Сардархуьре республикадин турнир

Дзюдодай пешекаррин арада дуьньядин чемпион, Россиядин лайихлу тренер Тельман Къурбанова чаз лагьайвал, турнирда Махачкъала, Къизляр, Каспийск, Дербент шегьеррай, Сулейман-Стальский, Мегьарамдхуьруьн, Хив, Дербент ва маса районрай тир 100-далай виниз спортсменри иштиракна. Абурун арада республикадин кIвенкIвечивал патал акъажунрин, Виридуьньядин турниррин гъалибчиярни призерар авай. Гьавиляй жаван спортсменрин арада акъажунарни къизгъиндаказ кьиле фена.

Республикадин дережадин турнир ачухунин ва тафаватлу хьайи спортсменрив наградаяр вахкунин мярекатра Сулейман-Стальский райондин администрациядин Кьилин 1-заместитель Лацис Оруджева, РФ-дин спортдин мастер Мегьамедзагьид Мегьамедова, районда кардик спортдин, туризмдин ва жегьилрин крарай Комитетдин директор Чингиз Абдулмежидова, машгьур спортсменар-стхаяр тир Рамазан, Юрий ва Тельман Къурбановри иштиракна.

Къизгъиндаказ кьиле фейи акъажунра командайрин арада 1-чкадиз Сулейман-Стальский райондин команда лайихлу хьана.

2 ва 3-чкаяр, талукь тирвал, Хив ва Мегьарамдхуьруьн районрин командайри кьуна.

Дагъустан Республикадин кIвенкIвечивал патал акъажунра Сулейман-Стальский райондин самбодинни дзюдодин ДЮСШ-да вердишвилер къачузвай Ибрагьим Эседулаева (60 кг.), Назим Мейланова (66 кг.), Вели Саругъланова (81 кг.) ва Замир Магьмудова (90 кг.) 1-чкаяр, Муххамад Цмиханова (50 кг.), Иса Рустамова (60 кг.) ва Амиран Рагьимова (81 кг.) 2-чкаяр, Мурадали Абдулфатагьова (66 кг.) ва Шейх Аливердиева (73 кг.) 3-чкаяр кьуна.

1, 2 ва 3-чкаяр кьур спортсменар Дагъустан Республикадин образованидин министерстводин дипломриз, медалриз ва пулдин призриз лайихлу хьана.

Россиядин лайихлу тренер Тельман Къурбанова чаз лагьайвал, Сардархуьре кьиле фейи республикадин турнирда гъалибвал къачур спортсменри Россиядин кIвенкIвечивал патал кьиле фидай акъажунра иштиракда.

Хазран Кьасумов