Муниципальный программадай
Федеральный, республикадин ва муниципальный программаяр уьмуьрдиз кечирмишуни, инвестицийрин проектар кардик кутуни, маса рекьериз хьиз, Сулейман-Стальский районда экономика мягькемаруниз ва хуьруьн майишат вилик тухунизни куьмекзава. ИкI, «2021-2025-йисара районда багъманчивал вилик тухунин план» муниципальный программадин сергьятра аваз тухузвай кIвалахди вичин хъсан нетижа гузва.
Программадин сергьятра аваз районда 5 йисан къене 2220 гектарда емишрин багълар кутун лазим я.
2022-йисан гатфарихъай кутур жегьил багъларни кваз районда хуьруьн майишатдин карханайрихъ, лежбервилинни фермервилин майишатрихъ ва арендаторрихъ 3941 гектар багълар ава. Абурукай 2498 гектар бегьердал атанвай, 1443 гектар жегьил багълар я. Мадни, багъларикай 410 гектар 2017-2022-йисара кутунвай интенсивный багълар я.
Алай йисан план 219 гектар яз, гатфарихъай 682 гектарда цIийи багълар кутуна. Алай йисан зулухъай ва 2023-йисан гатфарихъай мадни 1147 гектарда шуьмягъин ва емишрин багълар кутун планламишнава.
Кьве йисан къене муниципальный программада къалурнавай 2220 гектардикай 1199 гектарда багълар кутунва. Алай йисан зулухъай кутун планламишнавай багъларни гьисаба кьуртIа, им багълар кутунин 5 йисан план артухни алаз тамамарун жеда.
Алай йисан зулухъай ва къведай йисан гатфарихъай «Полоса» ООО-ди суперинтенсивный технологийрихъ 100 гектардин майданра емишрин ва адет хьанвай къайдайрай 1000 гектардин майданра шуьмягъин багълар кутун пландик кутунва.
Чил гьазурнава, цадай шуьмягъин къелемарни ава, сертифицироват авунвай къелемар Дагъустандилай къецяй хкида.
Идалайни гъейри, карханадихъ 500 гектардин майданра чуьхверин багълар кутадай фикирни ава.
Багъмачивал вилик тухуник «Зардиян» ООО-ди лайихлу пай кутазва. Карханадихъ 153 гектар кIерецин багълар ава. Гележегда ихьтин багъларин майданар 270 гектардив агакьарда. И кар патал 350 гектарда яд стIал-стIал гудай къурулуш кардик кутунва, 30 гектар чил гьазурнава.
«Восход» ООО-дихъ Цмуррин хуьруьн зонада ва «Зардиян» участокда 126 гектар багълар ава. 2022-2023-йисара карханада 100 гектарда шуьмягъин цIийи багълар кутун планламишнава.
«Сал» ООО-ди алай йисан зулуз 17 гектарда къене цил авай емишрин (пIинидин) багълар кутун патал чил гьазурнава.
Лагьана кIанда хьи, районда муниципальный программадай уьзуьмчивални вилик тухузва.
2022-йисан гатфарихъай кутур цIийи уьзуьмлухарни кваз, алай вахтунда районда 1959 гектардин майданар уьзуьмлухри кьунва. ЦIийи уьзуьмлухар кутаз хъижедай чилин участокар районда саки амач.
Къунши районрин мулкарал 568 гектарда (455 гектар – Мегьарамдхуьруьн районда ва 113 гектар – Дербент районда) цIийи уьзуьмлухар кутунва.
Лагьана кIанда, карханайри уьзуьмлухар цик квай гъвечIи-гъвечIи участокра, чIурухъан чкайра ва яд мажбурвилелди (насосрин куьмекдалди) акъуддай гуьне квай чкайра кутазва.
Алай йисан гатфарихъай, план 35 гектар яз, 228 гектарда цIийи уьзуьмлухар кутуна. Алай йисан эхирдалди «Дербент Агро» ООО-ди 50 гектарда Мегьарамдхуьруьн районда, «Гюльгери вацI» ООО-ди 65 гектарда Дербент районда, Р. Къазиагьмедов ЦIийи Макьарал 7 гектарда ва М. Алхасов 6 гектарда КIварчагъа цIийи уьзуьмлухар кутаз гьазур я.
Районда багъманчивал ва уьзуьмчивал вилик тухунин кIвалахар ДаркIуш-Къазмайрин, ЦIийи-Макьарин, Эминхуьруьн ва Герейханован хуьруьн поселенийра хъсандиз кьиле физва.
- Са рахунни алачиз, багъманчивални уьзуьмчивал райондин хуьруьн майишатдин асул хилерикай я, — лугьузва хуьруьн майишатдин ва суьрсетдин управленидин начальникдин заместитель Гьамидин Абдулкъафарова. – Гьавиляй райондин руководстводи, инвесторри и хилер вилик тухуниз, абуру кьунвай майданар артухаруниз кьилин фикирни гузва. Ида райондин агьалийриз кIвалахдин алава чкаярни арадал гъизва.
Хазран Кьасумов
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
