Гатфарин призывдиз гьазурвилер

Алатай гьафтеда Дагъустан Республикадин Кьил Сергей Меликова регион гатфарин призывдиз гьазур жезвай гьалариз талукьарнавай совещание кьиле тухвана. И месэладиз талукь яз алай вахтунда республика да кьиле тухузвай мярекатрикай ДР-дин военкомдин везифаяр вахтуналди тамамарзавай Замирбег Куьребегова малумат гана. Ада лагьайвал, военный комиссариатди призывдик акатзавайбурун сиягьар гьазурнава ва абуруз виридаз и кардикай хабар гузва. Региондин сборный пунктни жегьилар кьабулун ва абур къуллугъ ийиз кьушунрин частариз рекье тун патал герек вири шартIаралди таъмин я.

ДР-дин Кьил Сергей Меликова муниципалитетрин кьилеривай чкайрал гатфарин призыв тешкилуниз кьилин фикир гун истемишна, ада къейд авурвал, шегьеррин ва районрин призывдин комиссийрин кIвалахдилай санлай призыв кьиле фидай гьал аслу я.

«Алай йисан гатфарин призывни хъсан гьалара кьиле фидайдак за умуд кутазва», — лагьана Сергей Меликова.

Алатай гьафтеда Сулейман-Стальский райондин Кьил Саид Темирханова кьиле тухвай совещанидални, йикъан важиблу маса месэлайрихъ галаз санал, муниципалитетда военный къуллугъдал жегьилар тухунин гатфарин призывдиз гьазурвилер акунин месэладизни килигна.

Военный комиссар Райзудин Женетова лагьайвал, гатфарин призыв 2024-йисан 1-апрелдиз башламишда ва ам 15-июлдалди давам жеда. Алай йисуз армиядиз тухузвайбурун яшар гзафарнава. ИкI, армиядиз 18 йисалай эгечIна, 30 йисал кьван яшара авай жегьилар тухуда. Къуллугъдин вахт са йис яз ама.

Военком Райзудин Женетов вичин рахунра армияда къуллугъ авуникай кьил къакъудзавайбурун гьакъиндай законда хьанвай дегишвилерални акъвазна. ИкI, военкоматди повестка вахкайла татунай жерме артух хьанва, ам 10000-далай 30000 манатдал кьван я. Вичин хизандин гьаларикай, яшамиш жезвай ва я кIелзавай чкадикай военкомат хабардар тавуртIа, призывник 1000-далай 5000 манатдал кьван жерме ийида. Призывдин вахтунда яшамиш жезвай чка 3 вацралай виниз вахтунда дегишарнаваз хьайитIа ва идакай военкоматдиз хабар ганвачтIа, призывник 10000 манатдилай 15000 манатдал кьван жерме ийида. Гила медицинадин комиссиядиз атуникай кьил къакъудзавай призывникдиз гузвай жазани кIевиди хьанва: эгер виликдай ам таъкимарзавайтIа, гила ам 15000 манатдилай 25 000 манатдал кьван жерме ийида.

Армиядикай кьил къакъудзавайбур уголовный рекьяй жавабдарвилиз чIугун къалурнава. Абур 200 агъзур манатдал кьван жерме ийиз, 6 вацран вахтунда дустагъда тваз, кьве йисал кьван вахтунда мажбуривилелди кIвалахал желб ийиз ва азадвиликай магьрумиз жеда.

Военный комиссар Райзудин Женетова хабар гайивал, мукьвал тир вахтара республикада призывдин комиссийрин председателрин ва муниципалитетрин военный комиссарин иштираквал аваз инструкторвилинни методикадин сборар кьиле фида.

Райондин Кьил Саид Темирханова вичин рахунра гатфарин призывдин планда къалурнавай серенжемар кьиле тухун сад-садав кьадайвал авун чарасуз тирди къейдна.

«Призывдин кампания ери аваз ва тешкиллувилелди виниз тир дережада кьиле фин лазим я. Хуьрерин поселенийрин администрацийрин кьилеривай за военный комиссариатдихъ, военный учетдин столрин работникрихъ галаз лап сих ва тамам алакъада аваз кIвалахун, призывникди повестка вахчуникай ва военный комиссариатдиз атуникай кьил къакъудзавай дуьшуьшра, талукь серенжемар кьабулун истемишзава», — лагьана райондин Кьил Саид Темирханова.

Лагьана кIанда, СВО-дихъ галаз алакъалу яз, эхиримжи сад-кьве йисан къене жегьилри армиядиз финикай кьил къакъудзавай дуьшуьшар жезва. Совещанидал рахайбуру лагьайвал, армиядиз срочный къуллугъдал тухузвай аскерри СВО-дин зонада иштиракзавайди туш. Са йисуз къуллугъна, абур кIвалериз хуьквезвайди я.

Совещанидал килигай месэладин важиблувал фикирда кьуналди, райондин Кьил Саид Темирханова военный комиссариатдиз призывдик акатзавай гражданрин списокар туькIуьрунин, военный учетдин столрин работникрихъ галаз алава кIвалах тухунин, призывдин кампаниядихъ галаз алакъалу яз общественный тешкилатрин, гьабурукай яз дяведин гьерекатрин ветеранрин, армиядай хтанвайбурун, спортсменрин, марифатдин организацийрин векилрин иштираквал аваз информациядинни профилактикадин серенжемар тухунин теклифарни гана.

Хазран Кьасумов