Муаллимрин конкурс ва адан гъалибчи

Ана райондин школайра лезги чIалан ва литературадин тарсар гузвай 8 муаллимди иштиракна: Эльвира Тагьирова (Шихидхуьруьн СОШ), Мадина Ферзилаева (Агъа-СтIалрин СОШ), Нарима Балиева (Герейханован 1-нумрадин СОШ), Эльза Гьажимурадова (Асалдхуьруьн ООШ), Тамила Султанагьмедова (Вини-СтIалрин СОШ), Сефербег Мегьамедов (Цмуррин СОШ), Альберт Эмирбеков (Чуьхверхуьруьн СОШ), Девришбег Жабраилов (Птидхуьруьн ООШ). Муаллимдин пешекарвилин дережадиз ва алакьунриз 6 касдикай ибарат тир жюриди (председатель ИМЦ-дин директор Муминат Бабаханова, членар Назират Азимова, Гуьзел Межидова, Рамиз Идрисов, Регина Агьмедова, Зурият Султанагьмедова) къимет гана.

Нетижада, 133 балл къачуналди, 1-чкадиз Агъа-СтIалрин СОШ-дин муаллим Мадина Ферзилаева лайихлу хьана. 2-чка, 120 балл къачуналди, Тамила Султанагьмедовади ва 3-чка, 116 балл къачуналди, Нарима Балиевади кьуна.

Конкурсда иштиракай ва тафаватлу хьайи муаллимриз райондин образованидин управленидин грамотаяр, Арбен Къардашан «Хкягъаяр» тIвар алай ктабар, Агъа-СтIалрин поселенидин патай (кьиле Надыр Эфендиев аваз) пулунин пишкешар гана.

Гила чна чи газет кIелзавайбуруз «2023-йисан дидед чIалан лап хъсан муаллим» лагьай тIварцIиз лайихлу хьанвай Ферзилаева Мадина Шихзадаевнадикай суьгьбет ийида.

Мадина Ферзилаева 1983-йисуз Агъа-СтIалрин хуьре дидедиз хьана.

Хайи хуьруьн юкьван школа лап хъсан къиметралди акьалтIарай Мадина 2000-йисуз вичин хушуналди Дербентдин педагогический колледждик экечIна. Гьеле кIелзавай йисара Мадинади жуьреба-жуьре конкурсра иштиракиз вич гележегдин пешедал лап рикI алай студент яз къалурнай. 2003-йисуз колледж яру дипломдалди акьалтIарай жегьил пешекар хайи хуьруьн школадиз дидед чIалан тарсар гуз хтана.

«- Зи рикIе гъвечIи чIавалай муаллим хьунин къаст авай. Ингье 20 йис я за хайи хуьруьн школада акьалтзавай несилдиз чирвилерни тербия гуз. Муаллимдиз диплом, дережа хьун тIимил я. Муаллим чIехи искусстводин иеси хьана кIанда – аялар кIан хьунин искусстводин», — лугьузва Мадина Шихзадаевнади.

Адахъ дерин чирвилер, тежриба, вичин пешедал ва аялрал гзаф рикI ала.

Адаз цIийивилер твазвай муаллим лагьайтIа, чун кIусни ягъалмиш жедач. Вичин тарсара ада цIийи технологийрикай менфят къачузва. Адан аялар чIалан олимпиадайрин призерар, гъалибчияр я. Абуру флешмобра, конференцийра иштиракзава. «Лезги газетди» районда кьиле тухвай чIалан олимпиадада адан ученица Замина Шихнебиевади 3-чка кьуна.

- Ачух тарсарни Мадина муаллимди йиса са шумуд тухузва ва адан ихьтин тарсариз тежриба къачуз райондин амай школайрин муаллимарни къвезва, — лугьузва школадин директор Феликс Агъамирзоевича.

Разивилин келимаяр Мадина Шихзадаевнадин гьакъиндай РУО-дин ИМЦ-дин директор Муминат Бабахановади, ИМЦ-дин методист Назират Азимовади, дидед чIаларин муаллимрин Ассоциациядин руководитель Гуьзел Межидовади лагьана.

Ам гьар са цIийи классдив са жуьреда, алатай классрилай тафаватлу яз, маса къайдада эгечIзава.

М. Ферзилаева, аялрин рикI алай муаллим хьиз, абурун диде-бубайрини гьуьрметзавайбурукай сад я. Ада сифте нубатда аялрин тербиядиз артух фикир гузва. Вичин тежриба жегьил муаллимризни чирзава.

Мадина муаллимдин зегьметдиз школадин руководстводини къимет тагана тунвач. Ам са шумудра гьуьрметдин грамотайриз лайихлу хьана.

Тежрибалу муаллим, хуьруьнвийрихъ галаз гьуьрмет-хатур аваз яшамиш жезвай Мадина Шихзадаевна хъсан уьмуьрдин юлдаш, пуд аялдин гьуьрметлу дидени я.

Чнани, Мадина муаллимдиз хьанвай агалкьун мубаракзава. Квехъ чандин сагъвал, кIвалахда агалкьунар, чи халкь, Ватан гьар са хъсан кардалди машгьурдай ученикарни хьурай.

Асият Мирзалиева