Емишарни гьасилзава, техилни

Курхуьрелай тир чилин къадир авай, зегьметдал рикI алай тежрибалу механизатор ва арендатор Сефербег Шайдаевакай макъала кхьидайла, зи рикIел Максим Горькийди лагьай гафар хтана: «Заз зи вири уьмуьрда кIвалахиз кIандай ва чпелай кIвалах алакьдай инсанар халис игитар яз аквада».

Сефербег Шайдаеван участокдиз зун райондин хуьруьн майишатдин ва суьрсетдин управленидин начальникдин заместитель Гьамидин Абдулкъафаровахъ галаз фена.

- Сефербег стха районда гьакъисагъвилелди зегьмет чIугвазвай арендаторрикай сад я лагьайтIа, бажагьат зун ягъалмиш жеда, — лугьузва Гь. Абдулкъафарова. – Ада гьар йисуз гьам техилдин, гьам емишрин тарифдин бегьерар кIватI хъийизва, идалди халкьдин суфра берекатлу авуник вичин пай кутазва. Сефербег хьтин зегьметкеш инсанриз аферин ва баркалла.

С. Шайдаева 1977-йисуз механизаторвилин пеше къачуна, 27 йисуз «Самурский» совхозда жуьреба-жуьре маркайрин тракторрал кIвалахна, никIера цанар цана, багълариз азаррин ва зиянкар гьашаратрин аксина дарманар яна, парар дашмишна. КIвенкIвечи трактористдин шикил 15 йисуз совхоздин Гьуьрметдин доскада хьана.

Совхозар чкIайла, чилин участок арендада къачуна, Сефербег емишар ва техилар гьасилунал машгъул хьана. Алай вахтунда адан кIвачихъ 30 гектар къуьлуьн никIер ва ичин, пIинидин, хутун, машмашин къелемар цанвай 1 гектар багълар гала. Иесивилелди гелкъуьн тешкилнавай анагар хъсан гьалда ава. ИкI, арендаторди къацариз чIуру хъчар тергдай гербецидар янава, никIериз миянардай шейэр вегьенва, багълариз ятар ганва.

Гьамидин Абдулкъафарова чаз лагьайвал, алай йисан бегьер патал районда 2100 гектарда техилар цанва. Магьсулар цанвай майданрал гьалтайла, Курхуьруьн поселение районда вилик жергейра ава – ина лежбервилин майишатри ва 5 кас арендаторри 300 гектарда къуьл ва мух цанва.

- Чи хуьруьн кьилихъ чIехи паласа гала, гзаф йисара анаг са менфятни къачун тийиз гьакI гадарна авай, — лугьузва Сефербег Шайдаева. – И гьал акур чна, 5-6 кас хуьруьнвийри, паласада чилин участокар арендада къачуна, ана зулун магьсулар цазва, майданар гзаф туштIани, багъларни кутунва. Яд тагузвай никIерай чна 20 центнердив агакьна техил вахчузва.

Гьелбетда, хуьруьн чкада кIвалахзавай, суьрсет гьасилзавай касдал четинвилерни тIимил ацалтзавач. Хсуси техника, хуьруьн майишатдин алатар (куьтенар, культиваторар, дискаяр, опрыскивателар) авачир касдиз мадни четин я. И кар фикирда кьуналди Сефербег Шайдаева вичиз «МТЗ-82» маркадин трактор ва комбайни маса къачуна. Вичин никIерани багълара агротехникадин кIвалахар тухунилай гъейри, арендаторди гьа техникадалди хуьруьн маса арендаторриз ва лежбервилинни фермервилин майишатриз чуьлдин кIвалахра куьмекарни гузва.

Тежрибалу механизатор ва арендатор тир Сефербег Шайдаеваз зегьметди руьгьдин таъминвал, гьар йисуз кIватI хъийизвай техилдинни емишрин бегьерди шадвал гузва.

Текст кхьейди ва шикил ягъайди Хазран Кьасумов я.