Меню
6+

Сайт «Кюре»

02.04.2024 15:35 Вторник
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Экв гана, фад туьхвей гъед

Адет яз, инсан хайи ва кьейи йисарин арада ихьтин лишан – (тире) эцигда. Гьа лишанди инсанди экуь дуьньядал кечирмишай йисар къалурзава.

ТIебиатдин къанун яз: инсан къведа дуьньядал, вичиз Халикьди гайи вахт тамам хьайила, хъфида ам и мугьман тир дуьньядай эхиратдин кIвализ – садбур хейлин яшариз акъатайла, садбур лап аялар, жаванар яз.

Къе чаз макъалада ихтилат ийиз кIанзавай Владик Мисриханов хайи ва кьейи йисарин арада са артух вахт авач: 2001-2022-йисар. Лап гьайиф къведай, рикIиз тIар жедай кар я – Владик и экуь дуьньядал анжах 21 йисузни 7 вацра яшамиш хьана…

Ваъ, чаз рагьметлу Владик Мисриханов таниш тушир. Донбассда Россиядин Яракьлу Къуватри тухузвай военный махсус серенжемда игитвилелди телеф хьайи кьегьал хцикай «Куьредин хабарар» газетдин редакциядиз делилар Махачкъала шегьерда яшамиш жезвай Владикан диде Мисриханова Сабина Къазибеговнади агакьарна, рикIе экуь мурадар, къастар амаз рагьметдиз фейи хцин шикилни галаз.

Малум хьайивал, Сабина ва Мегьрали Мисрихановрин ери-бине Сулейман-Стальский райондай я, абурун хизан фадлай Дагъларин уьлкведин меркезда яшамиш жезва.

«Гьиниз гуьлле гайитIани, ам дидедин рикIихъ галукьда», — лагьанай Дагъустандин халкьдин шаир Фазу Алиевади.

Чагъинда авай хва къакъатай, адакай чи редакциядиз чар кхьей Сабина Къазибеговнадин рикIикай чаз хабар я, чна адан дерт гьиссзава.

Лугьуда хьи, викIегьвал итимдиз хас я. Игитрин уьмуьрни куьруьди жеда – и кардин сир вуч ятIа?

«Дагъвийрин тарих перодалди кхьенвач, ам гапурдалди, мукалдалди, балкIанрин кIураралди, сурун къванералди кхьенва», — лагьана Дагъустандин халкьдин шаир Расул Гьамзатова. Владикан куьруь, ватанпересвилин тарих хьиз.

Владик 2001-йисан 15-мартдиз Сабина ва Мегьрали Мисрихановрин адетдин дагъви хизанда дидедиз хьана. 2008-йисуз ам Махачкъаладин I6-нумрадин юкьван школада 1-классдиз фена. Школада кIелдай йисара ам кIелунин, ахлакьдин, общественный уьмуьрда иштиракунин рекьерай чешне тир, ам спортдални рикIивай машгъул жезвай. 2016-йисуз Владика Махачкъала шегьердин кIвенкIвечивал патал армспортдай тухвай акъажунра приздин 3-чка кьунай.

Владик Мисриханова школада 9-класс, гуьгъуьнлай «Бурение нефтяных газовых скважин» пешедай Дагъустандин политехнический колледж акьалтIарна.

2021-йисуз В. Мисрихановаз армиядин жергейриз эвер гана. Ада Москвадин областдин Нахабино поселокда 11361-нумрадин войсковой частуна инженервилин кьушунра къуллугъзавай. Пуд вацралай жумарт лезги хци контракт кутIунна, армияда къуллугъ авун давамарна. Адан къаст Россиядин Армиядин офицер хьун тир. Гьавиляй Донбассда военный махсус серенжем башламиш хьайи сифте йикъарилай ада вичин буржи СВО-дин зонада давамарна. Дяве мусибат я, ам къурбандар галачиз жедач. 2022-йисан 20-октябрдиз кьегьал хва Владик Мегьралиевич вичин аскервилин буржи тамамардайла игитвилелди телеф хьана, гьа и йисан 30-ноябрдиз ам Сулейман-Стальский райондин ДаркIуш-Къазмайрин сурара кучудна.

2023-йисан 3-мартдиз Россиядин Федерациядин Президентдин Указдалди Мисриханов Владик Мегьралиевичаз «Жуьрэтлувиляй» орден (кьейидалай гуьгъуьниз) гана.

2023-йисан 14-июндиз Сулейман-Стальский райондин Кьил Саид Темирханова гьукуматдин награда рагьметлудан буба Мегьрали Мисрихановав вахкана.

2023-йисан 22-июндиз, Владик Мисриханован тIвар гьамиша рикIера амукьдайвал эбеди авун яз, школада мемориалдин кьул ачухна.

Эхь, Владикан уьмуьр лап куьруьди хьана – экв гана, фад туьхвей гъетрен хьиз.

Яраб, лугьузва чна, Владик Мисриханован рикIе экуь гьихьтин мурадар, къастар авайтIа? Белки ада ватандин армиядин генерал хьуникай фикирзавайтIа? И суалриз чаз жавабар жагъидач, Аллагьдиз чир хьурай.

… Макъаладихъ галай шикилдай чаз рикIиз чими, милаим, лап жаван гада килигзава. РикIяй ихьтин цIарар къвезва:

Хуьдай чIавуз ислягь халкьар

Донбассдин,

Мураддалай хва кьена хьи дидедин,

Вучиз уьмуьр куьруь жеда игитдин?

Душмандизни веледдин дерт такурай.

Владик тIвар алай вичел аскердин,

ГьикI сура тван жегьил беден

кьегьалдин?

ГьикI фена вал гъил алчахдин-

небгетдин?

Душмандизни веледдин дерт такурай.

Ваз ахъа я ракIарар къе женнетдин,

Амукьда тIвар эбеди яз игитдин,

Сагъ хъижедан рикIин хирер дидедин?

Душмандизни веледдин дерт такурай.

Малаик яз цаваралла Владик,

Диде-буба, шел-хвал ийиз, гьарайдик,

Кваз хьурай вун Сад Аллагьдин

регьимдик,

Душмандизни веледдин дерт такурай.

Са шакни алачиз, Владик Мисриханован, ада хьиз Ватан патал чанар къурбан авур маса рухвайрин тIварарни райондин, уьлкведин тарихда гьатда, гележегдин несилрини абур рикIера хуьда. Шаир ва тарихчи Забит Ризванова кхьейвал, инсандин игитвал кьатIудайбур несилар я.

Хазран Кьасумов, РФ-дин журналистрин Союздин член

Добавить комментарий

Добавлять комментарии могут только зарегистрированные и авторизованные пользователи. Комментарий появится после проверки администратором сайта.

16