Баркаллувилин ва дамахдин аллея

Идан метлебни хуьре Донбассда кьиле тухузвай военный махсус серенжемда иштиракзавайбурун гьуьрметдай Баркаллувилин ва дамахдин аллея (Аллея славы и гордости) кутун тир.

- Заз Севостополь шегьерда Ватандин ЧIехи дяведин иштиракчийриз Баркаллувилин ва дамахдин аллея эцигнавайди акунай, — суьгьбетзава аллея эцигуник кьил кутур КIварчагърин хуьруьн поселенидин депутат Загьидин Тажибова. – Зани фикирна: вучиз ихьтин аллея НуьцIуьгърин хуьре СВО-дин иштиракчийриз эцигдач кьван? Зи теклифдин тереф райондин Кьил Саид Темирханова, райадминистрациядин Кьилин заместитель Заур Къагьриманова, КIварчагърин АСП-дин кьил Завидин Загьирбегова, зун председатель тир «НуьцIуьгъар – чи хайи макан» общественный Советди хвена.

Чун фейила са 20-25 кас НуьцIуьгърин хуьряй фенвай «Сиртыч-Кварчаг-Куркент» автомобилрин рекьин (анаг хуьруьн кьилин куьчени я) къерехда аллея кутунал машгъул тир. Анал СВО-дин иштиракчияр – орденринни медалрин сагьибар тир Нарман Загьирован, Рагьим Эзберован, Исрафил Исрафилован, Садрудин Хлефован, Рамиз Тажибован, Кемран Мегьамедован, Шайдабег Шабанован портретар (шикилар) ва гъверши таран 7 къелем (красный клен) хканвай, цIийиз кутазвай аллеяда акIурун ва цун патал.

- Гуьрчег акунрин ракьун даяхрал алкIурнавай портретар ва гъверши таран къелемар чна, заказ гана, Туладай хкайди я, — давамарна вичин ихтилат Загьидин Тажибова.

Чаз малум хьайивал, аллея кутазвайбурун арада СВО-дин иштиракчийрин дидеярни бубаяр, стхаяр ва маса багърияр, мукьва-кьилияр авай. Аллея кутуниз мерд инсанар тир Нариман Сулейманова, Загьидин Тажибова, Эльмудин Тажибова, Ярали Загьирова, хуьруьн АСП-дин работникри ва чпин тIварар кьуна кIан тахьай масабуру пулунин такьатралди куьмекар гана.

- Са рахунни алачиз, дередин хуьрера тухузвай баркаллу гзаф крарик кьил кутазвай Загьидин Тажибова гъиле кьуна, кьилиз акъудай и кар гьам баркалла къведайди, гьамни сувабдинди я, — лугьузва КIварчагърин АСП-дин кьил Завидин Загьирбегова. – Дередин хуьрерай СВО-да, санлай къачурла, 30-далай виниз кьегьалри иштиракзава. Абурун гьуьрметдай ва Ватан патал телеф хьайибур рикIера хуьнин лишан яз, чахъ Баркаллувилин ва дамахдин аллеяяр КIварчагърин, Зизикрин ва Экенрин хуьрерани эцигдай фикир ава. И кардин тереф депутатри, дередин хуьрерин общественностдин векилрини хуьзва.

Гьакъикъатдани, ватанперес, мугьманперес инсанрин – къуччагърин дере я КIварчагърин дере. Аферин ва баркалла чпиз!

Текстер кхьейди ва шикилар ягъайди Хазран Кьасумов я