Меню
6+

Сетевое издание «Кюре»

23.07.2020 09:54 Четверг
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Хъсан крар жумарт инсанрилай алакьда

Райондиз гьар са рекьяй куьмекар гузвай меценатриз райондин руководстводи, агьалийри чухсагъул лугьузва.

Эхь, хъсан крарни кIвалахар анжах жумарт инсанрилай алакьда.

Малум тирвал, райондин хуьрера яшайишдин кIеви амукьаяр кIватIунин ва тайинарнавай чкайрал хутахунин кIвалахар виликдай хуьрерин поселенийрин администрацийри чпин къуватралди ва «Касумкентсервис» ООО-ди кьиле тухузвай. 2019-йисан I-январдилай и кIвалах, федеральный закондихъ галаз кьадайвал, «Экологи-КА» ООО региональный оператордин хиве гьатна. Гьайиф хьи, региональный операторди зирзибил кIватIунин ва Дербентдин полигондал хутахунин кIвалах тамамвилелди кьилиз акъуднач. ИкI, гьар вацра кIватI жезвай 1700-2000 куб. зирзибилдикай операторди хутахзавайди 100 куб. тир.

Идалайни гъейри, региональный оператордивай яшайишдин кIеви амукьаяр (ТКО) кIватIунай, хутахунай агьалийривай пул кIватIунин кIвалахни менфятлудаказ тешкилиз хьанач. КIватIай пул махсус организациядал саки агакьзавачир. Вири и татугайвилер себеб яз ТКО кIватIунай ва хутахунай региональный оператор «Касумкентсервис» ООО-диз 8000063 манат буржлу хьана.

Дуьньяда регьимлу инсанар авачиз туш, лугьузва мисалда. Халкьдин кьегьал рухваяр, меценатар тир Имам Яралиев ва Салман Бабаев «Касумкентсервис» ООО-дин куьмекдиз атана: абуру кIвалахзавайбуруз мажибар, налогар ва ГСМ къачунай хьанвай буржар алудун патал 6 миллион манат пул гана. Идакай 2 миллиондилай виниз яшайишдин кIеви амукьаяр кIватIунин кIвалахда къайда тун патал чара авунва.

Лагьана кIанда, алай йисан апрелдин вацрани кьегьал хва Имам Яралиева «Касумкентсервис» ООО-дин работникриз зегьметдин гьакъи гунай аламай буржар алудун патал 500 агъзур манатдилай виниз пул ганай. Идалайни гъейри, меценатди виликан йисара райондин сервисдин къуллугъриз санлай чпин къимет 20 миллион манат тир яшайишдин кIеви амукьаяр кIватIдай махсус 4 машин (2 «КАМАЗ» ва «ГАЗ-ель» маркадин 2 самосвал) ганай.

Меценатри пулунин такьатралди куьмек гун ва «Экологи-КА» региональный оператординни «Касумкентсервис» ООО-дин арада Агентский икьрар кутIунун себеб яз районда ТКО кIватI хъувунин ва хутахунин кIвалахда хъсанвилихъ дегишвилерни кьиле фена. Дагъустан Республикадин экологиядин ва тIебиатдин ресурсрин министерстводихъ галаз меслятнавай «рекьерин карта» туькIуьрнава, абонентский отдел арадал гъанва. Санлай къачурла, районди яшайишдин кIеви амукьаяр кIватIунин ва хутахунин кIвалахда къайда тунва.

Лагьана кIанда, Имам Яралиев ва Салман Бабаев государстводинни хсусивилин юлдашвилин шартIара ТКО кIватIдай полигондин проект гьазурунин ва эцигунин кIвалахда, гьакIни «Михьи район» пилотный проект уьмуьрдиз кечирмишуна иштиракиз гьазур я. Идан патахъай райадминистрациядинни меценатрин арада талукь икьрарвал ава. Меценатри районда санитариядинни эпидемиологиядин ярамиш тир гьалар таъминарун патал куьмек гуда.

***

Райондин меценатри гузвай куьмекдикай рахадайла, ихьтин са кардикайни лугьуз кIанзава. Райондин центральный больницадин территорияда Ставрополдай атай «Компрессор-центр» тешкилатдин пешекарри дизелдин генератор эцигна.

Меценат Салман Бабаеван мергьеметлувилин такьатрин гьисабдай маса къачунвай (FE) ДГУ 100/400 дизелдин генератордин къиметди, хкунин ва кIватIунин харжиярни кваз, 705 агъзур манат тешкилзава. И такьатрикай 590 агъзур манат – генератордин, 100 агъзур манат – кIватIунин кIвалахрин ва 15 агъзур манатни хкунин къимет я. Аварияр хьана, электроэнергия хкатай дуьшуьшра 100 кВт-дин къуват авай дизелдин электростанцияди райондин ЦРБ ара атIунар авачиз электроэнергиядалди таъминарда.

РикIел хкиз кIанзава хьи, коронавирусдин инфекция чкIунихъ галаз алакъалу яз санитариядинни эпидемиологиядин гьалар хъсанардай серенжемар кьиле тухунин макьсаддалди Агъа-СтIал Къазмайрилай тир Салман Бабаева Сулейман-Стальский район вилик финин фондуниз 5 миллион манатдин кьадарда аваз мергьяметлувилин такьатар ганай.

Райондиз гьар са рекьяй куьмекар гузвай меценатриз райондин руководстводи, агьалийри чухсагъул лугьузва.

Эхь, хъсан крарни кIвалахар анжах жумарт инсанрилай алакьда.

Х. Кьасумов

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

1