалрин, Кьулан-СтIалрин, Кьасумхуьруьн, Вини-СтIалрин, ЕIварчагърин ва амай АСП-рани эгечIда.

Пешекарри лугьузвайвал, мукьвал-мукьвал марфар къуникди, цIинин йисуз векьин уьруьшар, багълара, къурура векьин кьакьан бегьер ава. Анрай бес кьадар алафар гьазуриз жедайдак умуд кутазва.

Районда алай йисан бегьер патал 687 гектарда зулун магьсуларни цанва. Идакай 440 гектардин никIериз миянардай шейэрни вегьенва.

Идалайни гъейри, КФХ-ри, СПК-ри ва ЛПХ-ри 185 гектарда гатфарин къуьлни цанва.

Виридалайни гзаф майданра техилар (355 гектарда) «АлиЯк» ООО-ди цанва.

Санлай къачуртIа, магьсулрин никIерин гьал хъсан я. Анрай техилдин хъсан бегьер кIватI хъувуник умуд ква. Вири санлай алай йисуз 871 гектардай гад кIватI хъийида.

Районда салан майвайрин культураяр, асул гьисабдай, кьилдин ксарин куьмекчи майишатра ва арендадин участокра цанва. Санлай абурун майданри 1065 гектар кьазва. Идакай 480 гектар «борщдин набордин няметар я.

Райондин производстводин маса хилерани кIвалахар чпин вахтара кьиле тухузва. ИкI, алай йисан гатфариз райондин карханайри («Зардиян», «Полоса» ва «Сал» ООО-ри) санлай 659 гектарда шуьмягъин, ичин, пIинидин багълар кутунва. 5 гектарда шефтелин багъ Алкьвадрин хуьре ЛПХ-дини кутунва.

Гъиле авай йисуз 234,5 гектарда цIийи уьзуьмлухарни кутунва.

735 гектар уьзуьмлухриз ва 230 гектар багълариз миянардай шейэрни вегьенва, вири майданра азаррин ва зиянкар гьашаратрин аксина дарманар янава, гатфарин агротехникадин кIвалахар кьиле тухвана акьалтIарнава.

Уьзуьмлухрани багълара агротехникадин серенжемар галай-галайвал ва чпин вахтара кьиле тухун давам жезва.

Хазран Кьасумов

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

5