Меню
6+

Сетевое издание «Кюре»

Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Лайихлу пай кутуна

Ватандин ЧIехи дяведин йисара фашистрин Германиядин винел гъалибвал къачуник Татарханрин хуьруьн агьалийри чпин лайихлу пай кутуна.

1936-йисуз хуьре Ленинан тIварунихъ галай колхоз тешкилнавай. Октябрдин инкъилаб хушвилелди кьабулай хуьруьнвийри колхозда зегьмет чIугвазвай, абуру техил, малдарвилин суьрсет гьасилзавай. Амма… 1941-йисуз башламишай дяведи колхозчийрин къени ниятар чIурна. Хуьряй 94 кас фронтдиз фена. Абурукай анжах 24 касдиз Ватандиз хкведай бахт акуна, амай 70 татарханвиди дяведин къати женгера чпин жегьил чанар къурбанд авуна.

Ватандин ЧIехи дяведа кьегьалвилер къалурайбурукай яз завай сифте нубатда 1921-йисуз Татарханрин хуьре дидедиз хьайи Велимет Якьубован тIвар кьаз жеда. Дяве башламишай сифте йикъарилай эхирдалди ам женгерин яцIа хьана. Гвардиядин лейтенант В. Якьубовал женгера хирерни хьана. Дяведа гъалибвал къазанмишуник еке пай кутунай адаз «Яру Гъед», «Баркалладин» орденар, са шумуд медаль гана.

Дяведин йисара татарханви Гьажикъурбан Гьажимегьамедова РагъэкъечIдай патан фронтдин 83-дивизиядин 252-полкунин составда аваз Москвадин, Можайскдин, Великие Лукидин патарив хьайи, Смоленск, Курск, Городок ва маса шегьерар азад хъувунин женгера иштиракна. Гвардиядин майор Гь. Гьажимегьамедов Кенигсберг шегьер патал кьиле фейи женгера викIегьвал къалурунай «Красная Звезда» ордендиз лайихлу хьана. Адахъ Александр Невскийдин орден, са шумуд мадални авай.

Татарханрин хуьряй 17 касди (абурукай 6 дишегьлияр тир) Хасавюртда ва масанра немсерин вилик пад кьадай дерин къаналар эгъуьнунин кардани иштиракна.

Дяведин йисара хуьруьн жемятди фронт суьрсетдалди, чими гуьлуьтралди, бегьлейралди таъминарун патални зегьмет чIугуна. Дяведай набут яз хтай Яхши Агьмедова гьа четин йисара колхоздизни регьбервал гана, колхозда къайда туна, жемят дарвиляй акъудна. Гьич тахьайтIа, Я. Агьмедов колхоздин председатель тир йисара зегьметдин йикъаз 3 килограмм техил ва маса суьрсет гуз хьанай.

Х. Гьажибалаев

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

3