Дагъустандин къилихралди къуллугъзава

Донбассда кьиле тухузвай военный махсус серенжемдин зонада са шумуд вишелай виниз чи райондин кьегьал аскерри иштиракзава.

Абурукай сад Курхуьрелай тир Юсуф Рамазанов я.

Курхуьрелай тир Гьажиев Мегьамеда вичин хтул Юсуф аскервилиз рекье твадайла лагьанай: «ЧIехи несилдилай чешне къачу, гьар гьи карда хьайитIани». И келимаяр алай вахтунда вичи СВО-дин женгера къуллугъзавай хтул Рамазанов Юсуфан фикирдай акъатзавач, чIехи буба Мегьамедни адан рикIел алайди ашкара я.

Юсуфа лагьайтIа 2022-йисан февралдилай инихъ СВО-да иштиракзава, ам артиллерист я. Адаз подполковниквилин чин ава. Мариуполь ва патарив гвай хуьрер Украинадин жалатIрикай хуьзвайла Юсуф Рамазанов артилериядин полкунин командир я. И жавабдар къуллугъ адал женгера къалурай командирвилин чирвилер, хсуси алакьунар фикирдаваз ихтибарнава.

Командирди гьар са карда чешне къалурзава , аскерри адаз екез гьуьрметзава, тапшуругъар тамамарзава. ГьикI лагьайтIа, Юсуфаз вичин гьар са аскер багьа я, абуруз гьар садаз чпи-чпиз куьмек гун чарасуз тирди чирнава. Аскеррини и важиблу кар гьиссзава. Командирдин агалкьунар, алакьунар кьилин фагьумдилай, кьатIунрилай гзаф аслу я, — лугьузва командирди.

И ерияр ада Азовсталь, Угледар ва мукьвара къизгъин женгер кьиле фенвай Авдеевка шегьер Украинадин националистрикай азаддайла мад сеферда субутарна. Четинвилер ва къулайсузвилер тIимил гьалтнач, вирибуруз кьегьалвилелди дурум гана подполковник Юсуфа.

Ара-бир ам телефондин куьмекдалди хизандихъ, хайи диде Зилейфатахъ галаз алакъада жезва. «Са фикирни ийимир, вири крар, зи къуллугъни, гъилик квай аскерарни хъсанзава, чна душмандиз ягъунар кьазва. Чун гъалиб жеда, чун инанмиш я.

Эхиримжи вахтара Юсуф Рамазанова Угледарда, Энергодарда къуллугъна. Алай вахтунда ам Краснодардин крайдин Кореновск шегьерда бинеламиш хьанвай артиллериядинни ракетайрин бригададин штабдин начальник я. СВО-да иштиракун Марьинка лугьудай чкада давмарзава.

ВикIегь командирдиз «Орден Мужества», «За заслуги перед Отечеством 2-степени» орденар, «За освобождение Мариуполя», «За участие в спецоперации по денафикации и демилитаризации на Украине» медалар ганва.

1983-йисан 22-январдиз хайи ада Дагестанский государственный университет яру дипломдалди, Санкт-Петербургдин военно-артиллерийский Михайловский академия куьтягьна. Ада Нижний Новгородда, Москвада, Новочеркасскдани къуллугънай. Гьиниз ракъурайтIани, гьихьтин тапшуругъ гайитIани ада чIехи командирар рази жедай тегьерда, дагъустанвидиз хас тирвал ам кьилиз акъудзава. Чаз адахъ чандин сагъвал, дуьньядин ислягьвал хьана кIанзава.

Къуй дяве куьтягь хьана, вири аскерар сагъ-саламатдиз чпин хизанрин патав хтурай!

Райсудин Набиев, зегьметдин ветеран