Нубатдин совещанидал

Анал чеб чпи идара ийидай чкадин векилвилер гвай органриз зулухъай сечкияр кьиле тухуниз гьазурвилер аквазвай гьалдин гьакъиндай ва гьакIни район яшайишдинни экономикадин рекьерай вилик тухунин месэлайриз килигна.

Анал чкадин самоуправленидин векилвилер гвай органриз сечкияр кьиле тухуниз аквазвай гьазурвилерин гьакъиндай райондин ТИК-дин председатель Нариман Мейланован куьруь информациядихъ яб акална. Ада къейд авурвал, алай йисан 26-июндилай 26-июлдалди чпин кандидатураяр къалурзавайбурун арзаяр кьабулна, гьакIни абурун гьакъиндай делиларни кIватIна. «Сад тир Россия», КПРФ, «Яблоко» ва «Справедливая Россия» партийрин векилрилай 162 депутатдин чкаяр патал 220 арза атана. Алай вахтунда а документар ахтармишунин ва кандидатураяр регистрация авунин кIвалахар кьиле тухузва.

И месэладай анал вичин фикирар, теклифар гваз райадминистрациядин Кьилин сад лагьай заместитель Лацис Оруджев рахана.

И месэладай рахадайла райондин Кьил Нариман Абдулмуталибова сечкидин комиссийрин членринни сесер гузвайбурун арада кIвалахда ачухвал, гъавурдик кутун хьун важиблу тирди, законодательстводин истемишунар чIуруниз рехъ тагун герек тирди къейдна.

Гуьгъуьнлай Нариман Абдулмуталибов алатай совещанийрал гайи протоколдин тапшуругъар, кьилди къачуртIа, алай йисан 13-июлдин 15-нумрадин протоколдин, кьилиз акъуднавай гьалдал акъвазна. Ана гьар рекьерай 30 далай виниз тапшуругъар ганвай. Абур мад сеферда рикIел хкана ва кьилиз акъудзавай гьалдикай лагьана, тапшуругъар гана, энгеларзавайбуруз тагькимарна.

Совещанидал гьакIни депутатрин райондин Собранидин председатель Штибег Мегьамедханов, райадминистрациядин Кьилин 1-заместитель Лацис Оруджев, УМИЗ-дин директор Назир Гьасанов, УКС-дин руководитель Роберт Мейланов, РУО-дин начальникдин заместитель Къачабег Аминов ва са жерге хуьрерин поселенийрин администрацийрин кьилерни рахана.

Гуьгъуьнлай анал рахай райадминистрациядин экономикадин отделдин начальник Саният Вагьабовади къейд авурвал, ведомствойрин уртах комиссиядин протоколрин тапшуругърин планламишнавай дережаяр саналди тир (совокупный) доходдай 108%, эменнидин налогдай 143% ва госпошлинадай 103% ацIурнава. Гьа са вахтунда бязи рекьерай планар кьилиз акъудиз хьанач. И гьални коронавирусдин пандемиядихъ галаз алакъалу я.

Совещанидин кIвалахдин нетижаяр эхирдай райондин Кьил Нариман Абдулмуталибова кьуна.