Лайихлувилер еке я
Сулейман-Стальский райондин Кьил Саид Темирханова Герейханован хуьре яшамиш жезвай, алай вахтунда лайихлу пенсияда авай Гьамид-Эфенди Нежведиловав муниципалитетдин вилик лайихлувилерай Гьуьрметдин знак вахкана, 70 йис тамам хьун райадминистрациядин, депутатрин Собранидин ва кьилди вичин патай мубаракна, район вилик финик еке пай кутунай сагърай лагьана, адахъ мягькем сагъламвал, яргъал йисарин уьмуьр хьана кIанзавайди къейдна.
Дуствилин гьалара кьиле фейи гуьруьшдал къейд авурвал, Гьамид-Эфенди Пашаевича райондиз регьбервал гана, жуьреба-жуьре йисара муниципальный ва территориальный къурулушра регьбервал гудай къуллугърал кIвалахна.
Гуьруьшдал Гьамид-Эфенди Нежведилова вичи райондиз регьбервал гайи йисар, гьа йисара кьилиз акъудай кIвалахар, вичихъ галаз кIвалах авур юлдашар рикIел хкана, эхиримжи йисара район социальный ва экономикадин рекьерай вилик фенвайди, агьалийрин яшайиш хъсан хьанвайди къейдна, муниципалитет гьар са рекьяй вилик тухунай райондин Кьил Саид Темирхановаз, администрациядиз чухсагъул лагьана. Гьелбетда, Гь.-Э. Нежведилов неинки районда, гьакIни адалай яргъарани гзафбуруз лап къени инсан, хъсан руководитель, тешкилатчи ва общественник яз чида. Ада тек са район, адан агьалияр патал авур хъсан, къени кIвалахрикай рахаз хьайитIа, макъала лап яргъиди жеда. Зи фикирдалди, вири крар, кIвалахар рикIел хкунин лазимвални авач, абур инсанриз чизва.
Заз агъадихъ Гьамид-Эфенди Пашаевич Нежведилован уьмуьрдин рехъ, ада тамамарай къуллугъар къалурзавай са бязи делилрал ва рекъемрал акъвазиз кIанзава.
Гь.-Э. Нежведилов 1954-йисан 18-мартдиз Кьасумхуьрел дидедиз хьана. Ада 1971-йисуз Герейханован хуьруьн юкьван школа акьалтIарна.
1971-1976-йисара Дагъустандин хуьруьн майишатдин институтдин экономикадин факультетда кIелна, «Хуьруьн майишатдин производстводин экономист-тешкилатчи» пешекарвал къачуна.
1976-1977-йисара Калужский областда «Тарусский» совхозда кьилин экономист яз кIвалахна.
1977-йисан ноябрдилай 1978-йисан ноябрдалди Гь.-Э. Нежведилова ГДР-да авай Советрин Армиядин кьушунрин группада къуллугъна.
Гуьгъуьнлай Гьамид-Эфенди Пашаевича Герейханован тIварунихъ галай совхозда кьилин экономиствиле (1979-1982-йисар), КПСС-дин Сулейман-Стальский райкомдин тешкиллувилинни партийный кIвалахдин отделдин инструкторвиле (1982-1985-йисар), «Ашагастальский» совхоздин директорвиле (1985-1990-йисар) кIвалахна.
КIвалахда жезвай агалкьунриз, тешкилатчивилин алакьунриз килигна Гь. –Э. Нежведилов 1990-йисан майдиз КПСС-дин Сулейман-Стальский райкомдин 2-секретарвиле хкяна.
Гуьгъуьнлай Гьамид-Эфенди Пашаевича Сулейман-Стальский райондин исполкомдин председателдин заместителвиле (1991-йисан июндилай I992-йисан февралдалди), «Ашагастальский» совхоздин директорвиле (1992-1994-йисар), «Эльбин» банкдин С.-Стальский филиалдин руководителвиле (1994-1995-йисар), «Герейхановский» совхоздин директорвиле (1995-1997-йисар) кIвалахна.
Жуьреба-жуьре хилера ва жавабдар къуллугърал намуслудаказ кIвалах авур, агалкьунар къазанмишай ва хъсан тежриба хьанвай Гь.-Э. Нежведилов 1997-йисан августдин вацра Сулейман-Стальский райондин администрациядин Кьил яз хкяна. И жавабдар везифаяр ада 2001-йисан апрелдалди уьзуьагъдаказ кьилиз акъудна, райондин экономика мягькемарна, социальный рекьерай хейлин кIвалахар тамамарна.
2001-йисан апрелдин вацра ам «совхоз им. Герейханово» акционервилин обществодин руководителвиле тестикьарна, и везифаяр ада 2007-йисан апрелдалди тамамарна.
Гьамид-Эфенди Пашаевича 2007-йисан апрелдилай 2010-йисан июндалди Дербент шегьерда «Дорожно-эксплуатационное предприятие 172» ФГУ-дин директорвиле, 2013-2017-йисара «Дагестанская энергосбытовая кампания» ПАО-дин Мегьарамдхуьруьн, Хивдин отделенидин руководителвиле кIвалахна.
Чна винидихъ лагьайвал, яргъал йисара муниципальный ва территориальный къурулушда жавабдар къуллугърал намуслудаказ кIвалах авур, муниципалитет гьар са рекьяй вилик финик еке пай кутур Нежведилов Гьамид-Эфенди Пашаевич алай вахтунда лайихлу пенсияда ава. Адаз райондин руководстводин ва агьалийрин патай еке ва лайихлу гьуьрмет ава.
Ваз 70 йисан баркаллу юбилей мубаракрай ва вахъ мягькем сагъламвал, хизандин бахтлувал, яргъал йисарин уьмуьр хьурай, гьуьрметлу Гьамид-Эфенди Пашаевич!
Хазран Кьасумов
Добавить комментарий
Добавлять комментарии могут только зарегистрированные и авторизованные пользователи. Комментарий появится после проверки администратором сайта.
